Agoraleaks Agoraleaks
علّق الناشط في التيار الوطني الحر روبير مجدلاني على صفحته (Robert Majdalany) مستغرباً دور “النق” لبعض الأشخاص، كاتباً: بستغرب من الاشخاص اللي بلوموا الحاضر وبينسوا الماضي، بستغرب من اللي بقول: مرق 7 اشهر شو تغيّر؟ بحس تفكيرهم ومنطقهم وقف بزمن معين، زمن كرّه الشعب بالارض، ومحى الامل من القلوب..
بس الاحساس القديم بالبغض ما بِ برّر اليوم ظلم الموجودين..
الامر ما بيخفى ع حدا انو رئيس الجمهورية صلاحياته محدودة، بس في صلاحيات كمان موجودة، وانو التيار الوطني الحر هوي حزب العهد وحزب الرئيس..
من هالمنطلق بدي اسال، كيف ما صار شي؟
- تدشين معمل الجية اللي واقف صرلوا سنين وبعهدنا مشي، شو؟
- تدشين معمل الذوق اللي معطل صرلوا سنين واليوم بعهدنا مشي، شو؟
- مشروع سد القيسماني – بعبدا اللي واقف صرلوا سنين واليوم مشي، شو؟
- بناء جسر جل الديب اللي معرقل صرلوا سنين وبعهدنا مشي، شو؟
- مشروع توسيع اوتوستراد جونية الحلم اللي صرلوا سنين وبعهدنا تحقق، شو؟
- تطبيق الجنرال صلاحياته ومنع التمديد لسنين شو؟ ( وكان ممكن اليوم نعمل الانتخابات لولا طلب وزير الداخلية بفترة كبيرة لتحضيرها )
- امكانية انجاز خطة الكهرباء والحصول عليها 24 ساعة لولا المعرقلين، شو؟
- توقيع اول مرسوم استعادة الجنسية المطالب فيه من سنين وبعهدنا وقّع، شو؟
- انجاز التعيينات العسكرية اللي واقف صرلوا سنين وبعهدنا تم، شو؟
- اعطاء الغطاء السياسي للجيش اللبناني وتحقيق الانتصارات وافشال مخططات الارهاب شو؟
- اقرار قانون الانتخابات النسبي اللي معرقل ومعرقل من سنين وبعهدنا تحقّق، شو؟
هودي مطالب قسم منها شعبية وقسم سياسية وقسم اقتصادية وعسكرية، وفي غيرها كتير، والجايي اكبر واعظم، كل هودي والسلطة بالاسم ” بين ايدينا ” لان السلطة الحقيقية داخل مجلس النواب اللي بشرّع وبسنّ القوانين، وللاسف المجلس بعده هوي ذاته من 8 سنين يوم كنا عم نتحارب من الكل..
كل هودي ب 7 اشهر اللي خلالهم ما ضل حدا ما عرقل وما ضل حدا ما خبّص وما ضل حدا ما عوهر وشكّك وضلّل..
الدولة مهترية من 30 سنة، يمكن عهدنا كله ما نقدر نصلح كل اللي انكسر، بس بدل ما نلوم ونحكي بلا وعي وبلا منطق، يا ريت، وبمختلف انتمائاتنا الحزبية، منساعد الجنرال والتيار انو يجبروا 90% من اللي انكسر، لان اليوم بطّل فيه منافسة، المنافسة حُسمت، وانتصر اللي انتصر، اليوم امامنا مصير وطن، بيت الشعب هو امله الوحيد ت يرجع جمهورية..
انا مأكد انو الجنرال رح يعمل دولة، لان هو وعدنا، وما بحياته وعدنا وما وفي بوعده، بس ياريت بدل ما نلعب دور الحقد الاعمى، نلعب دور الداعم، لان الجنرال وحزب الجنرال وشعب الجنرال، عم يشتغلوا لكل الوطن، مش لفئة..
