طلال الدويهي: المسيحي عم يدفع ضريبة التفنيص والتفشيخ، ورؤسا البلديات بقشع الحال كلن متل ترامب.. (Audio)

– شقق للمسيحيين بِ 50 الف شهرياً.. !! 
– دود الخل منّو وفيه.. ومشروع الدبية عم يغيّر الديمغرافيا.. وحكينا بري ومتفهّم…
– في شغل، لحصر المسيحيي بالمنطقة الشرقية.. (التفاصيل)

مقتطف من حديث رئيس حركة الأرض طلال الدويهي لقناة الـ”OTV”:

عن استعادة عقارات مصادرة اثناء الحرب لمسيحيين، بأطراف منطقة “المريجة” لجهة الحدث والليلكي..

• الفضل لجهود الوزير طلال أرسلان،
  تأمّن المال، وبلشت عملية الصرف، أوّل 100 دفعة تمّت.
  هيدا الموضوع صرلو فترة عم يتابعوه نواب المنطقة، وبالأخص النائب حكمت ديب.
• هلق عَ أيام الوزير أرسلان، افرجو عن الأموال. وعم تندفع التعويضات.
  في 100 حدا قبض، والعدد هوي بحدود 600 – 700

مبادرة هامة

• بلدية المريجة بالتعاون مع الوقف الماروني (مطرانية بيروت)، قدمت شقفة أرض، والبلدية عملت مباني (42 شقة) بدها تأجرهم لمسيحيين بـ50 الف ل. ل. شهرياً. 600 الف ليرة بالسنة أيجار.

الوقف الذري

• نحكي مش بعاطفة، وفي قضاء بالدق.
  القصة بتوقف عَ ضمير القاضي. واللي عم ينظر فيه دائماً رئيس مجلس القضاء الأعلى القاضي جان فهد.
  القصة لازم ينعملا حدّ. عم تفتح قابلية كتير من الناس على موضوع الوقف الذري، وكل واحد عم يفتش عن دفاتر جدّو القديمي.. وكلو عم يروح للبيع، مش لإستثمارات
• مفترض الصرخة تعلا. نجنا من دون الإعلام بيتعطّل شغلنا.
  نحنا مش هواة وجاهة. في عنا مشاكل جذرية عم تضرب المجتمع، بجذورو، إذا ما الإعلام ما بضوي عليها، وما بيوقف الى جانبنا، ما منقدر نتصدالها بالشكل الصحيح
• وقت الكنيسة بتبيع 75 عقار، شو بدي قول للناس البقايا، وهيدا الشي برسم الملكيين الكاتوليك، يللي هني من أهم الناس بالبلد

التفشيخ

• نحنا عايشين بجو لا بقا مرتبط بنذر، ولا حدا مرتبط بأخلاق،
  المهم الدولار، وتعباية الجيبي. ومش فرقانة معو شو بصير..

التعليم

• فيك تعمل شي، بس ما فيك ما تعلّم. وما يُسمّى بالمدارس الكاتوليكية لازم يسموها المدارس الخاصة، لأنو فقدت روحانية الرسالة، زعلو مني كتير. وانا صديقي كتير الأب بطرس عازار، وبجلو وبحترمو، ورجال آدمي جداً، وكان الو صولات وجولات معنا بموضوع الأراضي..
• الواقع بقصص المدارس الخاصة، عملياُ بس تبلش تفكر بمؤسسة،
  اول ما بتطلقها بتكون عم تعمل رسالة للثقافة،
  بعدان بتصير تعمل حسابات قديش بتربح، و:
  – قديه بدّك تتنمى المدرسة،
  – وتعمل جدوى اقتصادي للسنة الجايي،
  – وتعمّر مبنى تاني، ومبنى تالت،
  ومصاريف حتى تعطي فخامة حتى تشجّع الأهل.. وأنّو المرأة تقعد ببيتا وتقول: أنا إبني بالمدرسة الفلانية، وجارتها تقلا: نقلتو عَ مدرسة تانية لأنو هونيك Class، فهيدا الأمر مبلش عند المسيحيين وقوي…
• عملية التفنيص والتفشيخ، عم ندفع ثمنها بالجملة بالأراضي، وبحياتنا الإجتماعية، والتربوية.
  ما بيحكي ابنو عربي، بيحكيه فرنسي.. وبعدان بسبّ بالعربي، وبيضحكلو، ثقافة جديدي عم نبلش ننتزع شوي ورا شوي، وما بعرف وين بدنا نوصل..!

ترامب

• أسلوب الرئيس ترامب تعودنا عليه.
  بيطلع بالناس من فوق. انو هوي رئيس جمهورية أميركا
  نحنا هون مختار ما فيك تحكي معو… معليش إذا شاف حالو شوي الرئيس ترامب
• ترامب مبلش من عنا.
  – نسبة كبيري من رؤسا البلديات متل ترامب.
  – النواب حدّث ولا حرج.
  – الوزرا يا ستّار..
  إذا لقيت واحد منو متل ترامب، بتفتكر انو يمكن ساخن…

عن عمل حركة الأرض

• في 60% من الناس وعيتْ لمخاطر اللي عم تنادي حركة الأرض
  في 40 % هني السماسرة، ما فارقة معن. هني تجاّر الأخلاق، وبعدنا عم نتواجه معن
• في الشق القانوني، مسؤولة عنو مجلس النواب والحكومة.
  استرداد العقارات بسبب الأحداث بإيد غير أصحابها.. ولو ما الدولة تدفع المصاري كان الواقع تجسّد والناس تعودّت عَ الواقع الجديد…
• نحنا عم نسعى لإعادة براءة الذمة البلدية،
  وحق الشفعة اللي بسنة 1997 نشالو
  نحنا كحركة الأرض عملنا زيارة للرئيس بري، وحكينا معو بالموضوع وكان كتير متجاوب.
  في النائب حكمت ديب قدّ مشروع لبراءة ذمّة البلديات. والرئيس بري اضطلع عليه. ووعدنا بالمساعدة. والنائب أمل أبو زيد رح يقدّم فيما يختصّ حق الشفعة للإيجار…
• شوي ورا شوي عم تترسخ أفكارنا مش بس مع المسيحيين، مع المسلمين،
  التعاون لتعزيز العيش المشترك لأنو هيدا هدفنا.
  عم نقول ما بدنا نبيع حتى نضل موجودين. لأنو البيع بيعمل تهجير، وتغيير ديمغرافي، وسببو هوي لعبة المال. لأنو عم يحولو العقارات الى استثمارات، وبورصة عقارية.
• اخطر شي على اللعبة العقارية بالبلد، هوي الإقطاع العقاري.
  في اقطاع سياسي، واقطاع مالي، وفي اقطاع ديني.
  الإقطاع العقاري اللي عم نتواجه معو. مش مع ناس عندا 700 متر2 او 1000 متر2 ، اضطرت تبيع وعاملين منا قضية.. انتا عندك 5 مليون متر2 وبتملك ضِيَع، البيع فيها مشكلة، ونموذج:
  – الدبية
  – الدلهمية
  تغيرو معالمها، والجو تغيّر، والتغيير الديمغرافي حاصل. واللي مش مؤمن انو عم تتغير ديمغرافياً، ينزل ويشوف كيف بلشّت ووين وصلتْ.
• في مشروع نابع عَ أساس شركة دلهمية العقارية 2% عامل استثمار،
  حولوها اللي اشتريوها، الى شركة تانية سموها “مديار” ورفعو من 2% الى 40% عامل استثمار، ومجلس الوزرا وافق بالتعاون مع بلدية الدبية.
• دود الخلْ منّو وفيه.
  تَ يرفعو عامل استثمار، واراضيهم ويبيعون، وبعدان يصفّو قاعدين، متل ما يُسمّى المنطقة الشرقية.
  اليوم بروح يبيع بالأطراف اللبنانية، 400 الف متر2 وبيجي يشتري شقة بجونية، وهيدا الشي جريمة عم تُرتكب، وبقلك انا ولادي عم يشتغلو هون. حافظ على ارضك، وعَ جذورك.. حدا ببيع جذورو!
  بتقلو: انتا من وين..؟
  بتصير قاعد بمنطقة لا فيك تنتخب فيها، ولا فيك تساهم ببلديتها.. الناس ما عم تفكّر الاّ كيف مصلحتا، وكيف بدها تجمّع مصاري.
  يكرا بروح البلد، وبعدان بصير ينقو..
  رئيس الجمهورية ما عمل، والوزير الفلاني ما عمل.. والنايب الفلاني ما عمل… بلش بحالك اول شي…

رصد Agoraleaks.com