كتاب مفتوح الى وليد بيك ..(المخرج ايلي فغالي)

كل فترة بتهدّدنا بالسلم الاهلي
وبتذكّرنا بحرب الجبل
يا بيك خلّينا ننسى تاريخك
انا ابن هالحرب وعشتا بكل مآسيها
وكنت مشارك وللاسف فيها
الحرب ما جابت الّا الويلات
ويلّي ساعدوك بالماضي اليوم هنّي ضدّك
قتلتنا وسامحناك
هجّرتنا وسامحناك
صادرت اراضينا
وسامحناك
اجراس الكنايس بل اقبية عندك وباردو سامحوك هنّي
صرلك من ١٩٩٠ بتختار نوّابنا وآكلين هوا
بعد في ناس ممنوع ترجع وساكتين كرمال العيش المشترك
صرلك من ل ٢٠٠٥ بتلعب عل حبلين
يا بيك حظّك عاطل طلع رئيس ماروني قوي وانت بتحب الضعفاء
ما بقى تهدّدنا نحنا خسرنا كتير وما عدنا سئلانين
وكون اكيد اذا خسرتنا رح تخسر كل شي
تذكّر تاريخ الجبل منيح
بدّك تختار نواّبنا وبدّن يكونوا كومبارس بلقائك اللي مش ديموقراطي
مش هيك بتنفتح الطريق لتيمور
الزمن تغيّر والاقطاع الى زوال
وانت قارئ جيد لا بل ممتاز
بنصحك عيد قرأتك واذا ما فهمت خلّي حدا يفسرّلك
راسنا مش راس نيفا يا بيك
راسنا بعلو جبال الارز
راسنا بقوّة صخور لبنان
راسنا اكبر من راسك.
والسلام

ابن الودايا
كما تسمّونها

ايلي فغالي