فادي عبود: شو هالقلّة العقل هيدي، خلّو المسيحيي يفصلو القانون اللي بدن ياه، وقولولن خدوه مع 10 حبات مسك، بس قعدو بهالأرض (Audio)

– نصحوني بخطاب طائفي كوني مرشّح رفضت..
– إذا ظانين موقف القوات الكهربائي بربحهم بالشارع المسيحي مغلطين
– ليتذكّر الشعب، بكترة الحكي والـ”بررر” وقفو مناقصة “الزبالة” ولزمو بلا مناقصة..

مقتطف من حديث الوزير السابق فادي عبود لقناة الـ”OTV”:

تصعيد الكهربا

• بالواقع الوزير باسيل كان عم يردّ، التصعيد بدأ منذ مدّة،
  الإتهامات كانت منظمّة بمايسترو، وشفناها من 4 سنين،
  ما كان في نقنع واحد لبناني، انّو قصة الـ”TVA” بما يتعلّق بدير عمار، قصة شفافة،
  أي انسان فاسد لا يلجأ الى التلاعب بموضوع TVA، الفكرة بالأساس غير واقعية
• قصة الـ”TVA” طلعت تفنيصة كبيري، ولبنان اليوم خسران، لأنو لو معمل “ديرعمار” ماشي، ما كنا عم نحكي بالبواخر،
  لبنان خسر بطريقة مباشرة، لأنو ما بقا فينا نعملو بنفس السعر،
  والأعظم من هيدا، اليوم لبنان بالمحاكم، لأنّو أخلّ بالإتفاقية
• اليوم صار عنا مشكلتين صارو مستعصيتين، مشكلة اسما:
  – قانون انتخاب
  – كهرباء 24/24
  حدا بالعالم بصدّق، انو الذكاء اللبناني اللي عم ينتج كهربا خارج الوطن بأصقاع الأرض كلها، بآلاف الميغاواط، مش قادر انتاج كهربا بالوطن الأم!
• اخدنا قرار بالسابق، ما نخصّص قطاع الكهرباء، ومن 4-5 سنوات مضت كان خطر،
  لأنو التخصيص بذكّر كل لبناني، بخصخصة الخليوي
• هل يُعقل انّو نفس الأسلوب المعتمد بتعطيل قانون الإنتخاب، معتمد بتعطيل الكهرباء ،
  3 سنين منحكي بقانون الإنتخاب، ومنرجع عَ نقطة الصفر،
  لولا ما تعطّل معمل ديرعمار، ما حدا كان اليوم عم يبحث بموضوع البواخر
• خطة الكهربا انبحثت سابقاً، مرقتْ على مجلس الوزراء ، ما غيرّو ولا حرف بالخطة، ووصلو لنتيجة انو منرجع ع مجلس الوزرا عند كل مقطع أساسي
• ليش المناقصة بشركة الكهربا مش بهيئة المناقصات، قصة سخيفة، واللي بتطلع ع التاريخ، ولا مناقصة وحدي بتخصّ مؤسسة كهرباء لبنان حصلت خارج المؤسسة، وهيك القانون، حاج بقا نلهي الناس
• الأرقام بلبنان ما الها علاقة بالواقع، الأرقام كلها أوهام،
  واحد بقلك فيها سرقة مليار ليرة، التاني، مليار ونص،
  نتائج المناقصة رح تطلع عَ مجلس الوزرا، وكل وزير مشارك بالحكومة وكل حزب وحركة يعطو رأين

عن الكلام، لماذا ندفع الأموال للباخرتين، ولا نبني المعامل، يردّ فادي عبود:

• ما هوّي يخلونا نبلش ببناء معمل دير عمار، ليه معطّل بنائو 4 سنين؟
  المعمل معروف قديه رح ينتج، ومعروف قديه حقو، وكل اللي اطلعو على الأسعار العالمية شافو السعر كيفو معقول جداً، جدا
  والإتهامات على بناء المعمل كانت اكتر من الإتهامات على البواخر اليوم،
  شو طلع من كل الإتهامات، لو المصنع موجود، ما في لزوم لندفع للبواخر، عملية وضع العصي بالدواليب واضحة

الكهربا وموقف القوات

• في وجه شبه بين الأمرين، بالوعي تبعن، وباللاوعي تبعن، مش قادرين يبلعو انو هالعهد، والتكتّل، قادرين يحلو معضلة الكهربا، ويطلعو قانون انتخابي عادل
• القوات اللبناني عم تسأل أسئلة مشروعة، بدي سلّف انو القوات نواياها طيبة، مش نوايا عصي بالدواليب
• هلق بدنا نذكّر القوات ليش سكتو، على كذا، وكذا أمر،
  عم قول إذا عاملين حساباتن بالسياسة، انو هيدا الموضوع رح يربحّن بالشارع المسيحي، انا رأيي مش صحيح هالشي،
  والموضوع لازم يتاخّد بالشقفة العلمية
• الكهربا يجب ان تتأمن بأسرع وقت ممكن،
  في فوائد اقتصادية، والسؤال المطروح: كل يوم تأخير شو منخسر؟

قانون الإنتخاب

• النسبي بيقدر يكون بقضاء، أو محافظة، او دائرة متوسطة، او دائرة كبيري، او لبنان دائرة وحدي، وكذلك بموضوع التأهيلي
• أكترية القوانين النسبية بالعالم فيها تأهيلي، الموضوع الطائفي بيزعجني، لأنو لا هوي لساني، ولا دماغي،
  ولكن نقنع الناس واللبنانيين، إنّو إذا كان القانون بمعيار طائفي، او في تأهيل طائفي، منكون نحنا عم نرسّخ الطائفية، ونحنا طائفيين..

مين عم يتهمّك؟؟

• يللي حزبو او حركتو أو تكتلو، تقريباً من لون واحد 100%
  مدارسو نفس الشي، جمعياتو الخيرية والنسائية وغير الخيرية، وجمعياتو الإقتصادية، كلها من لون واحد
  بربّي أجيال انو نحنا مختلفين عن الباقيين، وهيدا بيجي يعطينا دروس بالطائفية
• اللي رافض الزواج المدني الإختياري، بيتهمنا بالطائفية!
  ما نضحك عَ اللبنانيين، التخلّص من الطائفية برنامج متكامل،
  البداية بتكون مع المدرسة وبالبيت، والتعليم، وبمدارس مشتركة،
  عم اقترح عَ المدارس الموجودي لازم يطلع 30-40 تلميذ من مدرسة من لون واحد معين، لَ نقول من الضاحية ويجو يقعدو بمدرسة بجونية شهر بالسنة، أو ببكفيا بضيعتي، أو وين مكان.. والعكس كمان.
• ما نضحك عَ الناس، ونقلن إذا عملنا قانون لا يراعي الطائفية بتنتهي الطائفية،
  شغلي يتزعج، يكون واحد عم يحاضر عليكي بالطائفية، وهوي متمرّس لـ”دينيه” بالطائفية
• التيار الوطني الحرّ عليه واجب لَ ناسو، وناسو عم تقلو بدنا عدالة. بدنا قانون انتخابي يمثلنا.
  باعتراف الفريق الآخر، انو نحنا وقفنا العدّ. وانتو بتاخدو 64 نائب.
• منو سرّ عَ حدا عدد المسيحيين 37%، انتو قايلين لو صرتو 2% نحنا ملتزمين بوقف العدّ،
  انا مقتنع انو المستقبل وحزب الله مقتنعين بوقف العدّ

الفساد

•  اتهامات، اتهامات، حتى يصير المجتمع مفتكر انّو هودي اللي كانو يخبروكم عن النزاهة، هنّي مش نزيهين بالكهربا،
  هودي عم يخبروكم مش طائفيين، هنّي طائفيين ونص،
  هيدا كلام لينزاد الضغط علينا، وهيدا الضغط موجّه اكتر لرئيس التيار جبران باسيل ليزيح عن هيدا الخط،
  وكلنا منعرف رئيس التيار، عندو مسلمّات
• ما بيقدر اليوم مسؤول، ما يقشع انو كل سنة عم يفلّ من لبنان 50-60 الف مسيحي،
  مش بس مسيحية، يمكن قدن من الفريق الآخر.. بس حلنا نعمل قانون عادل، ما بقا نتمرجل عَ بعضنا، وما بقا نتهّم بعضنا،
  ومش كل كلمة بدو يقولا جبران باسيل، مع حفظ الألقاب، بدها تُفسّر انو هلق فشناك يا ملعون، انتا زلمي طائفي
• حدا من اللبنانيين فايق عَ مناقصة “الزبالة” يللي نكبّت بالزبالة،
  لك المقدمين، بيت فرام وغيرن، وناس مشهود لالهم، ان كان بالنزاهة أو الإختصاص،
  ما خلوهم يحكو، ما قدرو يطلعو عَ التلفزيونات تيشرحو… وانو مش مزبوط سعرنا اغلى من “سوكلين”؟
  بررررر وشو صار؟ مين عم يلمّ الزبالة هلق، ومين عطا العقد للشركة.. اختفى الموضوع، وراحت المناقصة من أمها وابوها، ولزمو بلا مناقصة

المسيحيين

• حاج اتهامات بالهوا، ويللي مفكّر بدّو يمرّق قانون انتخاب يجعل المسيحيين ينقولن 40 نايب،
  والباقي ينقوهم عنن، يخيّط بغير المسلّة،
  القسم الأكبر من المسلمين بكل محبة بدن المسيحية يختارو ممثليهم
• كل المعركة دخلكم لشو؟
  كل المسيحيين الموجودين بلبنان، وبعد الن كلمة بتنسمع بكل هيدا المشرق،
  ويللي هنّي ملح الأرض بالأساس، لشو كل هالمعركة، لك المسيحيي بدن قانون انتخاب عَ ذوقن، لك عطو 100 قانون انتخاب،
  شو هالقلّة العقل هيدي؟
  عندكم كم مسيحي حافظو علين بقلوبكن، وانتو كتير بتعرفو مدى أهمية الوجود المسيحي هون
• مع كل محبة واحترام للوزير علي حسن خليل، هيدي التهديدات المتبادلة غلط،
  وإذا بيفهم من حكيي تهديد يشطبو، انا بقول بكل محبة، مافي لزوم لكل هالمعركة..
  خلّو المسيحيين يفصلو القانون اللي بدن ياه، ويجتمعو بالدير اللي بدن ياه، ويطلعو قانون انتخابي، ويقولولن خدوه مع 10 حبات مسك بضهرن، قعدو بهالأرض وتعاونو معنا، ونشيل كل هالقصة..
• عشو عم تشارعو المسيحيين وتقارعوهم، انتو عم تقولو نص بنصّ.. ما تقشطولن نص النص تبعن!
• الغاية يكون في عدالة، إن كان تأهيلي، أو تفضيلي

الترشّح

• عندي بعض المستشارين، وبما انّو بدي اترشّح على المجلس النيابي، إذا عندي دور اقدر اخدمو، مع كل قناعاتي،
  هيدي القناعات لن تتغيّر هلق بعمري، ولكن
  بدك تعمل نايب، بدّك تزايد بالطائفية، وتتهّم الآخرين.. لاق ما رح زايد بالطائفية
• من الـ”OTV” انا بقول: انا رجل غير طائفي، بس انا رجل ما بقبل تتاكّل حق أي فريق من اللبنانيين
• واضح انو التكتّل رح يتعاون مع باقي الأحزاب، ومنو سرّ انو تفكيري قومي اجتماعي
  التكتّل سيتعاون مع فرقاء على الأرض،
  اذا كان في تعاون ما بين الحزب السوري القومي الاجتماعي وبين التكتّل،
  انا طبعاً سأكون ممثّل الحزب بالتكتّل
• انا مش موجود بالتكتّل بالسرّ عن الحزب القومي، ولا مرّة التكتّل ما بيعرف انو أنا شو ميولي،
  الحزب ما أخد قرارو، شو بكون قرار الحزب القومي افجتماعي، انا بلتزم فيه،
  وطبعاً التكتّل ما خد قرارو مع مين بدّو يتعاون بالمتن،
  نحنا عن نقول في حال كان قرار التكتّل انو بدو مرشّح من الحزب القومي، وفي حال الحزب القومي نقّى فادي عبود، بكون انا مرشّح

رصد Agoraleaks.com