الأخ جو عيد: لو نملك الروح القدس، لبعدنا عن منطق الـ”SALES” مع الله (Audio)

– لو المسيحيين يملكون قوة الروح القدس منا بحاجة لـ”training leadership” (التفاصيل)

عظة الأخ جو عيد في كنيسة سان تيريزيا في السهيلة: (7 آب 2017)

• قرأنا بالرسالة القديس بولس عن عمل الروح القدس،
  وبالإنجيل، بيحكي الرب يسوع، عن حلول الروح عليه.
• من بعد صعود الإبن للسما لليوم، نحنا بعصر الروح القدس. يعني الآب عمل دورو، والإبن عمل دورو، وهلق دور الروح القدس. ونحنا مستمرين بعمل روح القدس بالكنيسة.

السؤال

• إذا عرفنا، أنو الآب هوي الآب الخالق، والإبن هوي اللي تجسّد وخلص، شو دور روح القدس بحياتنا وايماننا المسيحي؟
• الروح القدس كيف بدي اكتشفو؟
  من الإنجيل قدرت شيل 5 أدوار للروح القدس .

أهمية الروح القدس

1) الروح القدس، بدلك عَ يسوع:

• اليصابات بس توصل مريم، بعد ما تبشرت مريم، وحلّ عليا الروح القدس، وحبلت من الروح القدس بيسوع بأحشائها، بقول نص الإنجيل، فامتلأت اليصابت في الروح القدس، وبتطلع بمريم.. ما بتعود مريم نسيبتها، بتقلها: من أين تأتي إليّ أم ربي..!!! بتصير مريم ام الرب.
  

• بس يروح يسوع يتعمّد بنهر الأردن، بحل الروح القدس عَ الإبن.
  تَ يدلّ الكلّ… وبيجعل من يوحنا هيدا الروح لَ يقول: هذا هو حمل الله حامل خطايا العالم.
• الروح القدس بدلنا عَ يسوع؟؟
  كل واحد بحياتو، يا مرقْ، يا عم يمرقْ، يا رح يمرقْ بصراع كتير كبير،
  هالصراع بخلي يقول: شو هيي ارادة ربنا بحياتنا. وينو يسوع من بين كل الأصوات اللي عم نسمعا، ونحنا منسمع كتير أصوات.
• وين ارادة الرب، بس نسمع كل ارادات التانية؟
  وأهم ارادة بتشوّش تفكيرنا، هيي ارادتنا الذاتية.
• عم يقلنا الرب، تتعرف ارادة الرب بحياتك، بدك تطلب الهام الروح القدس.
  قد ما تفتش براسك، وتعمل تحاليل وحسابات، حساباتنا دون الله والهام الروح القدس منعرف وين ودتنا، وعَ أي حيطان ودتنا ؟
• الصوت الوحيد اللي بدّو يوديك لعند يسوع، هو صوت روح الرب. روح يسوع. روح القدس.

2) الروح القدس، بذكرك بكلمة الرب

• بقول الإنجيل، وقاده الروح الى البرية، ليجربّه ابليس.
  غريب؟؟؟ الروح القدس، بقود الرب للبرية، لَ يجربو ابليس؟
  شو البرية؟
• البرية، يمكن نتخيلها مكان بالطبيعة.
  انما البرية هيي اقرب من هيك بكتير. نتطلع بجواتنا، منعرف عن اي برية عم نحكي؟
  البرية مطرح ما كان يسوع وحدو. 
  – لا مريم حدّو.
  – ولا يوسف حدوّ.
  – ولا حدا من التلاميذ.
  – مطرح ما في أكل. ما في شرب داخلي، هوي بالصحرا
  بحياتنا نحنا منمرق بهيك برية، مطرح ما منحس في ولا أي تعزية. ومش عم احكي عن المادة. عم نحكي بس تحس حالك وحيد. وما حدا حدّك، حتى أقرب الناس…. حتى ولادك اللي ربيتن، وتعبت عليون، بتحسّ حالك لو مليانة حياتك ناس، انما من جوا انتا عايش ببرية.
• منكون شايفين الدني سَواد، ولو نحنا عم نضهر ونسهر. ونروح ونجي. انما نحنا من جوا ببرية.
  بهاللحظة بدّو يجي العدو بدّو يركعك…
  بدو يقشطك العدو حتى ربنا، حتى نحنا بهاللحظات، منقول وينك يا رب؟؟؟ ليه تاركني؟؟؟ ليش هاملني؟؟؟
  يا ما منقطع بأزمات، او موت، أو مرض، أو خيانة، أو ضعف، أو حدا تخلّى عنّا، ونحنا تخلينا عن مشروع.. وينو الرب؟؟
• يسوع قال عنو: هيدا الروح اللي بدّو يذكركم، وبدّو يعزيكم. شو عمل الروح القدس هوي وعم يقودو بالبرية، ذكرو بكلمة الله… مع كل تجربة تجي من ابليس، روح القدس اللي عم يقودو ليسوع، عم يذكرو بكلمة الله. وبنفس الوقت بعزيّك. وبقلك انك منك وحيد. بس تحس حالك انك لوحدك، سآل الرب انو يبعت روحو القدوس، حتى يعزيك.

3) الروح القدس هوي بنوتنا للآب. 

• بقول مار بولس، “الروح القدس بيصرخ فيكم أبا أيها الآب” (روح البنوة)،
  اللي بتميّز الطفل عن الكبير، هوي انو بيقشع بيو احلى بيْ بالعالم. وبيّي أقوى بيْ..
• الإبن الصغير، بيوثق ببيو، وبيعرف شو ما يقلو، هيدا لمصلحتو، ما بجادل ولا بشارع.
  حتى إذا غلّط، وعمل عكس ارادة بيو، أوّل حدا بيركض لعندو هوي بيو. لأنو بيعرف انو بيو، رح يقبلو متل ما هوي. حتى لو مغلط.
• الروح القدس بدّو يردّ حالة البنوة لإلنا، لأنو نحنا بس نكبر ما بعود بينا احلى بيْ.
  يمكن نشوف غير بيات يمكن افضل بشغلة، أقوى بشغلة.. منصير نشوف ضعف بينا أوقات، وما منعود نوثق ببياتنا. ومنصير بدنا نعمل ارادتنا… وإذا غلطنا، منصير بدنا نخبي عن بينا. هيدا عمل إبليسي روحياً فينا. وهيدا الشي اللي جايي يشوهو العدو بعيوننا، هوي أبوة الله. وما نوثق بطريقة الله. ولا بتوقيت الله. لأنو الله يمكن بدّو يعطيك.. نطلب الروح القدس، ليرجع يعطينا بنوتنا للآب.

4) الروح القدس الشافي

• يسوع كان يشفي بقوة الروح القدس. (المراجع بالإنجيل)
  المرأة النازفة، وقت تجي تدق بطرف ردائو، بقول: في قوة خرجت مني. أكيد هيدي مش Energie، هيي قوة الروح القدس.
• ولكن الروح القدس ما بيشفي بس الجسد.
  روح القدس بيشفي نفسياً. ونعم
  انما بيشفي الروح القدس روحياً… وبانجيل يوحنا الفصل 20، “يسوع قلن لتلاميذو ونفخ فيهم الروح القدس، وقلن: خدو الروح القدس، ومن غفرتم له خطاياه، غُفرت له. ومن أمسكت عليهم خطاياه، أمسكتْ عليه.
• هالسلطان اللي عطاه الرب لتلاميذو ولكهنتو الأول. عطاهم يروحو يشفو.. وراحو شفيو الأجساد والأنفس وطردو الشياطين. انما بآخر رسالتو عطاهم يسوع سلطان آخر، بقوة الروح القدس، يشفي من المرض الروحي، اللي هوي الخطيئة.
• ونتأمل كلنا سوا، كيف منتعامل مع سر الغفران.
  مع الشفاء اللي الرب بدّو ياه لالنا من خلال الإعتراف.
  نحنا مندخل على الكرسي، متل فايتين نشتري غفران الله. يعني متل الأشخاص اللي بتشتغل بـ”Sales” وبالتسويق والمبيع.. بنبشو عَ الجمل اللي تكمش الزبون. ونحنا نفس الشي، منصير نفتش على اي عبارة بدي قولا، تزبط الوضع وزبط هالبيعة.. وخلي الرب يغفرلي..
• نحنا منكون ناسيين، انوعنا بيْ. وبيي سهران، ومش انو نايم، او هاملني وعم يشوف غيري. وعم يعرف وشايف، وفهمان كلشي.. أخوتي نحنا ما مندخل كرسي الإعتراف تنشتري غفران الله. الله بأبوته المجانية بيغفرلنا ساعة نحنا غلطنا. مش ناطرك تجي 10 Push Ups، وانك تقول حتى يغفرلك. جايي يقلك سلمني ضعفك بكرسي الإعتراف.
• كل روح بتوت عَ عقلنا، وبجرّب يخوفنا من هالكرسي، ومن مواجهة ضعفنا.. هيدي مش من روح الله.
  كل روح بيجي عَ راسك، وبقلك فوت سلّم ضعفك للرب، وغافرلك، وراحمك، والرب خلصك من خطيتك عَ الصليب. عليك بس تفوت وتقبل خلاصك، هيدا الروح اللي بدو يشفيك، لأنو الإعتراف، مش تَ نجلد حالنا، ولا لنعذب حالنا. كرسي الإعتراف هي لشفاء الروح. متل ما منروح عَ المستشفى لنعالج أمراضنا الجسدية. ومنروح عَ الطب النفسي للأمراض النفسية. الطب الروحي في الو مستشفى “هوي كرسي الإعتراف”

5) الروح القدس يحلّ بشكل ألسنة من نار

• هالتلاميذ كانو مفرقعين، كل واحد بميلْ. وخيفان. وعم يفتش عَ خلاصو من ميل. من تلميذي عماوس. لبطرس، لأندراوس…
• جمعن الروح القدس،
  بس مش جمعن، حولّن من ناس خيفانين، وناس عتلانين هم شو بدن يقولو..
  ناس مش مصدقين انو ربن قام، لو شافو ولمسو وقعدو معو.. مش مصدقين انو قام… ومش مسترجايين يقولو للعالم، انوالهنا قام. فراحو متخبايين بالعليّة.
• هني ذاتن الناس، لعملو “training leadership“، ولا راحو تعلمو الوعظ.. هني ذاتن بحلول الروح القدس. نقلبو من ناس خيفانين، جبنا، وصيادي سمك، لوعظة لبطرس اللي نكر الرب، قدر عمّد بوعظة وحدي 3000 آلاف شخص.
• الروح القدس بيجمع الجماعة. وبحوّلها.
  وقديه جماعاتنا وبيوتنا، وكنايسنا، وأديرتنا، ورعايانا، وشغلنا، وأصحابنا. كلشي في جماعة قديه بتشبه جماعة الرسل قبل ما يجمعن الروح القدس.
• كل واحد عَ ميلة، وبهمّو. وبمشاكلو وضعفو.. وهيدا عمل ابليسي، لأنو بيكره عمل الجماعة. لأنو الجماعة عَ صورة الله، اللي هوي جماعة (الثالوث: الآب والإبن والروح القدس)
• ابليس بدّو يخربط جماعاتنا، وعيلنا، وكنايسنا.. وبتمنى ما نكون عم نساهم نخربط بكل جماعة.
  ما نكون آداة بفكرنا وألسنتنا، للشرذمة، ولتفرقة الجماعة..

نطلب من روح الرب متل ما جمع تلاميذ يسوع وقلبن، من حالة لحالة. يجمع عيلنا، وكنايسنا وأديرتنا ويقلبا من حالة لحالة. وكلشي تاني ما رح يفيد….

وبالروح القدس وحدو، نحنا عنجد منقدر نكون ملح الأرض ونورو..

رصد Agoraleaks.com