غسان عطالله: تدرجنا بالعمل الوطني من النضال الى العمل السياسي (Audio)

– حبْ الوطن ما بيجي فجأة، مش انو بنطر من وطني يعطوني بالشهر 50 الف $ تصير حبو
– الشوف للتحسّن ومجهودي من مجهود الحزب اللي بنتمي لالو
– كان في يكون بغلطة صغيري “مرحوم” وأهلي حاطينلي صورة ، بس.. 

مقتطف من حديث المرشّح المحتمل عن دائرة الشوف المناضل في التيار الوطني الحرّ غسان عطالله:

• صراحة تدرجنا بالسياسة من سنة 1990،
  كنا بعدنا شباب صغار، وكنا بأوّل طلعتنا، وفتنا بالعمل النضالي،
  وهيدا الشي صار بنداءات بوقتا من قائد الجيش العماد ميشال عون ضدّ الوجود الغريب بلبنان
• قضينا فترة 15 سنة من النضال، كانت كل الناس تنعتنا بالمجانين، ومتلي لوين رايحين؟
  ما رح توصلو لمطرح، عم تضيعو عمركم ومستقبلكم
• كان في عنا ايمان كتير كبير بقضيتنا، وهيي قضية حق،
  قدرنا اثبتنا بعد 15 سنة، انو منقدر نحقق احلامنا

• اغلبنا مش جايين من بيوتات سياسية، ولا وراثة اقطاعية،
  ناضلنا بكل شرف ومحبة لأرضنا ولبلدنا

بداية العمل السياسي

• سنة 2005، انتقل العمل لنموذج جديد، وصرنا نتعرف كيف الإنسان بيشتغل سياسة،
  من سنة 2005 تغيّر المفهوم
• أوّل شغلي شرفّني فيها رئيس الحزب اليوم رئيس الجمهورية،
  استلمت مسؤولية منسّق قضاء الشوف سنة 2009،
  كان المطلوب منّي هيكلة الحزب، وتنظيمو، واعطائو دور ومكانة داخل منطقة الشوف
• كلنا منعرف انو منطقة الشوف، على مرّ طويل من الوقت، كان العمل السياسي خجول،
  كان في آحادية بالسياسة. وهوي متحكّم بكل زمام المنطقة. من خدمات وغيرا
• جينا نحنا عملنا هيدا الخرق، ونشطّنا غير أحزاب، انو فعلاً ليش لاق؟
  فينا نكون موجودين، والمنطقة منها حكر عَ حدا
• كان معي فريق عمل ممتاز جداً وناشط جداً، وقدنا نعمل حالة جديدي بالمنطقة،
  هيدي الحالة ريّحت الوجود المسيحي المهجّر والتعبان.. وكان يفتقد لحضور سياسي فاعل حدّو،
  نظمنا هيكلية معينة، وسلمناها لفريق اجا من بعدنا ممتاز، واليوم هوي عم يدير القصة
• من سنتين اعلن عن الترشيحات، قدمت ترشيحي من 4 سنين، بس بوقتا ما صارت انتخابات،
  بالنظام الحزب الجديد، في عدة مراحل، واليوم قطعنا مرحلتين، والحمد الله أنا بقولا بفضل الله ورضى الوالدين

•  مني ابن سياسي، ومنّي ابن اطاعي، ولا ابن رأسمالي،
  انا ابن بيت كتير بسيط، اهلي كتير بسطا.. بخافو عليّي من اول نهار نزلت اشتغل سياسة
• تعبت كتير حتى وصلت مطرح ما أنا،
  اليوم عدد كتير من الوزرا هنّي اصدقائي، لأنو بفترات النضال كنّا اصدقاء،
  وبذات الوقت بعدني انا نفسي من أوّل ما بلشت
• زوجتي وولادي ما بشوفوني أوقات كلّ الجمعة،
  بيعرفو وبعرف كتير منيح، لو منن داعميني كل هالدعم، ما بقدر كفّي
• بشكر فريق العمل اللي حدّي، بانتخابات داخلية، عملنا معركة وكأننا عم نعمل معركة عكل مستوى لبنان
•  صرنا عم نشتغل شأن عام، وعم نتابع مشاريع إنمائية لمنطقة الشوف،
  سنة 2017، الإنجازات اللي رح تتحقّق بالشوف جديدي ولأول مرّة رح تصير:
  وهيدا بفضل الحزب اللي بنتمي لالو، ووزراءنا الحزبيين الموجودين بالوزارات
• هناك مشاريع قيد التنفيذ، (مشاريع شبكات مياه بعدة مناطق) وقيمتها تصل الى مليون$
  في تحسين بالكهربا..
  موتورات كهربا تسلمّت
  شبكات صرف صحي عم تنوصل كلها مع بعض لمحطة تكرير
  في عدة طرقات نحنا سعينا لالها، وقدمنا بعض السعي، الشكر الكبير للحزب اللي بنتمي لالو، ووزراءنا الحزبيين (وزيرالطاقة)
  وشكر للحزب اللي جبلنا وزير من الشوف (طارق الخطيب) بوجهلو تحية كونو الصديق،
  وسوا عم نعمل انماء، وعم نعمل مشروع بيئي لفرز النفايات

حاجيات الشوف كبيرة

• هوي مسعى مع شركة خاصة، انو ينعمل مشروع فرز متطور جداً،
  ورؤسا بلديات مع مستشارين من وزارة البيئة واختصاصيي بالشأن النفايات ومن المجتمع المدني رايحين عَ ايطاليا،
  لنشوف مشروع بيئي قيمتو بحدود 23 مليون $
• ورداً على سؤال عن التمويل، قال عطالله:
  بفضّل انو أصحاب المشروع يحكو عنو، ولكن رح يكون صورة ومثال لغير مناطق
• عم نسعى يكون بالمنطقة في مشاريع، بدنا نقلو للإنسان طلاع قعود بالضيعة وبتقدر تنزل عشغلك ببيروت (ما بدو يقعد كل النهار ع الطريق)
  منطقة الشوف منطقة زراعية بدنا ندعمها
  الشوف منطقة غنية جداً وفينا نشتغل بخصوص السياحة الدينية
• في بوسطة وحدي بدير القمر بتنقل الناس عَ بيروت وبتردن،
  احرتقت البوسطة، ما في غيرا، وعم يسعو ولاد دير القمر يأمنو بوسطة جديدي، لأنو الدولة مش مأمنا هالشي،
  وهيدا الباص ما كان ينزّل الناس، كان يجيب حاجيات الناس من بيروت

وجع الناس بلا مغالاة

• بدنا نحكي وع الناس، بدنا نحكي إمكانية التنفيذ،
  إذا بدّي اجي قول: بدي اعمل مشروع كتير كبير، واقعد 4 سنين، وقول بالآخر كان المشروع كتير كبير وما حدا ساعدني ،
  بفضل يكونو مشاريعي صغار عَ قدّ وجع الناس
• انا عضو بتكتّل إذا ترشحّت عن التيار ونجحت، ولكن أثبت التكتل خلال 10 سنين بقوتو سواء بتقديم مشاريع مهمة وغيرا من الأمور..

• هاجسي الأساسي هوي العيلة،
  الطفل عجينة، عجنيه مزبوط بيطلع بالمجتمع رجل عظيم،
  عجنو غلط بيطلع رجل فاسد
• كنا صغار بيّي كان يضرب التحية للجيش،
  عشقنا البدلة العسكرية، حسينا هودي حماة الوطن
• منجي منطلّع بولد عمرو 18 سنة، واقف قدام السفارة مستعجل بدّو يفلْ،
  ما منسأل حالنا ليه؟
  لأنو نحنا معودين الولاد ما نسمعن، بلدنا ما بيسوى، الفساد آكلنا، عم يسرقونا،
  عَ طول هيدا حديث الأهل بقلب البيت، الولد بس يكبر شو امنيتو يعيش بهالبلد؟ أكيد لاق
• عشقنا البلد، من ورا الحكي الحلو عنو،
  بلدنا فيروز وعاصي الرحباني، ووديع الصافي،
  بلدنا الأرزة والجبال والبحر والجمال..
  بلدنا الثقة والعنفوان… بحبك يا لبنان
  هيدا كلو خلانا نعشق وطننا، والاّ 15 سنة نضال، كان في يكون بغلطة صغيري “مرحوم” وأهلي حاطينلي صورة عليا شريطة سودا،
  بس ما كان يعنيلي الموضوع، لأنو كنت فعلاً عندي شموخ
• اليوم منقلو ليش مسافر للولد،
  ما كلّ الولد عم تكرهو باللبلد
• إذا بالبيت ما اهلناه مزبوط، منتكّل على المدرسة،
  كل عمرا المرا تشتغل، من زمان كانت تنزل مع جوزا على الحقلة..
  بدي اسأل مدرا المدارس.. شو عم تعملو: حبْ الوطن ما بيجي هيك فجأة..
  مش انو بنطر من وطني يعطوني بالشهر 50 الف $ تصير حبو،
  حب الوطن بتبنيه مع الطفل، هيدي أرضي وأرض جدودي، هون في ناس ضحّو وماتو.. وهالشي بيتجسّد: بالعلم والخريطة برئيس الجمهورية وبالجيش اللبناني

رصد Agoraleaks.com