بيار رفول: اليوم بدن يعزلونا وفي ناس ما بدها قانون، وفي نفاق سياسي (Audio)

– منسمع في تقدّم وعشية عرقلة وتاني يوم بصير في قانون جديد!

مقتطف من حديث الوزير بيار رفول لقناة الـ”OTV” ضمن برنامج “بلا حصانة”: (الجزء 1)

• في ناس ما بدن قانون، ما بدن الوضع الساريّ،
  بدن قانون الستين، بلا ميثاقية، وبلا شراكة وبلا مناصفة

من هؤلاء؟

• من يطرحون قوانين انتخابية، وبيرجعو يطعنو فيها،
  اللي طرحو هالقوانين وتراجعو هنّي مسؤولين عن هالموضوع
• نحنا كتيار وطني حرّ، بدنا قانون يأمّن الميثاقية، والمناصفة والشراكة بالحكم،
  القانون المنصف هوي المدخل لأي عمل ببناء الدولة
• العهد إجا تيعمل نقلة نوعية، هالعهد إجا مش تيدير الأزمة، إجا ليحلّ الأزمة،
  رئيس الجمهورية كان واضح، انا جايي حتى غيّر، حتى وقّف الفساد، حتى نبني دولة،
  كل هيدي الأمور بتلاقيها بتمشي، شوي بترجع تجمد..
• يوم منسمع في تقدّم، تاني يوم من عشية منسمع بالإعلام خير التقدّم اللي سمعناه، وتاني يوم بصير في قانون جديد!!
  هيدي الخلطة محملينا ياها نحنا لإلنا،
  وهيدا مش غريب عنا،
  نحنا لما منقول بدنا نعمل تغيير، من زمان واقفين ضدنا
• خود 1989، لما اعلنا حرب التحرير لبنان، خضناها وحدنا، ميشان ما نحكي بالتفاصيل،
  خسرونا ب 13 تشرين1 بس ما انكسرنا،
  كفينا وعملنا نضال سليم.. وتحرر لبنان ورجعنا ب 7 أيار 2005، وعَ أساس نحنا من ضمن حالة لبنانية، لا بل رأس حربة لبنانية، تحت شعار 14 آذار،
  عزلونا،
  بعد ما عزلونا، قالولنا سنة 2008 نحنا ندمنا،
  اليوم بدن يعزلونا، وما بدن العهد يمشي، ومبسوطين بالفساد، والمحاصصة
• لازم يبقى اقتصادك ريعي، لتضلّ انتا خادم عندن، او مشروع تهجير او هجرة
• نحنا في ورقة تفاهم مع حزب الله، وورقة نوايا مكتوبة مع القوات اللبنانية، ولما صار في وفاق مع المستقبل، اتهمونا انّو نحنا عاملين خطة تحت الطاولة حتى نقلب الوضع، بيّن اليوم انو ما في اتفاق على حدا، أو متفقين على قانون انتخاب، او متفقين مع بعضنا لنضرب فريق تاني
• اجا الرئيس وفاقي، شفنا نفاق سياسي
• كل نضالنا من سنة 1989 لليوم، هوي لتأسيس أوتثبيت هوية وطنية،
  هيدا نضالنا، وهيدا تاريخنا بيشهد على مواقفنا

لماذا يُتهّم التيار بالطائفية؟

• لأنو ممنوع حدا يكون وطني بلبنان
• بقولولك “المارونية السياسية” خربتْ البلد، انا مني مع المارونية السياسية، بس كمراقب،
  هل المارونية السياسية فلسّت البلد؟
  هل المارونية السياسية اخدت مطارح غيرا؟
  هل المارونية السياسية اخدت محل غيرا بالدولة.. الرئيس فرنجية قلن تعو نبادل، خدو وظايفنا وعطونا وظايفكم. وكان الدستور واضح
• اجا الطائف حتى يصلّح، كيف فلسّت الدولة ب 25 سنة؟
  ما نفذو شي منو، الاّ نهبو الدولة، وضربو المؤسسات، ومعشعشة فيها الفساد
• وصلنا تقرير من كم شهر من وزارة المالية،
  من التسعينات للآخر 2015:
  – داخل على ميزانية الدولة: 124$
  – صارفة الدولة: 121 مليار $
  – لازم يبقى 3 مليارات $، علينا 76 مليار $ ديون
  عشو عم ينتقدو المارونية السياسية
• نحنا فتنا على الدولة مش حباً بسلطة، جينا لنقلب الوضع، بلّش القواص علينا،
  عملنا مشاريع بـ100 سنة ما حدا قدر عملها،
  – النفط عم ينحكى عنو من 1921، وكل ما تسأل حدا، بقلك ما بدن نكتشف النفط، ما بخلونا نستثمرو..
  اكتشفنا النفط والغاز، وعم نلزمو، صار في 56 شركة
  – عملنا خطة الكهربا، عطلوها، كان لازم يكون عنا كهربا 24 ساعة
  عملنا السدود:
  1) سدّ بروح في 5 ملايين شجرة ما بيتوقف
  2) سدّ بروح 700 الف شجرة، وقالت الشركة منزع “الدوبل” توقف على مدة، رجع مشي
• شو هالكيدية بالبلد؟
  هيدا لإعادة الشراكة بالبلد، والميثاقية.
  لو الشيعي عم يصير فيه هيك، رح نتصرّف هيك،
  لو السني عم يصير في هيك، بدنا نتصرف هيك،
  لو الدرزي عم يصير في هيك، نحنا رح نتصرف هيك
  ليش هالتهميش هيدا كلو،
• هيك منكفي رسالتنا بالمشرق!
  هيدي الإستدارة المشرقية اللي عملا الجنرال عون، من 1400 سنة ما صارت باتجاه المشرق،
  هل المشرق مسيحي بس، او مسيحي إسلامي!
• هل المواقف اللي عم ناخدا، ان كان بالفاتيكان، أو بالأزهر، او بأي مطرح نكون فيه، هل هي لمصلحة المسيحيين، أو للحالة اللبنانية، ولَ هالرسالة المسيحية – الإسلامية اللي منشوف حالنا فيها، وهيّي رح تكون النموذج للعالم كلو،
  نحنا يتعامل معنا هيك!
  نحنا صرنا طائفيين؟
  نحنا صرنا حراميي!

رصد Agoraleaks.com