Agoraleaks Agoraleaks
– اللي كان عندو قدرة قتالية، كان يطلع عَ الجرود..
مقتطف من حديث الناشط في التيار الوطني الحر جورج كلاس لموقعنا: (22 آب 2017)
- ببداية الأحداث، وقت اللي صار في خطر عَ ضيعتنا،
صارو الإرهابيين عَ تخوم الضيعة، من بعد ما انتهت احداث القصير - انسحبو من مشاريع القاع، واتو ع جبال القاع وجبال رأس بعلبك للجهة الشرقية.
نحنا هون ما كان في مراكز عسكرية بالأساس عَ تلالنا فوق.
كان عنا مراكز عسكرية بالضيعة، ولكن ما في مراكز بالمواقع المتقدمة
- كان في مبادرة منا كشباب من الضيعة، وهون ما عم نحكي عن فئة معينة، أو حزب محدّد، لأنو الخطر بس يجي بكون عَ الكل سوا
- المبادرة من شباب الضيعة بالحراسة والسهر حوالا الضيعة،
واللي كان عندو قدرة قتالية، كان يطلع عَ الجرود، من الجهة الشرقية،
وألأغلبية الساحقة هني عسكر متقاعد، وعسكر من جميع الضيع المحيطة،
صحيح طلعنا عَ التقاعد، بس بعدنا عسكر - بعد ما صار في مراكز جيش وقوة بالجرود، ومراكز للمقاومة بالسلسلة الشرقية،
رجعنا نحنا عَ الخطوط الخلفية، لأنو نحنا اكيد ما مناخود دور الجيش.. لأنو هوي يللي بدافع وعندو القدرة.. - بقينا عَ حالة الحراسة ضمن الضيعة، وبالوقوف الى جانب الجيش،
واليوم بعد ما صار في قرار سياسي واضح لجهة تحرير الجرود، بدءاً من جرود عرسال وخوض المعركة المقاومة.. - مع انسحاب النصرة من المنطقة،
– بلشت المرحلة التانية بتحرير جرود رأس بعلبك، وجرود القاع..
– وتم تنضيف جرود رأس بعلبك، حتى إذا طلعو ما يكون للإرهابيين إعادة انتشار لجهة عرسال..
تقدم الجيش كان كتير مميّز بجرود رأس بعلبك، وحالياً المعارك بجرود القاع.. ومنتمنى تكون النهاية قريبي جداً، حتى يكون احتفال النصر قريب
- نحنا أهالي القاع، نشيد برئيس الجمهورية، يللي هوي بينا وبي الكلّ.
نشيد إشادة كبيري بقائد الجيش جوزيف عون، لأنو رجع رفع معنويات الشعب والجيش - نحنا مناخود العبرة من جنود جيشنا، ومن نخبة جنودنا على هالعطاء والروح الطيبة، وصار في تقارب والتحام بين الجيش والشعب
- احد العسكريين من عدة ايام، أصيب بعينو وبكتفو، وكان داخل المستشفى،
ولكن المفاجأة انو هرب من المستشفى، وتلاقى مع رفقاتو بالجبهة.
فشو ما نكون تعبانين، هيك خبرية بلسمة للجراح.. انو تلاقي جندي من الجيش اللبناني يترك المستشفى ويرجع لعند رفقاتو - نحنا منفتخر بجيشنا، وهوي تاج عَ راسنا..
- بعد ما انتشر الجيش على جرودنا، حبينا كشباب ضيعة وبمساعي خيرّة، تقديم دعم معنوي، فكانت مبادرة الوقوف عَ الطريق، وبوضع خيمة اللي بتودّي عَ الجبهة، وجبنا:
– الماي
– الفواكه
– الخبز
– خضار
حتى يشعر العسكري انو نحنا معو..
ونحنا شو عم نقدّم، الجيش عم يقدّم دمو.. - شباب الضيعة كلن عم يبادرو بدعم الجيش،
ونحنا شباب التيار الوطني الحرّ كمان عم نقدّم، وعم يجينا مساعدات من ناس طيبة وخيرّة.. ونحنا الشباب يمكن ما منقدر نقدّم دعم مادي، ولكن عم نقدّم وقتنا وجهدنا لنقدم مبادرة من قلبنا لجيشنا
- ضيعتنا القاع يللي هيي على حدود الوطن، ويللي هيي بوابة لبنان،
إذا كنا نحنا مرتاحين بضيعتنا، بكون اللبنانيي مرتاحين بالداخل.
لأنو إذا ما في صمود على الحدود، ما في وطن بالداخل
