لحلّ المشاكل الكبيري (الزوادة)

مين منّا ما عندو مشاكل، انتا اللي عندك مشكلة كبيري، وما عدت عارف كيف بدك تحلها،

عالم حكيم رح يعطيك هالنصيحة، بقول:

• كنت لاحظ دايماً اللي كان يكبلّني قدام مسألة علمية صعبة، هوي تعقيدا بالذات
• كنت بادر لتقسيم المسألة لعناصر بسيطة، وحلن واحد وراالتاني
• فجأة كان ضغط الصعوبي يخفّ، تماماً متل وقت اللي بدك تقري مقالة او جريدة او كتاب دفعة وحدي،
  بتحسّ انو وكأنك ما فهمت شي
• بس ترجع تقرا بتروّي كلمة ورا كلمة، ومقطع ورا مقطع بيوضح المعنى، وبيسهل النص

الزوادة بتقلي وبتقلك:

هالعالم بيدعيني وبيدعيك تفصّل مشكلتك مهما كان نوعا،
بدل ما تشدّ عالخيط وينعقدْ اكتر، جرّب تفكّ عقدة ورا عقدة وتشوف كيف الحبل بحلّ،

الزوادة بتقلك كون متل المسافر يللي قبل ما يمشي بيدرس سفرتو على الخارطة، وبقسمها على مراحل، ومن محطة لمحطة بتسهل السفرة،وبتسهل الطريق وبتوصل بسلامة..

الله معكم

المصدر: صوت المحبة