باسيل بعشاء كهرباء لبنان للتيار: يا فاسدين وقفو كذب يللي تاريخو اسود ما يبيّض مستقبلو عَ حسابنا.. ووزير الطاقة 5 سنين مستشار ما قبل ياخود معاش (Audio)

– انتو موظفين الكهربا، بتعرفو إذا إجا عَ الدولة اللبنانية، وزرا ما تركو وراهم أثر لا لصفقة، ولا لعمولة (قصة الكهرباء من الفها الى يائها)

مقتطف من حديث رئيس التيار الوطني الحرّ جبران باسيل في عشاء هيئة كهرباء لبنان للتيار الوطني الحرّ:

• قصتنا مع الكهربا طويلة، يمكن بيجي نهار ومنكتبا،
  بس قصتنا مخجلة، ومحزنة ومخزية، لأنّو نحنا ببلد ممنوع علينا نجيب كهربا للناس،
  ليه؟
  – في واحد بقول: لأنو ما بدنا حدا يعمل إنجاز بالبلد،
  – في الواحد يقول: لأنو في كارتيلات الموتورات: 1700 مليون $، كيف هودي بدنا نوقفن؟
  – في واحد يقول: لأنو في دولة فساد، وما في محل الها للعمل المهني، والشفاف، والنضيف
• الأسباب كبيري والنتيجة وحدي: 
  انو ما في كهربا 24/24..
  بعرف المش مسؤول والفاسد، ما بتعنيلو؟ لأنو يا ما إجو وإجو وما عملو شي؟
  نحنا جينا، وفي شهود علينا،
  شهودنا هيّي: نجوم الليل، وضو القمر بعد نص ليل،
  يللي شهد عَ وزارة الطاقة مضوايي وعم تشتغل بالليالي تتعمل للناس كهربا
• شهودن خفافيش الليل، يللي بخبرو خبار، وبركبو قصص.
  نحنا منعمل دراسات، ومنجيب مال، وهنّي بخبرو خبار، واشاعات، وتضليل
• الهدف واحد ما يكون في كهربا بلبنان، وهدفنا واحد يكون في كهربا بلبنان،
  هيدي المعركة بلشّت سنة 2010،
  صار النا 7 سنين، ولبنان محروم من الكهربا من اكتر من هيك
• لما جينا على الكهربا، ما ميزّنا بين منطقة ومنطقة،
  كلنا سوا منصابين بالكهربا،
  عم يلهونا بكتير أخبار، وتقنيات.. بتسمعو، إذا الواحد فهمان، ببطّل فهمان
• انا عم احكي للبنانيين، لأنو ما بجوز ولا فينا نسكت، عن يللي عم ينحكى عن الكهربا،
  قالو انو هنّي فاصلين، قانون الإنتخاب عن الكهربا، ما هيك؟
  لَ يللي عم يحكو عن الفساد بالكهربا، وقلبن على االمال العام، وين كانو بس وقف معمل دير عمار 4 سنين، وما كان في كهربا

إعتراضات دير عمار الكيدية..

• 1– وينن ما حكيو لما الدولة اللبنانية عم تتكبّد مئات ملايين الدولارات تحكيم على عقد انعمل..
  بدن معمل بالبرّ، وما بدن معامل بالبحر!
  طيّب هيدا معمل دير عمار بالبرّ، ليه ما خلّوه ينعمل؟
  2- وينن لمّا وقفو شبكات النقل؟ وصورة وأصواتن بعدا بدينتنا
  كم مرّة خبرنا، إذا عملنا معامل وما في شبكة نقل، ما فينا ننقل الكهربا
  3– وينن لما اجو المياومين يطردوكم من مؤسستكم، ويسكروو المؤسسة، ويوقفو الجباية
  ليه ما طلع صوتن، لما حرمو خزينة الدولة من ميات ملايين الدولارات جباية
  
  4– وينو قانون الغاز واقف سنين بمجلس النواب، خط الغاز كان بوقتا بوفرلنا مليار و50 مليون $ بالسنة
  وينن، وينن وينن؟؟؟
• بذكركم قد ما بدكم اتهامات، شو بقي منها؟
  بتتذكرو الجريدة اللي نرفعت، وقبل ما ناخود قانون المال، قبل ما نبلش بالمناقصات اتهمتنا بـ360 مليون $ فساد،
  قال آخدين عمولة قبل المناقصة…
• بتتذكرو شو حكيو عن البواخر، انّو ما بتشتغل، وقديمي، وانو ما رح تعطي نتيجة
  وقفت شي نهار هالبواخر..
  بقي بس أثر الكذب، لأنو كذوب، كذوب بيعلق شي بعقل الناس
• نحنا اليوم بلبنان، ما عنا مشكلة انتاج الكهربا، لأنو في “موتور”،
  نحنا بلبنان عنا مشكلة كلفة الكهربا،
  ما في ولا فكرة مقدسة بالكهربا،
  – بواخر
  – معامل
  المهم تجي الكهربا
• اليوم مؤسسة كهربا لبنان ووزيرالطاقة عم يشترو كهربا، مش عم يعمرو معمل كهربا بالبحر،
  هالكهربا اللي عم يشتروها، السؤال الأساسي هوي:
  – هل هيّي أغلى من كلفة الدولة.. لاق هيّي أرخص
  – هل هيّي ارخص أو أغلى من كلفة المواطن؟
  الجواب، لاق هيّي أرخص بكتير من كلفة المواطن
  هيك منقيّم إذا الكهربا عم نجيبا، هيي مشروع مفيد اقتصادياً
• بدل ما يدفع المواطن 400 ل. للموتور، بيدفعن 130 ل. لمؤسسة كهربا لبنان
  الخطة المعمولة بنتيجتها، عجز الكهربا بصير صفر، والكلفة على المواطن بتنزل 200%
  هيدي هيّي، الكل ربحان، بس هني ما بدّن حدا ربحان،
  بدن أصحاب الموتورات يضلن ربحانين، وبدن الكلفة تبقا 400 ليرة
• كلّ اللي عم تسمعو كذب،
  وزير الطاقة اليوم عم ينفّذ حرفياً شي اللي نطلب منو بمجلس الوزرا، بموافقة الكلّ.
  وقفو تكذبو على الناس... قلنالكم بقلب مجلس الوزرا، نحنا مش قابلين نعمل شي مش موافقين عليه،
  ما تضيعو الناس، بدفتر شروط قبل، وبعد.. ودائرة مناقصات قبل، وبعد
• متل ما جبنا أرخص الأسعار بالبواخر، وبمعمل الزوق والجيّة، ومعمل دير عمار،
  ارخص الأسعار العالمية
  نحنا اللي ما منقبل، مش هنّي اللي ما بيقبلو!
  ما حدا بزايد علينا، يللي معبّى جيابو مال، ما بيحكينا عن تعباية جيوب، وهوّي اللي مفقّر الناس ومفرغلن جيوبن
• يللي تاريخو أسود بالفساد، ما ببيّض مستقبلو على حسابنا،
  يروح يبيضو بحسابو
• التيار الوطني الحرّ، ما بينمسّ لا بالآدمية، ولا بالشفافية،
  يا فاسدين، تحديتكم مرة بمجلس النواب،
  كنتو كلكن، قلتلكم ، تفضلو هلق، جيبو كل قضاة الدولة، ونحنا حاضرين.
  انتو موظفين الكهربا، بتعرفو إذا إجا عَ الدولة اللبنانية، وزرا ما تركو وراهم أثر لا لصفقة، ولا لعمولة ولا لإستفادة،
  انتو شو بتعرفو شو الأسعار اللي عملناها بمؤسسة كهربا لبنان
• مؤسسة كهربا لبنان، في عَ راسا مدير بينشاف الحال فيه، وهوي خيرة الأوادم،
  وزارة الطاقة في على راسا، وزير قعد 5 سنين مستشار ما قبل ياخود معاش،
  مش انتو يللي سارقين الناس بتعملو لجان تحقيق،
  تفضلو على التحقيق، تفضلو تنشوف مين حارم الناس من الكهربا، ومين يللي مرتّب على الخزينة تحكيم.
• لو خليتونا نعمل دير عمار، ما كان في لزوم اليوم للبواخر
• كل همكم، انو أولً شي:
  – جبران باسيل ما يعمل كهربا،
  – بعد شوي، سيزار أبي خليل ما يعمل كهربا
  – بعد شوي التيار الوطني الحر، ما يعمل كهربا،
  – هلق صرنا فخامة الرئيس العماد عون بعهدو ما تجي الكهربا
  ودولة الرئيس سعد الحريري بحكومتو ما تجي الكهربا
  
• هيدا العهد بوجكم 6 سنين،
  6 سنين نحنا بدنا كهربا، وانتو ما بدكم كهربا، وبدنا نشوف مين بدّو يربح؟
• نحنا التيار الوطني الحر، قدامكم مش 60 سنة، ولا 600 سنة، 6000 سنة بوجكم وبدّو يكون في كهربا،
  هيدي هيّي قضيتنا، والنتيجة وحدي،
  – متل ما أخرونا سنتان ونص، حتى انتخب العماد عون رئيس جمهورية، واجا العماد عون رئيس للجمهورية
  – متل ما اخرونا 3 سنين بمراسيم النفط، ونقرّت مراسيم النفط
  متل ما أخرونا من 2013 تمديد وتنين لقانون الإنتخاب، وبدّو يجي قانون الإنتخاب،
  هلق عم يأخرونا بالكهربا، بس بدها تجي الكهربا
• عشتم وعاش لبنان

رصد Agoraleaks.com