الأب مروان خوري: الحب ما بدّو لاهوت.. متل المتزوجين يوم اللي تعرفو عَ بعض، ونغرمو درسو هالشي بمدرسة وجامعة..! (Audio)

– النعمة ما بتجي بالحكي، وبالتمني، وبالعواطف.. بالصلا والحكمة

عظة الراهب المريمي الأب مروان خوري بعيد مار الياس الحي – قرنايل: (19 تموز 2017)

• بأعياد القديسين أحبائي، القديس محطة الرب بحطّو على دربي،حتى إتزوّد منا، وكفّي بمشواري صوبو..
  كل قديس عندو زوادة خاصة فيه، تميّز فيا بحياتو،
  متل ما كل أكلة عندا النكهة تبعا، وعندا الفيتامين اللي بغذّي الجسد، ومع كذا أكلة جسمي بيتحلّى بالصحة المنيحة،
  بكل نهار في قديس، وبكل مناسبة في عيد شفيع لرعايانا،
  وهودي مش بالصدفة الله حطن.. هودي فيتامينات روحية، ومنتعظ ونتمثّل من حياتن:
  كيف عاشو، وكيف حبو الرب.. حتى نحنا بدورنا نكون على مثالن

لا يمكن شراءه

• مرة من الأيام أحد الأشخاص بحب كتير الورد والطبيعة،
  بشوف بواجهة محل، حاطط صاحب المحل أجمل الشتول، وبأبهى الهندسة
  ندَوَخْ، وقفْ مسحور قدام الواجهة…
  وفات لعند صاحب المحل وقلو:
  – بدفعلك قد ما بدّك، بدي اشتري كلشي عندك بهالواجهة،
  بيضحك صاحب المحل، بقلو:
  – بتأسف قلك، نحنا هون منبيع البزر، هودي الحلوين اللي شايفن، هودي انتا بدّك تتعب وتزرعن، وتخلين يصيرو حلوين
• القداسة بذرة الرب عطاك ياها، وبكل قلب في بذرة قداسة،
  القديسين هني عرفو يسقوها هالبذرة، وعرفو يعتنو فيا، فرخّت قداسة حياتن
• يوم أنا عم بشتغل غير مطرح،
  بتعرفو شو مصيبتنا بالحياة، ما منعرف نعطي القيمة للجوهر، والقيم الأقلّ للقشور: قالبينا…
  عاطيين القيمة لقشور الدنيْ، وسطحيتا، والجوهر جاعلينو هامش…

القياس

• يمكن عنا فكرة انو القداسة بدي اعمل متل مار الياس ومار شربل، اهرب عَ مغارة، واتنسّك..
  ولما بقيس ارادتي عَ ارادتن، بشوف مش باستطاعتي اعمل متلن..
  هيدا غلط هيدا التفكير، القداسة مش انو قلّد القديس..
  كل انسان بحد ذاتو، هوي حالة. وعالم خاص قدام الله
  مش مطلوب مني كون مار شربل، ولا مار الياس.
  انا مطلوب مني كون، أبونا مروان… بس أبونا مروان القديس..
• متل ما مار شربل بشخصيتو، ودعوتو الخاصة كان قديس.
  ميشان هيك مطلوب مني “قعدة” مع الرب، حتى اعرف شو دعوتي بهالدني.
  كلشي بهالدني، عدى الخطية هوي دعوة للقداسة:
  – الزواج دعوة للقداسة
  – العمل بضمير دعوة للقداسة
  بمطرح بالإنجيل ببدايتو، بيوصف يسوع: رجع مع مار يوسف ومريم الى الناصرة، وكان الطفل ينمو:
  1- كان ينمو بالقامة
  2- كان ينمو بالنعمة
  3 – كان ينمو بالحكمة.. عند الله وعند الناس
  درب القداسة هيي بالنمو بهالتلات أبعاد بحياتنا

النمو بالقامة

• أعطي ما للجسد حقو،
  مش غلط انو لبسو للجسد تياب حلوة. مش شي ضدّ القداسة هيدي.
  مش غلط انو طعميه، وشبعو.
  مش غلط انو نَضفو وإعتني فيه..
  وأني ريحو بمطرح..
  الغلط انو عيش هودي فقط، انمو بالقامة والغي هوديك التنين من حياتي.
• انساننا اليوم أحبائي، عايش فقط لجسدو.
  انسان عايش فقط حتى يرضي الجسد… والجسد شحطْ الله، وما عاد الو الله مطرح بحياتي.
  ما عاد عندي وقت لالو.. لأن كل الوقت صار لجسدي،
  بوعا من الصبح لعشية:
  – شو بدي آكول؟
  – شو بدي اشتغل؟
  – شو بدي البس؟
  – وين بدّي روح؟ وين بدّي اسهر؟
  كلها برامج جسدية.. مش غلط. الرب كان يِنْعَزَمْ على مآدب، والرب قال لرسلو هلمو “نرتاح قليلاً.
  
  كان يسهر مع رسلو، والتقليد المسيحي، بقول: كان ينكّت مع رسلو. وكان يضحكْ…
  كان للمسيح عندو حياة الاجتماعية.
  دُعي الى العرس بقانا الجليل، ودُعي الى العشاء عند حماة بطرس. ودُعي الى الغداء عند سمعان الفريسي.. ولبّى هالدعوات.
• يسوع كان كائن إجتماعي.. كرّم جسدو.. لكن: ما ننسى البُعدين الآخيرين

النمو بالنعمة

•  النعمة هيي حياة الصلا،
  حياتنا اليوم فيا لعنة.. ما فيا بركة.
  نعمة الله غايبي عنا. لأنو انساننا اليوم بطّل يصلّي.. ما بصلّي الاّ عالمناسبات.
  ما عادت الصلا محطة أساسية بحياتي… ميشان هيك حياتي بلا بركة.
  وصرت ضعيف، وصار الشرير بيقدر يتمرجل عليّي بالتجارب، وبالخطايا، وبيغلبني.
  نعمة الله قادرة تخليك تصير بطل متل ايليا،
  نعمة الله قادرة تخليك تصير، إنسان تحلّق بالقداسة… وسيّد بالفضيلة، والشر يكون تحت اقدامك،
  لكن هالنعمة ما بتجي بالحكي.. ولا بالتمني، ولا بالعواطف،
  هالنعمة بتجي بموقف صريح بتاخدو قدام الرب، تلتزم بعلاقة واضحة وصريحة يومية بينك وبينو…
  كما الزوج وزوجتو. ما في الزوج يغيب عن مرتو، ولا الزوجة تغيب عن زوجا..
  كل يوم لازم يقعدو يحكو، ونهار اللي ما بيعملو هالشي، قلب الزوج بصير برا، وقلب الزوجة كذلك، والحب بينطفي، والنعمة بتروح من الزواج
• انا اللي بيربطني مع الله هوي ذاتو اللي بيربط العريس بعروستو،
  هيك يسوع دعانا بالإنجيل، هوي العريس وأنا عروستو….
  وما تتصورو الصلا شو عم نتحارب فيا بحياتنا، لأنو الشرير بيعرف بالصلا بتستردّ نعمة الله،
  وبنعمة الله بتقدر تستردّ كلشي نهبو منك ابليس.
  
  – الفرح
  – السلام
  – البركة
  – الصبر
  – القوة
  نهبن منك ابليس، وصرت أعزل ضعيف.. صرت حزين. بطّلأ في سلام بقلبك، صرت غضوب. وحقود…
• الصلا ما بدها لاهوت.
  ما بدها درس جامعة… بيناتنا اللي مزوجين وحاضرين بالكنيسة، يوم اللي تعرفو عَ بعضن، ونغرمو، درسو هالشي بمدرسة، او جامعة!!!
  الحب شي بينبع من القلب، طبّق هالنظرية مع الرب… وشوف كيف بتصير أكبر لاهوتي من خلال صلاتك..
• مصيبتنا منضجر منّو. نتفة صغيري بس نطوّل معو، منحوص… ومنعقد ساعات قدام التلفزيون، ما منزهق.
  بس نسمع الرب دقيقتين تلاتي، منحوص… لأنو قلبنا ما بحب الله.
  لأن هالرغبة نحو الله أخد محلها إشيا كتيري، وشحطتْ رغبة لله منّك.
  ميشان هيك، عم قلك عبادة الجسد خطرة
• مار فرنسيس
  مهضوم مار فرنسيس، قد ما تعبو لجسدو بأصوام،
  وهلكو باماتات، بس إجا تيموت، كان عَ فراش النزاع..
  بيطلّع ع جسدو، بشوفو هزيل، ونحيف.. كان يسميه خيّي الحمار،
  قلو يا خيي الحمار، بعتذر منك، تعبتك فيا هالحياة. كارَيْتْ عليك كتير. بس ربحتك.
  جسدو اليوم صرنا منترجى ناخود حفنة أو شقفة منو، حتى تكون بركة وتعمل عجايب…
• الجسد إذا بتخضعو للرب، بصير مبعث بركة، حتى بعد الموت.
  شريعة الله غير شريعة الحياة.
  شريعة الحياة بتقوم على النقيض. انك تقتل الله، وتمجّد جسدك….
  شريعة الله بتقول: من يُحبب نفسه يُهلكها. ومن أهلك نفسه في سبيل الملكوت يجدها
• ما تخاف انك تقهرو شوي للجسد، بتربحو بالآخرة…

النمو بالحكمة

• أهلنا اليوم غايتن يثقفونا بثقافة هالأرض. ويحملونا اكبر شهادات بعلوم هالدنيْ،
  لما منوصل شو منعرف عن الله، متل ما كان يقول سعيد عقل: اللبناني دكتور بكلشي وحمار بِ الله،
  بعتذر على هالتعبير، بس هيدي نظرية حقيقة
• منجتهد نحمل ولادنا أعلى العلوم، ومنفتخر بابني معو شهادة. وابني متخصّص..
  لكن شو منعرف عن الله.
  بقول مار اغسطينوس، رأس الحكمة مخافة الله
  
  الحكمة معناتا المعرفة
  اكبر عارف بهالدني، هوي اللي بيعرف الله شو بدو منو. وبيعمل باردة الله.
  هيدا اكبر ذكي… واكبر عالمْ.

الأهل بالمدرسة (مثل)

• أنا بعلّم تعليم ديني، بمدرسة اللويزة،
  بتعرفو ببحر السنة، بيجمعنا الريّس كأساتذة مع الأهل، حتى كل إم وبيْ يراجع مع الإستاذ وضع ابنو بالمدرسة.
  قلتلو للريّس إنو أنا كون بالإجتماع، إنّو انا بعلّم تعليم ديني؟ قلي ايه، بركي حدا بدّو يسألك شي؟
  وقفت أنا مع الأساتذة، صارت هيدي الأم تركض عند أستاذ الـ”Math”. هيدي عند أستاذ الـ”Physique”. هيدي عند أستاذ الـ”Literature”… وانا متل “الجدبة” واقف، ما حدا بيجي لعندي.
• هونيك إم وصلتْ. قالتلي: أبونا عندي مشكلة مع ابني..
  إبني بطّل يصلّي.. هيدي الأم حكيمة.
  هيدي عرفتْ: إنو ابني إذا نجح بكل هوديك، وسقط بالصلا، أنا إبني بخسرو.
  هيدي إم عندا معرفة، شو انسان يخسر الله… هيدي درب القداسة
• مار شربل ما درس القداسة بالجامعات.
  مار شربل حط ثقتو بالرب، ونمّى عندو هالتلات اتجاهات، رغم انّو أول نعمة ما عطاها حقا، هلك جسدو.
  ولكن ابدع بهوديك التنين. كان لياليه يسهرن بالصلا، وكان الإنجيل ما يفارق ايديه.
  تثقف عند ربنا. وصلى كتير. وليكو شو صار. حربة مار شربل بترّد زواعق الشر عن بلدنا.
  لبنان طالما في متل مار شربل، ومتل رفقا. والحريديني، والأخ اسطفان، أكدو طيّب، هودي حمايتنا.
  
  لو الدني بدها تجي علينا، هودي زواعق بردو كل الشرور عن بلدنا…
  صلاتن ما ممكن يقدر الشر يغلبها.. هيدي قوة القداسة
• مار الياس عطاه الرب قوة وشجاعة، تحلى فيون، كان مميّز بالعهد القديم.
  لا بل خلّى الرب بالعهد الجديد، يثني على فضيلتو، وشبّه يوحنا الى إيليا.. لما يوحنا وقف قدام هيرودوس..
• أوعا تفكرو إنو في عدالة عند الله بتنطفي، أو إنسان بضيع حقو
  القديسين عند ربنا، هني صوتنا، وهنّي حقوقنا،
  وبالفعل بكل جرأة متل ما وقف يوحنا قدام هيرودوس، وقلو ما بحقلك، انو تاخود زوجة أخيك..
  وكيف كانت موت هيرودوس..!!
  اوعا تفكرو إنو عند الرب في حق بضيع؟
  القديسين هيدي شفاعتن. بردّو حقوقك، وأهم من هودي كلن، بردّو النفوس تكون بنت الملكوت.
• منصلّي ومنوضع الرعية وكل ابناءها والحاضرين، بين ايدين شفيعا “مار الياس”
  بليلة عيدو، انتو بتعرفو، اللي بيبقا معترف وبيتناول، بنال غفران كامل.
  ليلة عيد شفيع الرعية. كل اللي بيحضرو، وبقدسو بكنيستو، بنالو غفران كامل.
  هيدي نعمة ما لازم نخسرا.. منطلبا الليلة بندامة من قلبنا…

رصد Agoraleaks.com