بالفيديو – الرئيس إميل لحود عن قضايا الفساد: أرض النورماندي المهدور 31 ليار $ (الجزء 1- Video)

– 8 مليارات $ هبات منذ سنة 2006 مصيرها مجهول.. ⁉

***

مقتطف من شهادات رئيس الجمهورية السابق إميل لحود موزّع عبر صفحته، عن قضايا الفساد، عن مرحلة إستلامه لقيادة الجيش ومن ثم رئاسة الجمهورية من خلال تسجيلات خاصة تنشر تباعاً عبر حساباته على اليوتيوب والفايسبوك والتويتر… (27 شباط 2019)

(1) 1999
– سمعت النائب فضل الله عم يحكي عن مكافحة الفساد، ومشكور على الجهود الكبيرة، يللي عَم يقوم فيها.. لكن الشعب اللبناني لازم يعرف شو صار بالماضي، حتى يعرف شو ممكن يصير بالمستقبل ✔
– بالماضي سنة 1999، إسرائيل بتضرب الكهربا بلبنان، بِطلب إنعقاد مجلس الوزراء، وعَ باب مجلس الوزراء، قلت: نداء للبنانيين يساهمو بمساعدة الدولة، بهبات ميشان الكهربا 👆 وإنّو نحنا مش عايزين الخارج، و فينا كلبنانيي نصلّح الكهربا.. وإذا ضربت إسرائيل بدنا نرّد عليها..

(2) 50 مليون $
– بالنتيجة وصل 50 مليون $ من اللبنانيين، وكلُّن باسمي أنا كرئيس جمهورية 👆
– طلبت وقتا إنو يودعوا الهبات اللي بَعتوها باسم الدولة والبنك المركزي، ونوضعت الـ 50 مليون $ بالبنك المركزي، وأخدنا قرار وبوقتا رئيس الحكومة سليم الحص، إنّو الهبات وفق القانون ولا أي ليرة الاّ ما بدها تمرق عَ مجلس الوزراء.. لأنّو من قبل ما كنّا نَعرِف وين تجي الهبات، ولعند مين؟؟ ومين كان يصرفها ⁉

(3) 2006 والهبات..
– أخدت قرار بوقتها، إنّو كل الهبات لازم ينعَرَف وين صُرفت.. واعطيناهُن سنة، و إجانا بالتفصيل الفواتير، وعممناهُن بالجرايد آنذاك، وتشكرنا كل واحد مساعدة للدولة 🇱🇧
– من بعدا صار هيدا القانون، وأي هبة بتِجي عَ مجلس الوزراء، لوقت بعد الإغتيال المرحوم الرئيس الحريري، (1999- 2006) منَعرِف شو إجا هبات، وخاصة صارو يجو الهبات بكترة سنة 2006
– آنذاك بِنزل عَ مجلس الوزراء، وبِطلب من رئيس الوزراء لائحة بالهبات، حتى ناخود قرار بمجلس الوزراء 👆 كان جوابو وللأسف أكثرية الوزراء، لأنّو آنذاك وزراء حزب الله ويعقوب الصراف كانو بالخط تبعنا.. 👆 كلُّن ما حدا سأل..؟؟ وكان جواب رئيس الوزراء، إنّو حطيناهُن بالإنترنت!! 😔
– قلنالُن: “الإنترنت مش دولة” في قانون بقول لازم تِجي عَ مجلس الوزراء؟؟😔 وللأسف من بعد كم شهر، لمّا صارت الحكومة غير شرعية (خروج الوزراء الشيعة والوزير الصراف) صارِت تِجي هبات أكثر، وإذا منقرا الجرايد بوقتا، حوالي شي 8 مليارات $ 😯😯
– ولأنّو ما كنا نِحضر قرارات مجلس الوزراء، كانو يِبعَتو قرارات مجلس الوزراء غير الشرعية سنة 2007، وكل القرارات رِديّتُن لأنو ما كانت شرعية.. ولأنو الحكومة كانت غير ميثاقية 🇱🇧

(4) النورماندي
– للأسف كل الهبات، وغيرها متل الأرض بالنورماندي، اللي كلفّت آنذاك نصف مليار $ لردمها.. عمِلو أيضاً قوانين وصارو يبيعو الأرض، والهوا.. ويِطلَعو طلوع بالعمار والأبنية.. وكانت النتيجة صار سعر الأرض 31 مليار $..
– عرفنا بوقتا إنّو في شركة خاصة امتلكتها، وعَم تبيع ممتلكات “النورماندي” 😔
مع إنّو معروف دولياً وأنا عَ إيامي، حاولوا يحطوها باسم الشركة الخاصة، لأنّو آنذاك كان في اتفاق بين الرئيس الحريري والرئيس الياس الهراوي، بما انو ما في مصاري بالدولة، الرئيس الحريري بِجيب شركة خاصة، وبتردُم.. وكلفّت الدولة نصف مليار $.. 😔
– ما في دولة بالعالم تردُم الأرض، الاّ بيَعطو تكاليف الأشغال لقاء بدل.. أمّا الأرض بِتكون للدولة.. 💯

(يُتبع)

https://youtu.be/OLlw17JLWOM