الأب رالف طنجر: العالم جنّ، ونحنا المسيحيين عم نتفرّج.. بس منتأثر عَ التلفزيونات وبتنزل دموعنا… (Audio)

– الأمم المتحدة بلبنان تشجّع “المثلية” وتؤنب موظفة لديها لأنها قالت “يا رب نجينا” لزواج مثلي بلبنان.. (التفاصيل)

***

مقتطف من حديث الأب رالف طنجر.. حول عبادة الجسد.. أين المسيحي:

• همّ الأهل أول ما يخلق الولدْ، يعمدوه.. لما بيتعمد، بصير روح الله ساكن فيه، بعد ما بينمسح بالميرون.
  نحنا المسيحيين منختلف عن باقي الديانات والشعوب، لأنو  منعتبر “الميرون” هوي رائحة المسيح الطيبة
• كل مرة المسيحي بكون عايش بالنعمة، هالريحة بتفيض منو، وكل مرة بكون عايش بالخطية وبعيد عن الله، ما بتشمو ريحة المسيح
• من وقت ما تعمدنا الله زرع “روحو” – نعمتو، وهيدي الروح هيي وسيلة خلاص نفسنا، بالمقابل في روح تانية، غير الروح القدس الموجودة، وهيي الأرواح الشريرة يللي هدفها تقشط هالنعمة الموجودة بالمسيحي، مار بولس بوضّح الروحية اللي عايشينة عً الأرض، برسالتو لأفسس: معركتنا ليست من لحم ودم، (مش مع بشر) بل مع الرئاسات والسلاطين وولاة هذا العالم، عالم الظلام، الأرواح الشريرة في الفضاء..

• معركتنا روحية، ونحنا اليوم إذا منطلّع كيف روح الإثم عم يشتغل. ويسوع سمّاه: سيّد هذا العالم… العالم جنّ.. ونحنا المسيحيين عم نتفرّج، كأنو ما النا علاقة بالأمور اللي عم تصير.. حتى قوانين العالم كسرت قوانين الله:
  – رجال عم يتحولو نسوان.
  – رجال عم يتجوزو رجال،
  – نسوان عم يتجوزو نسوان…
  عادية، من فترة بسيطة… كنت قاعد مع موظفة بالأمم المتحدة، لبنانية.
  شبْ عم يقدّم طلب وعرفت انو هوي متزوج شبْ، قالتلو: يي، يا رب نجينا..!!
  قامت الإدارة بعتت وراها، إنو هيدا ضدّ حقوق الإنسان. وضدّ كرامتو. إنتي جَرَحتيه!!

• ما بقا عنا روح قدس حتى نميّز شو الصح، وشو الغلط.
  وصرنا نضيع بين الروح القدس والأرواح الشريرة، اللي اليوم متملكة بالبشر.
• نحنا اليوم ما فينا يكون عنا هالصمت، لأنو كل مرة المسيحيين عم يصمتو.. وبقول الإنجيل: هو روح الحق الذي لا يقدر العالم أن يقبله… يعني المسيحي بدّو يضل بالحق، وبدو يضل صوت صارخ يقول: هيدا غلط، وهيدا الصح.. مش نساير ونسكتْ.
• كل ما عم نصمت، كل ما الأشرار عم يزيدو وقاحة.
  لأنو المسيحيين فايتين بغيبوبة. وبحطّ علامة استفهام.
  المسيحي الفايت بغيبوبة: – لمين عم يصلّي؟ – لمين عم يقدّم اماتة؟ – لمين عم يصلّي ورديتو؟ كرمال مين عم يقدّس! إذا ما عندو قضية خلاص النفوس، وإبراز الحقيقة بمجتمع صار ملوّث من الخطية والدنسْ..!!
• عملو فحص ضمير، أنا ويني من الروح القدس اللي ساكن فيي! بقول مار بولس: في عداوة كتير كبيري بين الجسد والروح القدس. نعم في حرب بين الجسد والروح.

ما يوحنا بقول: أعداء المسيح تلاتة:

• 1) ابليس، مصدر كل شر، ويسوع بسميه “سيّد هذا العالم”، وهوي الحاكم اليوم..
  2) الجسد
  3) العالم
  ونحنا دايماً منعيش صراع شو الله عم يطلب مني وما بين جسدي الضعيف، يللي الشيطان عم يستغلو كرمال يوقعني بالخطية.

– مار بولس بقول: الخير الذي اريد أن أعمل. إياّه لا اعملْ، و الشر الذي لا أريد أن أعملْ، إياه أعملْ.
– وهيدا اليوم الصراع اللي عم نعيشو كل يوم:
منسمع بخبر موت، أو شي، بيتحرك ضميرنا وبيرجع يوعينا لأمور لازم نعملا، في خير لازم اعملو.. ؛ يوم يومين، وبعد الإعتراف، بيرجع الشر عم بعملو والخير ما عم بعملو. (وهيدا هوي الجهاد الروحي).

– اليوم عبادة الجسد اوّل سبب للخطية، ومبكلّة الناس. ومن بعد ما بيطلب مار بولس مساعدة الله ، بقلو: تكفيك نعمتي.. بقول القديس بولس: إن لم تقمعو بقوة الروح أعمال الجسد، لن تحيوا.. ومن هيك بقول: لا تُطفئو الروح اللي فيكم.

• – يللي بعيش بالخطية وراضي عنا، الروح القدس بينطفي فيه، وبصير إنسان ميّت.. يمكن يكون بنظر العالم: عم يبدّع، ويمكن Super Star، وما في أحسن منو.. ولكن بنظر الله إنسان ميّت.
• بقول مار بولس برسالتو الى غلاطية: اسلكوا في الروح، فلا تتموا بشهوة الجسد.. لأن الجسد يشتهي بعكس الروح، والروح يشتهي بعكس الجسد.
  1) الروح بقلك، مثلا: قوم نهار الأحد بكير، روح على الكنيسة، صلّي..؛ الجسد شو بقلك: بدّي نام… خلني نام أكتر، وبوعا، مشاوي وأكل
  2) الروح بقلك، صالح جارك، وقلو صباح الخير..؛ والجسد شو بقلك: شو بدك فيه، خليه هوي يجي لعندك..
  3) بتكون طالع عَ مفرق جعيتا، بتلاقي ختيارة حاملة شنطة ومحردبة عَ الطريق، الروح شو بقلك: وقّف طلعا…؛ الجسد شو بقلك: عمول حالك منك قاشع..
• مار بولس بقول: كلاهما يقاوم الآخر، حتى انكم تعملون ما لا تريدون… شو فيها إذا صالحت جارك؟؟ شو في بيحرز بهالحياة.. !!
  بس منتأثر عَ التلفزيونات، وبتنزل دموعنا… خبار.. بالفعل ما فيشي، مع انو بكون الإنسان حدّك!!
• أعمال الجسد ظاهرة جداً بحسب مار بولس:
  – الزنى، بالفكر والفعل… يسوع بقول: من إشتهى بقلبه فقد زنى.
  – الدعارة،
  – الفجور، ويا في ناس بتِفجَر بطريقة، وبصيرو شيطان حيْ
  – عبادة الأصنام: المال + أي امر بياخدلي عقلي..
  – الأرزاق، والورتة،
  – السيارة… إذا خدش جاري، بقوّم الأرض، وكل يوم بلقط القطنة وبصير عم مسّح فيا..
  ايه في أمور قلبنا معلّق فيا أكتر ما معلّق بِ الله. وهيدي هيي عباة الأصنام..
  – السحر، وهون عم نحكي عن كلشي، أبراج وتبصير…
  – العداوات.. ونحنا المسحيين ما عنا أعداء. يسوع بقول: احبوا أعداءكم، وعدونا واحد هوي ابليس وبس وعملائو…
  – الخصام، والحسد.. والغضب، والتحزّب مع كل انتخابات، بتنشق الضيعة شقفتين، والناس بتبطّل تحكي مع بعضا.. ويا ويلو الكاهن إذا ما ناولن.
  – يللي منتمي لبدع الكنيسة محرمتها.. ويللي عاملين طلاق خارج الكنيسة..
  – الإنقسام ضدّ الوحدة.. وما في عيلة عايشة اليوم الوحدة. يسوع: بقول: احفظهم يا رب واحداً، كما أنا وانت واحد..
  – التعصّب والسكر، والعربدة..
• مار بولس بنبّه: إن الذين يعملون مثل هذه الأعمال، لن يرثوا ملكوت الله. يللي عايش فيون، ومش حابب يتغيّر، ما بيربح الملكوت.. أمّا اللي عم يحارب ويعترف، وعم يهرب من الأسباب اللي عم توقعو بالخطية.. هيدا ماشي صوب ملكوت الله.
• ومار بولس بيحكي، عن مضاجعي الذكور.. لن يرثوا ملكوت السموات… واليوم بقولولك: لازم تتقبل الكنيسة؟ وين المشكلة؟؟

ثمار الروح

• أمّا الذهاب باتجاه الروح القدس، فرح تثمر:
  – المحبة: محبة بلا حدود، وبتعطي حالا للآخر، مش محبة الماما والبابا ورفيقي… محبة حتى الأعداء
  – الفرح: مش انو مبسوطين نازلين على البحر.. الفرح الداخلي الثابت رغم الآلام..
  – السلام الداخلي.. الصبر.. اللطف.. الصلاح وأتمنى الخير لللآخرين… الأمانة.. الوداعة..
  – ضبط النفس: كون مسيطر على ذاتي.. ولا اتوتّر ولا عصّب، خصوصي قدام الأشخاص يللي بضلن يستفزوني…
• هيدا هوي المسيحي المليان من الروح القدس.. عملو فحص ضمير، هل الوح القدس عم يحتلني ويحولنّي…!!
• روح القدس: بنقّي، وبطهّر وبقدّس..
  المسيحي المليان من الروح القدس، شخص روح الله فيه.

***

أهمية ماء المقدّس

نحن نبارك الماء عادة 4 مرات أو مناسبات:  الغطاس ، العنصرة ، 29 حزيران: في عيد مار بطرس وبولس، وعيد الصليب

المباركة لتذكرنا بأهمية الماي المقدسة، لتحررنا من الخطايا.. وتقديسنا اكتر، والكنيسة بتعلمنا: عن الماي والملح الخشن، والزيت.. هودي 3 عناصر بيدخل فيون الروح القدس، كرمال يساعدونا بحياتنا الروحية…

الكنيسة بتقول: انها علامات مقدسة، ويمكن بواسطتها من خلالها تقليد الأسرار.. ومنحصل على فوائد روحية.. وليه منرشّ ماي؟ لأنو روح القدس بدّو يحلّ محلّ روح تانية، يللي هيي الأرواح الشريرة…

نعم الروح القدس بيطرد الأرواح الشريرة، لكي يحفظنا الله من أخطار النفس والجسد.. انتو لو بتشوفو بجلسة “التقسيم” كيف لما الكاهن بكبّ ماي مصلاية على الممسوس، كيف بصير ابليس يحترق…

وأيضاً الماء المقدسة مفيدة للأنفس المطهرية.. ولتسترح نفوس الموتى المؤمنين.. فيها مساعدة لبلمسة نفوس الموتى…

رصد Agoraleaks.com