مسعود الأشقر: نؤمن بلبنان الرسالة، والشعب المسيحي بالشرق “لو مويوتو” لأنو بآمن بالقيامة.. (Audio)

– يعترف الجميع أننا  لم ندافع فقط عن المسيحيين بل عن كل لبنان

كلمة أمين عام الإتحاد من أجل لبنان مسعود الأشقر في احتفال ذكرى الشهداء السريان:

• ما فينا نحكي عن شهدا السريان وشهدا “سيفو” هالذكرى الأليمة،
  من دون ما نحكي عن شهدائنا المسيحيين بالشرق، من:
  – أرمن – كلدان – أشوريين – موارنة – أرثوذكس – كاتوليك – أقباط.. يللي نخلطو دماتن بعضن ببعض، واستشهدو فقط لأنهم مسيحيين
• هيدا مخطط تهجير المسيحيين منو من اليوم،
  مبلش من مئات السنين. واللي عم يصير هلق بالعراق، وسورية ومصر، منو الا تكملة اللي عملو فينا العثمانيين، من حوالي 100 سنة بالمنطقة، من تهجير، ومن دبح، وقتل، وخطف مطارنة، وقتل رجال الدين، واستباحة النساء، ودفع جزية، وسرقة الأراضي…
  
• هيدا التاريخ عم يتكرّر بغير زمان ومكان.
  لولا وقتا، العدالة الدولية حاسبتْ يللي خططو ونظمو ونفذو المجازر بحق شعوبنا، متل جمال باشا السفاح (بيللي عملو بلبنان والمنطقة) وطلعت باشا، وحلمي باشا، سيئي الذكر.. لكن العدالة الدولية ما عملتْ شي
• لو العدالة بوقتا حاسبتن، ماكان رجع تكرّر اللي صار بشعوبنا، ولا تركيا كانت لعبت هالدور السيء بالمنطقة اليوم، بدعما للإرهاب، وللمجموعات المتطرفة
• كلنا منعرف انو داعش والنصرة وغيرن، ما اجو هيك؟؟؟
  
  
  كلنا منعرف انو بدن تميل، وبدن طريق، وبدن لوجستية حتى يفوتو عَ سورية والعراق؟؟

عَ كل حال 

• هتلر قبل ما يعمل المحرقة بالحرب العالمية التانية، بقولولو: بكرا المجتمع العالمي رح يقوم القيامة عليك؟
  قلن: مينب يحكي بابادة مليون نص أرمني؟؟
• طالما ما في محاسبة، طالما التاريخ بدّو يرجع يتكرّر

الحرب اللبنانية

• الحرب اللبنانية، هيي جزء من تهجيرالمسيحيين من المنطقة،
  بأول الحرب، سمة 1975، وقت وقفنا وحدنا كمسيحيين (وحدنا) بوج التوطين، ربحنا، ومنعنا التوطين، واليوم كل اللبنايين صارو ضدّ التوطينن وعم يعطونا حق، ويار ريت فريق من اللبنانيين وقف معنا وقتا، كان وفّر علينا وعَ لبنان ويلات.
  
• ببداية الحرب، الكل بقول: انو نحنا ما دافعنا بس عن المسيحيين، دافعنا عن كل لبنان.
  تنحكي عن الحرب اللبنانية، بدي احكي عن السريان، وعن نضالن الكبير، ودفعو ضريبة الدم، واستشهدو بالمئات بلبنان، تيدافعوعن هالوطن، يللي حضنن.

شهدا السريان

• في كتير منهم ما كان معن تذكرة لبنانية، بس آمنوا معنا أنو لبنان ملجأ لكل المسيحيين، ولغيرالمسيحيين المضطهدين بالمنطقة،
  بس أكترية الشباب ما أخدت حقها، والأغلب منهم صار بالسويد، والبلاد الإسكندنافية، وبغير أمكنة..
• نحنا بس نحكي عن شهدائنا، دايماً منفكّر من شهدا السريان:
  – الشهيد “ايلي بانو” من فرقة (BJ)
  – من الشهدا اللي كانو معي، بوحدات دفاع بيروت:
  1- الشهيد جريس ايليا
  
  2- الشهيد “الياس حنا”.. وغيرن الكتار من أبطال المقاومة اللبنانية
  

المشكلة

• المشكلة مع داعش، والنصرة، والعثمانيين الجدد، مفكرينا انو نحنا، جينا من الغرب على لبنان، أو جينا مع الحملات الصليبية..
• نحنا أساس هذا المنطقة،
  نحنا جدودنا مدفونين بهالمنطقة، من ألوف السنين، إذا ما بيعرفو تاريخ:
  – الأقباط أساس مصر
  – الكلدان أساس العراق
  – السريان أساس تركيا
  – أوّل مملكة مسيحية بالعالم، هيي مملكة الأرمن بكيليكيا
  
• المسيحيين اللبنانيين هني أساس تأسيس لبنان.
• مهد المسيحية (المسيح) طلع من فلسطين وهالمنطقة.
  من 2000 سنة، وما في جيل عنّا ما بيدفع ضريبة الدم، دفاعاً عن معتقداته الدينية، وعن حريتو،
  وطالما في تطرّفن وفي ارهاب، وكل مدّة بغذوّه، لذات الهدف، طالما الجلجلة لمسيحيي الشرق رح تكمّل، ورح تضل مكللّة بالشوك والدم..

أسئلة

• بسأل حالي أوقات، وما حدن بجاوبني عنن.
  ليش المسيحيين السوريين والعراقيين، وقت إجو عَ لبنان، دغري تسهلّت أمورن، حتى يروحو عَ الغرب!
  – بدّن يد عاملة؟
  – بدن يفضو المسيحيين من المنطقة!
  ليش الموقف الخجول من شركائنا المسلمين بالوطن، وبالمنطقة، تجاه اللي عم يصير بالمسيحيين…؟
  ليش هالصمت من بلدان الغرب، يللي بنادو بالحرية، والديمقراطية وحقوق الإنسان…؟ والأمركان بقولولنا، انو من الحرب العالمية التانية منمشي بعقيدة “الرئيس ترومن” اللي بتقول: نحنا كبلد نتدخل بأي منطقة لمنع الدبح والتهجير… وتبيّن انو بتطبّق استنسابياً متل ما بقول المثل اللبناني، “ناس بسمنة، وناس بزيت”.. القصة حسب مصالح الدول الكبرى..

الشراكة

• نحنا كمسيحيين، قد ما يعملو، نحنا باقيين هون..
  بعد ما فهمو إنو شو ما عملو على ميات السنين، نحنا باقيين هون.
  اليوم نحنا بلبنان بعد فترة طويلة من التهميش، عم يرجع حقنا، نحنا ما بدنا ناخود حق غيرنا بالوطن، بس بدنا حقنا يكون كامل
• نحنا منآمن مع شركائنا بالوطن بلبنان 10452 كلم2 ،
  منآمن بلبنان الرسالة
  منآمن بالشراكة
  منأمن بلبنان لإلنا ولغيرنا.. وحقنا يكون معنا..
• على مرّ الزمن، مشروع كيسنجر يللي كان بدّو يوطّن الفلسطينيي عنا، وياخدنا متلي لوين؟؟
  – التوطين
  – الإحتلالات على اشكالها (السوري والإسرائيلي، وغيرو..)
  – البواخر يللي جابوهم تنفلّ من هون، كلو ما نجح معن.. وما رح ينجحو..
• تاريخنا بيشهدن ونضالنا بيشهد، نحنا مكملين بالسياسة وبالمجتمع، تنحافظ على حرياتنا، وعلى معتقداتنا…
  
  ومئات الألوف من الشهداء، وقسم منن من السريان، دمن ما رح يروح ضيعان..
  منوعدن، متل ما حملنا الشعلة قبل، رح نضل طالما الله بيعطينا عمر نحمل الشعلة ونكمّل دفاعاً عن وجودنا الحرّ بهالمنطقة
• نحنا عنا بالكنيسة المارونية (الطقس السرياني)
  ومنقول “لو مويوتو” (الذي لا يموت) نحنا الشعب المسيحي، شعب ما بموت، لأنو منآمن بالقيامة….
• دورنا نوقف حدّ الجيش اللبناني، بمعركتو ضدّ الإرهاب، لأنو هيدا الإرهاب اللي عم نشوفو اليوم، (داعش والنصرة..) هوي ذاتو كان قبل، وكان عَ ايام تركيا الفتاة، وعَ ايام العثمانيين، والعثمانيين الجدد.. بغيّر اسمو وشكلو، بس الهدف هوي ذاتو…
• دعمنا للجيش مطلق، والله يحمي ولادنا بالجيش، والله يحمي لبنان.

رصد Agoraleaks.com