ماجدة الرومي: لبنان عمره أزل، اليوم موجوع، جناحه مجروح، بكرا لا، بكرا الله معه” 🙏

مهما السياسة الدولية قومّت الناس المتواطئين، فوقًن في رب 🙏
ما بخاف عَ لبنان 🇱🇧 نحنا ناس مؤمنة منصلّي 🛐
الشهدا سقطو من كل الطوائف 💯
نحنا بحاجة لناس تجمع 👏 لغة العنف بتصبّ الزيت عَالنار..💣 ما بآمن بهالطريقة السلبية.. مطالب الموجوعين حق أكيد.. بس لمّا يتطلَع من حدود الإحترام، ببطّل إفهمو ولا بِعترِف فيه.. 👏

تحدّثت الفنانة ماجدة الرومي في لقاءٍ مع قناة “العربيّة” أنها لا تخاف على لبنان وتؤمن بأن الله سوف يمنحنا لبنان أجمل من أي وقت مضى.
وفي التفاصيل، صرّحت ماجدة الرومي “لبنان للبنان، لبنان عمره أزل، اليوم موجوع، اليوم مقهور، اليوم جناحه مجروح، بكرا لا، بكرا الله معه، بكرا الله معو وعندو رب كريم بالسما، مهما طغيو الطغاة ومهما السياسة الدولية قومّت الناس من الداخل متواطئين، مع عملية ضرب الأساس اللبناني، فوقًن في رب“. ومما قالته أيضاً:

• نحنا ناس مؤمنين، ونحنا عالم منصلّي.. ومنآمن بوجود الله.
• أنا ما بخاف عَ لبنان.. لبنان للبنانيين، وما حدن بياخدو منُن.. ومش بعد ما استبسلو كل هالإستبسال بالدفاع عن أرضُن..
• الله رح يَعطيُن ياه أجمل من أي وقت مضى.. أيمتى..؟؟ ما بعرف..
• مش هيدا اللي يستحقّه الشعب اللبناني..
  الشعب اللبناني استبسل كرمال أرضو، وهوي شعب بطل.. وشعبو وهوّي طيّب إستشهد..
  شعب بدّع إنّو يلاقي طرق حتى يكمّل الحياة، وضل في مطرح للبَسمة.. وأكيد مش هيدا اللي بيستحقّه.. خاصة من بعد الشهدا اللي إندفعو من كل الطوائف.. بس لبنان عمرو أزل ومعو وقت يتعافى من اللي دبحوه، واللي غدروه، واللي خانوه، وبتِجي أجيال بتبلسم جراحو أكتر
• بلاقي نحنا بحاجة لناس تجمع قلوب، ولغة خير وسلام.. في كتير لغة عنف ولغة العنف بتصبّ الزيت عالنار.. انا مش هيدا إسلوبي ولا بآمن بهيدي الطريقة.. خاصة بالأسلوب السلبي.. بموضوع الموجوعين والمَطعونين، والمقهورين، والمظلومين، والفقراء، واللي بالمستشفيات، وبحقوق العجوز.. كل هيدولي حق للناس أكيد.. بس كل هيدا لمّا يطلَع من حدود الإحترام، أنا ببطّل إفهمو ولا بِعترِف فيه..
• يتشجعو الولاد على العلم..
  يتبارو بلغة العلم والسلام..
  ونحنا منعرِف إنّو الحروب تبدأ ببؤر الفقر..