Agoraleaks Agoraleaks
– الأب غاريوس يدعو لوحدة الكنائس: ارثوذكس – كاتوليك – أرمن – سريان… (Audio)
مقتطف من حديث الأب الياس مارون غاريوس في عظة الأحد في مجدلون: (6 آب 2017)
- في بعض الصبايا والشباب بيستحو يفوتو عَ الكنيسة قدام رفقاتن، بتعرفو هالشي..!!
لأنو عيب..!! انتا شبْ متعلّم بالجامعة بتروح عَ الكنيسة….؟؟؟
ما هيدي للولاد الضعاف. الكنيسة للضعاف…
عيب تفوت عّ الكنيسة، خليك رجال… خليك قبضاي…
بس خلّي بيتك اسمو “Night Club”، خلّي بيتك الـ”Bar” .
وخلّي بيتك للسكر، والحشيشة والمخدرات… انتا رجال..! - وإذا ما كنت أزعر بالمجتمع بسمّوك حمار.
وبسموك غشيم. وبسموك منك رجال…
- والخطّاب (اللي بيخطبو)… اذا ما كانو مِهْرِيين، وتركو أخلاقن بيعتبروهم غشم. لازم يكونو بلا أخلاق.
لاق يا أخوتي.
نحنا تلاميذ الملك، اللي اسمو يسوع المسيح، يللي عَ طول ناطركم.
رافع ايديه ومنزلهن عَ مستوانا حتى يقلنا، تعو يا ولادي، أنا بدي شيلكم من الموت، وما تخافو… - المسيح مصلوب عنا،
حتى يحررنا، ويقلنا القيامة الكم، والإنتصار الكم. لأنو أنا جيت وافتديتكم…
مشكلة
- بيطلب منا يسوع بلسان مار بولس، بقلنا:
تنكون أبناء الله مزبوط، بدكم تثبتو أمام الصعوبات، والشدائد.
ما تزعلو عم قول هالشغلات، لأنو في مشكلة عويصة أخوتي…
بس الرجال والمرا بالبيت، حدا يطلع وجّو بوجّ التاني… دغري عَ الطلاق.
لأنو حرام مزعوجين نفسياً…
لأنو تربّو عَ البسكوتي، وكاسة الحليب الصبح.
نسيو إنو الله مش بسكوتي. نسيو انو الله صليب…
نسيو انو الله عَ الصليب خلصنا - شبابنا اليوم، من غير شرّ، كلّو صايع.
تعودو يروح يسهر ويسكرْ.. بطّل في يقعد ببيتو مع مرتو وولادو…
والأم تعودّت تقعد عَ الفايسبوك، بطّل فيا تخلّف ولاد، لأنو ببطل معا وقت وبدها تحكي عَ الفايسبوك والإنترنت
- يرحم موتاكم،
هيدا الفساد دخل عَ بيوتكم، واسمو شيطان.
ما حدا يقلي يا أبونا: الفايسبوك عم يفيدنا.. هيدي كذبة تاريخية، عم يفيد نص أو ربع بالمليون، والباقي كلّو فساد بفساد.
كبسات، بكبسات…
بتكبس كبسة على الفايسبوك، بروح عقلك.
كبسة تانية، بتصير بلا وعي.
كبسة تالتي، بتموت، ومنجنزّك من البشرية اللي بتحبّ الله، وبتصير متل كل المخلوقات
هذا ودعا الأب الياس مارون غاريوس، لوحدة الكنائس في صلاة جمعته مع المؤمنين:
- يا رب، منوضع قدامك اليوم، الكنيسة بالعالم كلو، المنقسمة عَ ذاتا:
– أرثوذكس.
– كاتوليك.
– موارنة.
– أرمن.
– سريان.
تشكيلة عدائية لبعضا..
أرجوك يسوع، وحّد بنعمتك قلوب المسؤولين بهالكنائس. تيعطونا نعمة، انو نكون معك. ويعلمونا أبانا وحدي، ونصليها ونلتجي الك. ويقدسو ايماننا. حتى يكون ايماننا فيك ايمان ثابت. - منوضع قدامك يا رب،
كل الموجوعين ، وكل المتروكين، وكل المعذبين…. حررهم يا رب - منوضع قدامك يا رب، وطننا لبنان، المجروح والموجوع، والمتألم..
ضمّد جروحاتو يا رب بنعمتك..
وبسلمك اليوم الجيش اللبناني، حفظو وامنع عنو كل شر…
- منوضع قدامك يا رب، الإنسان الرافض نعمتك، المس قلبو، وردّو..
منوضع قدامك يا رب، كل انسان، بدمّر خيو الإنسان، المس قلبو يا رب
منصلّي اليوم عَ نية راحة مواتانا، نطلب من يسوع يرحمن، ويرحم كل انسان بحاجة لرحمتو.. خاصة اللي هوي عايش عَ الأرض، وميّت عن محبة الرب.. آمين.
رصد Agoraleaks.com
