باسيل من اقليم الخروب: سفير أجنبي سألني عن قانون الإنتخابات، إبتسمت وما جاوبتو وفهم.. (Audio)

– لما نضّيع البوصلة منطلّع بطارق الخطيب، منلاقيه مسيحي أكتر منا
– منسعى بالتيار الوطني الحرّ يكون بلبنان القوة الشيعية التالتة، والقوة السنية التانية

مقتطف من حديث الوزير جبران باسيل في إفطار التيار الوطني الحر في حصروت في إقليم الخروب: (14 حزيران 2017)

• منلتقى اليوم بالإقليم، بمناسبة رمضانية، ولكن باحتفال فينا نقول أنو وطني.
  اليوم أنجزنا كلنا سوا كلبنانيين حلم لبناني قديم، وقدرنا حققناه بظروف صعبة.
  بس أنجزناه جميعاً، بتوافق لبناني، وبالتسوية اللبنانية المعروفة
• أوّل مرة بتاريخنا بيعتمد لبنان النسبية، وهيدا بأسّس لمفهوم وطني تشاركي، بييشمل الجميع،
  ومنبثق من فكرة التوافق والديمقراطية التوافقية، وبيشعر الجميع انّو ممثّل

الإقليم

• هون بالإقليم المنطقة اللي عطيتْ الدولة خيرة ناسا.
  ضباط، واداريين، لدرجة انّو لما نحنا منكون عم نشتغل بالتعيينات،
  كيف بتسأل عن واحد.. آدمي. شاطر. نزيه. بس يقولولك من الإقليم يللا…
• هيدي هوي الإقليم، والإقليم الو عَ كللبنان.
  نحنا مديونين والدولة مديونة لأهلنا بالإقليم

طارق الخطيب

• اللي نعمل اليوم، هوي مدماك أساسي بمشروع بناء الدولة.
  نعمل مع ناس نحنا جاهدنا، واللي جاهدو معنا ناس من الإقليم
  وخينا طارق، شو فينا نقول…
  بدّي لخصها:
  أنو طارق لما منحسّ حالنا بالتعبير السياسي عم نضيّع البوصلة، منطلّع فيه بطرف عيوننا، بقلنا كفّو، ما تخافو
  لما منحكي عن حقوق المسيحيين، منلاقيه مسيحي أكتر منّا.. لأنو وطني
  والمسيحيين بالتيار الوطني الحرّ رح تلاقوهم سنّة أكتر من السنّة، لما منحكي عن حقوق السنّة، وحقوق أيّ طائفة تانية
  
• يمكن قدرنا نشتغل لنبني دولة، لنسعى نرفع الظام عن كل الناس
  نحنا اليوم بمرحلة جديدي،
  نجحنا بارادتنا الذاتية، ومش صحيح حدا اختار عنّا رئيس جمهوريتنا
  هيدا رئيس جمهورية صُنع في لبنان،
  هيدي حكومة صُنعت في لبنان
  هيدا قانون انتخاب صُنع في لبنان
• بدّي اعترفلكم وقلكم إنّو في فَرِدْ سفير أجنبي بالوزارة سألني عن قانون الإنتخابات، إبتسمتلو، وما جاوبتو، فهم عم قلّو: ما بيعنيك هيدا الموضوع. لأنو هيدا قانون نعمل بلبنان، وعم ينعمل بين اللبنانيين.
• هيدي علامة صحّة، انو السفراء الأجانب، ما يتدخلو بشؤوننا الداخلية،
  الاّ من باب الإستفسار والإطمئنان، لأنو هلق كمان مع خينا طارق مرقنا عَ مؤسسة الأيتام، ودار الأيتام الإسلامية، ومرقنا بذات الوقت عَ كنيسة السيدة ببلدتو بحصروت
• اللي بيعمل عيشنا الواحد، مش القوانين
  ولا الكلام عن العيش الواحد.
  هوي العيش الفعلي بين بعضنا بعض.
• انا بحمّلمسؤولية لأهلنا المسيحيين، بيت سعادة بحصروت، انو ما ينطرو هنّي، رئيس بلدية متل طارق، يعمرلن كنيسة، يشرفو هنّي يعمرو كنيستن، ويشرفو هنّي يحضرو القداس بكنيستن،
  متل ما بقول لأهلنا المسلمين بالبترون، بروح لعندن بطرابلس،
  بقلن، تفضلو رجعو عَ البترون
• انا بعتبر هيدي هيي اللبنانية الصافية، يللي منقدر نعيشا بشكل طبيعي،
  وتنعيشا بدنا نحسّ حالنا كلنا متساويين

قانون الإنتخاب

• لأنو اقريّنا القانون، بدّي اعترف انّو منّو كامل
  بدّو استكمال. ونحنا عم نعتمد مبدأ: خذْ وطالبْ
• هلق خلصت الجلسة بدنا نبلش نطالب، اليوم بدنا نطالب مجلس النواب، بانّو هيدا القانون في أخطاء بنيوية، وأخطاء تقنية،
  لا بدّ لمجلس النواب يعود الى مراجعة هيدا القانون، ويصحح الأخطاء
  الخطأ الأول: حرام نحرم المنتشرين بالعالم 5 سنين تَ ينقو نوابن
  ما دام اتفقنا، ليه بدنا نحسسن انو عم ندفعلن ياه “كمبيالة” مأخرّة، لصالح مين؟ وكرمال شو؟
  ما زال أخرّنا الانتخابات لأسباب تقنية، تنعمل البطاقة “المُمنغنطة”، وهيدا اصلاح حقيقي وكبير، ووفرو على البلد نقل للمواطنين نهار الإنتخابات، بتعفو قديه بتدفع المكنات الانتخابية ملايين الدولارات
  حرية الناس والمقترع، وحرية ضميرو، يقدر يصوّت وما حدا يكمشو كيف صوّت
  الخطأ التاني
• إقرار القانون كان لازم يبلّش عام 2005،
  لما حكينا بوقتا، طولو بالكم علينا كمْ شهر، تنعمل قانون انتخاب، وما نروح عَ قانون موروث مش منا، واسمو حاملو صاحبو
• هلق منيح إذا اختلفنا عَ اسم القانون.
  عَ القليلي اسم صاحبو لبناني.. واليوم اسمو وحيد “اسمو لبناني” ولكل اللبنانيين، بس بدّو استكمال لأنو مش طبيعي ما يكون في عتبة نجاح للمرشّح
• نحنا عم نعمل انتخاب بأمرين:
  النسبي ع اللوايح بالدوائر، بتحدّد كل جهة قديه نسبتا بالتمثيل
  الصوت التفضيلي، هوي تصويت شخص لنائب واحد بقلب القضاء
  ما منقدر نقبل واحد ينجح، لأنو حاملتو لايحتو، الصوت التفضيلي مفروض يكون عندو حدّ ادنى من التمثيل بطايفتو وبمجتمعو ومنطقتو

التيار الوطني الحرّ سيكون قوة شيعية وسنيّة

• نحنا وعم نقرّ قانون. الإصلاحات مش كاملة
  اعطى المسيحيين حقوقن بشكل مميّز بس مش كامل.
  نحنا كتيار تجرأنا نحنا وعم نطالب باستعادة الحقوق، والحقوق الكاملة بتكون بدولة مدنية
• طريق الدولة المدنية واضحة:
  – نعمل مجلس الشيوخ
  – اللامركزية الإدارية..
  وننتقل الى الى الدولة المدنية
• فور إقرار قانون الإنتخابي بالمجلس النيابي، بدنا نكمّل بعملية بناء الدولة المدنية
  ومنعتزّ نقول هيدا الشي بالإقليم، لأنو نحنا بالإقليم هون بالذات:
  في عنّا مش مناصرين. في عنا ملتزمين بالتيارالوطني الحرّ، وعنّا هيئات ومنسقين.
  يمكن الناس ما بتعرف انو طارق الخطيب، مش ابن اليوم بالتيار، عمود أساسي بالتيار.
  زهوي وكل رفقاتو..
• هودي الناس نحنا بشكل طبيعي منتشارك الهموم والحقوق ومنفكّر سوا، ما عنّا عقدة نحكي قدامن عن المسيحي، وما عندن عقدة يحكو قدامنا عن المسلم، لأنو منفهم بعضنا
• من أسبوعين استغرب البعض، كنا ببعلبك – الهرمل، قلنا: منطمح نكون التيار الشيعي التالت.
  وانا بقول اليوم، من إقليم الخروب، التيار الوطني الحر بيطمح يكون التيار السنّي التاني بلبنان.
  وهيدي النسبية رح تعطينا هيدي الفرصة،
  أنا بصارحكم، نحنا قابلين نخسر نواب، بـ(كسروان – جبيل – المتن – جزين وبكل المناطق) تنربح بالشوف، وباقليم الخروب..
• نشالله نحنا وياكم نكون عَ موعد أيام أفضل، نبني فيا الدولة اللي منطمحلا،
  لأنو كرامة الإنسان واحدة ما الها دين

رصد Agoraleaks.com