الأب مروان خوري: عند المسيحي مفاهيم غلط عن الصلاة… (Audio)

– الصلا مش رتبة ولا فريضة ولا قصاص…

عظة الراهب المريمي الأب مروان خوري وموضوعها الصلاة: (24 تموز 2017 – الجزء 1)

• هالكلمة يللي العدرا ما فتئت ترددها، منذ 38 سنة بظهوراتها بمديوغوريه،
  أصلاً ما غابت عن كلاما طيلة الأمكنة اللي ظهرت فيها
• مفهوم الصلا أوقات يمكن يكون خاطئ عند المسيحي،
  ميشان هيك لازم نستلهم الروح، هو الذي سيُصلي فينا…
  أكتر من انو نحط بالصلا إرادتنا، لازم إرادة الرب هيي المتكلمة. والممجدّة بداخلنا..
• ما بولس بقول: “الروح يصلي فينا بأناة لا توصف“،
  اجمل صلا عند الله وأقوى صلا، وقت منصلّي بالروح القدس

هناك مفاهيم خاطئة عند المسيحي، عن الصلا، جمعتا بأربعة، ويمكن يكون في أكتر.

1- الصلا مش “فريضة”

• في اشخاص بيفتكرو الصلا فرض، ويوم اللي ما بصلي كسرت فرضي.
  كلمات منسمعن أوقات، من خلال لقائنا مع الناس.
  أبونا صليّت المسبحة وما قدرت كفيتا.. أو عاملي تساعوية وغبت نهار..
• الصلا بالنسبة لإلن، فرض ولازم تممّو والاّ انكسرت. الله ما رح يستجيب…
  بتتذكرو نص الإنجيل، اللي بقول: عشار وفريسي، طلعو تنيناتن يصلو بالهيكل.
  الفريسي كيف صلّى؟
  بقلو اشكرك يا رب، بدفع الجزية، بأدي الضريبة؟ بصلّي 5 مرات بالنهار
  افتكرانو عندي فرض ، بتمّمو ومعناتا: انا بشكرك، وانت عَ الأكيد بتحبني، وأنا كتير مدلّل عندك
  لكن العشار، استجيبت صلاته، والفريسيي لاق…
• شو بيقهر نشوف بمزاراتنا، وقدام بواب كنايسنا، صلوات بدها تكتبها 50 مرة، وإذا ما كتبتا غضب السما بينزل عليك. شو ربنا عاطيك “قصاص”..!!

2- الصلا مش حب ظهور

• بقول يسوع بالإنجيل: متى أردت أن تُصلي، أدخل الى مخدعك وصلّي الى أبيك في الخفية، وأبيك الذي يرى في الخفية، هو يُجازيك، لا تكونوا كالمرائين، الين يحبون الظهور في المجامع، يطوّلون أهدبتهم ليمجدهم الناس..
• نحنا أوقات منوقع فيها، منحبّ نتباهى..
  
  مرة أحد الكهنة، كان عندو بس بدو يعمل إحتفال، أو زياح، بدّو يحضرو بدقة، وما بدو غلطة يصير فيه… بعيد القربان، يفلش الورد، ويزبط الشمامسة، والخدم كيف بدّو يمشي، وقديه في مسافة بين شخص وشخص…. وهيدا بيحمل الشمعة بهالطول.. هالقد يفوت بدقة.
  كان محضر كلشي للزياح، ومنظّم، وممنوع حدا يحكيه، بطل عليه الشماس، وبقلو بدي احكيك كلمة أبونا.. ومع شريعة بيناتن واصرار الشماس، بقلو: شو بدك؟؟؟ بقلو: أبونا حامل الشعاع، وناسي القربانة..!!
  الزياح كلو كرمالو.. اللي عم تزيّح كرمالو ناسيه، ومهتم بكل المظاهر..

3- الصلا مش طقس

• الناس بيعتبرو الصلا طقس، رتبة.
  أبونا شو في صلا لهيدا المرض. أو شو بصلّي حتى احمي الولاد..
  النص والعبارات كأنوهيّي اللي بتخلي الله يستجيب.
• عنا مشاهد كتير حلوة بالإنجيل، بتعلمنا دون وعظ، وكيف منصلّي للرب.
  أجمل مشهد صلا ومنو طقس، ورتبة. (الكنيسة عَ الأكيد حطّت رتبْ ليتورجية، لَ تنظّم صلاة جماعة)
  بس عم تخاطب ربّك، كون حرّ، حتى بالكلمات ما تتقيّد…
  1- تفرّجو على “المنزوفة”
  
  ما حكيتْ ورا كلمة، وأخدت اللي بدها ياه… بعدان جبرها الرب تحكي..
  صلا صامتة، وراحت بتأمل بينا وبين نفسا، وحاطا براسا، إنو أنا إذا بدق إيدي عَ توبو باخود اللي بدّي ياه… راحت بحب وايمان، وقشطتو اللي بدها ياه. سأل: من لمسني؟؟؟ المنزوفة ما استعملت عبارات. ولا نص.
  2- صلاة الأعمى، حتى ما قلو شو بدّو؟
  صار يصرّخ: ارحمني… وكانت كفيلة لأنو نابعة من قلبو، ان تستوقف صرختو الرب، ويجيّد لعندو رغم العجقة المُحاط فيها، ويقلو شو بدك اعملّك؟؟؟

4- الصلا مش ضريبة

• أبونا عم صلّي.. ليه عم تجيني الضربات؟
  انا بصلّي… ليه عم بتعرض للمحن، وللمشاكل؟ ليه في معاكسات!!
• مش لأنو بتصلّي، الرب يدفع ذنوبك.
  أصاً صليّت أو ما صليّت: الرب دفع ذنوبك. منو ناطرو حتى تصلي، حتى يدفع حق خطاياك.
• ناطرك تتحبو، تتبني شراكة معو..
  الصلا هي التعبير عن العلاقة اللي بتربطك بالرب

كيف منصلّي

• الصلا هيي علاقة مستمرة.
  مش بس تجي عَ الكنيسة عم تصلّي.
  يا ام، إنتي وعم تخدمي ولادك بالبيت، انتي عم تصلي، كوني بشراكة مع الرب، كبي كلمتين، راضي كيف عم ربّي… إنتي وعم تطبخي، كبّي كلمة عند الرب، يا رب هالطبخة عم إعملا، لأني بحب عيلتي، أو لأني بحب لجايين لعندي.
• بقول يسوع بالإنجيل، بقولولو الرسل علمنّا أن نصلّي: (هيك دايماً ذكرو ليسوع، علمّني أن اصلي)
  بالصلا عم اخلك أمور الأرض بأمور السما.. ومش عارف شو خيري من شرّي
  بقول يسوع:
  1- إسألو تعطوا
  2- أطلبوا تجدوا
  3- إقرعوا يُفتح لكم
• من يسأل؟ ومن يستعطي؟
  الفقير.. ليه بدو ياك الرب أن تسأل؟ بدو منك تقرّ انك انتا عايزو، وانت بلاه فقير.
  أصلاً قبل ما تسأل، بيعرف شو بدّك؟ بس بدو ياك تقرّ بالسؤال، وتقول: أنا بدونك ما بسوى شي…
  الذي لا يصلّي هو فقير، وفارغ
• اطلبوا تجدوا… يعني نحنا مضيعين شي مهم، بالصلا عم تنبش عشي فقدتو.
  قبل ما تطلب بصلاتك انك تسدّ عوزك الأرضي، سدّ اللي خسرتو من فوق… مجدك السماوي. بنوتك لَ الله.
  نحنا بالصلا، مدعويين نستعيد بنوتنا، ليكون بيّنا السماوي.
  الأبانا، كيف قسمها يسوع؟
  – اقرار بأبوته أولاً
  – أعطنا خبزا ثانياً ، إغفر لنا…
  – لتكن مشيئتك فيي،
  بعدان طلوب يزبطلك صحتك
  اطلبوا تجدوا، نطلب مشيئتو بالصلا، لنجد أنفسنا…
• اقرعوا يُفتح لكم… نحنا بعزلة ومزروبين بالعالم، بالصلا مندقّ عَ باب السما، وسيفتك لم مجد السما…

الصلاة القلبية

• شو بقلنا الرب: من منكم إذا سأله ابنه رغيفاً يُعطيه حجراً،
  الرغيف علامة الحياة، والحجر سدّو فيه القبر تبع يسوع كعلامة للموت،
  الصلا تمنع عنك الموت، والموت عندو أشكال وأوجه متعددة
• من منكم إذا سأله إبنه رغيفاً أعطاه حجراً، أو سأله سمكة يعطيه حيّة!!!
  بالصلا الآب سيبهك أبنه…. الرب بدّو يرجعلك النعمة، من بعد ما ابليس مدّك بسمّ الخطية..

بالصلاة، الرب سيُعطيك الحياة، والفرح والمجد..

رصد Agoraleaks.com