صرخة الأب مارتن عيد: أنا أوّل الخاطئين بين الكهنة واللي بلا خطيئة ليرجمني ويرجم الآباء بأول حجر.. (Audio)

– شاطرين بالتدمير وين الضعف منضوّي عليه.. صلوّ كلنا بحاجة لصلا مكرسين ومنتقدين.. (التفاصيل)

***

مقتطف من عظة الأب مارتن عيد – قداس السلام في دير القديسة تريزيا الطفل يسوع: (سهيلة ٢٥-١٢-٢٠١٧)

ولد المسيح هللويا

الله تجسّد حتى يقلنا..

… لو البشرية من أيام آدم وحواء ، اردتو انّو تبعدو عن الله.. لو انتو بَيْعدتو ، أنا الله جايي لعندكم..

• جايي قلكم انّو هالمرحلة نطوِتْ.. إني ابشركم بفرحٍ عظيم يكون للشعب كلّه..
• من هالمغارة الصغيري بلّش الرب، يقلنا أنا بديّ خلصكم وبدّي حرركم.. ونحنا بعدنا لليوم وللأسف كتير من المرات، ما منسمح للرب يجي ويشفينا..

 

بعدنا لليوم، بدنا يسوع النا بس… بنا يسوع يعطيني هدايا.. ما بعرف صليلو للرب وقول: عطيني انو اتحرّر من الأمور اللي مقيدتني…

أخوتي

• يسوع ما إجا عَ الأرض كرمال يقلنا بس أنا متواضع.
  كرمال يقلنا أنا بحب أولد بمغارة وبفقر..

  يسوع إجا يبدّل كلّ المفاهيم وكل المعادلات

  ، ويقلنا: انا الرب اللي انتو غلطتو بحقي، حجمتوني متل ما إنتو حبيتو كون، انا جايي قلكم، انا هو الرب، عمانوئيل معكم… 

• يسوع جايي ياخود من قلوبنا ومن أجسادنا مغارة الو، لَ يولد فينا وينمى ويكبر، ونحنا نكبر من خلالو.. ونحنا ما عم نسمحلو ، و بعدنا بكل فرصة منحصل عليا، همنا الأول والأخير هوي تدمير الآخر اللي موجود بحياتنا، وهيدا الشي للأسف عم نشوفو بالإيام الأخيرة..

بتألم كتير إنو شوف أشخاص عم يسبّو بالكهنة، وبالرهبان، وبالراهبات.. بتألّم كتير انو شوف أشخاص عم يسبّو ببضعن بعض تيهشمو بعضن بعض.. بس هيدا المشهد منّو من الله..

• الكنيسة بشر صحيح،
  رُعاتها بشر صحيح،
  هنّي ضعاف صحيح،
  ولكن اطلعو بهالسفينة، الكنيسة سفينة، وأنا لمّا بفخّط بهالسفينة بكون عم غرّق حالي كمان.. مش بس عم غرقها للكنيسة.

• مؤخراً طلعت سلسلة رتب والرواتب ، والمسؤولين عن وضع وإدارة البلد غرقونا كلنا سوا بأمور نحنا ما منريدا.. نبشنا على الأضعف، وبلشنا نضرب..

بطبيعة الحال، مين الأضعف؟ هني المؤسسات الكاتوليكية والمسيحية اللي عم تجرّب بقدر الإمكان انها تدير الشعبْ، وتعطي كل ما عندا من مواهب وعلم للشعب..

بدكم تقولو أبونا: انتو الرهبان والراهبات ما بترحمو.. يمكن ببعض المرات بيطلع أشخاص بشذّو عن القاعدة، ولكن ما فيّي إتقبّل من شخص مؤمن، وبقول انو فعلاً “ولد الرب بحياتو” وبقول: “وُلد المسيح” انو يكون عم يسبّ بالكنيسة، وبالرهبان والراهبات، لأنو في أغلاط نحنا كمكرسين مش مسؤولين عنها… انما كلنا كمواطنين مسؤولين انّو نحاسب اللي فوتنا بهالأغلاط.. (مني عم احكي سياسة، عم احكي علم اجتماع).

أخوتي

• بدّي ادعيكم تتأملو يسوع اللي أسّس كنيستو على اشخاص ضعاف، وأراد يكون في كهنة ومكرسين ورهبان وراهبات، أرادن كرمال خدمة شعبو.. وإذا كان في أشخاص ما كانو أمناء على هيدي الدعوة مش انتو اللي بتحاسبوهن.. مش نحنا اللي منحاسب…

نحنا علينا أنّو نصلّي..

علينا من رب الحصاد يرسل فعلة أمينين وقديسين لحصادو..

علينا انّو نشوف الخير الموجود بقلب الكنيسة، قبل ما نشوف الضعف بالكنيسة 

أنا بدّي ادعيكم، وإسألكم ؟

شي مرّة طلع وحكي وقال: متل ما هلق اليوم الأشخاص اللي عم يفظعو على التلفزيونات، ويسبو بالكهنة، شي مرة طلعو وقال:

– في كاهن بيقعد نهار كامل بقلب كرسي الإعتراف، كرمال المؤمنين ، وكرمال خلاص نفس المؤمنين؟؟

– شي مرّة طلع وقال، في كاهن بارع ، وعم يبرمْ بنشاط على مرضى رعيتو حتى يناولن ويوصلّن يسوع المسيح كل أسبوع، لأنو مش قادرين يروحو على القداس؟؟

– شي مرّة حدا طلع وقال من هالسياسيين وهالطبقة اللي عم تجرنا لَ نسبّ بكنيستنا ، طلع قال: في كاهن مش عم ينام الليل، كرمال يبرمْ على الفقرا ويغطيهن، ويجبلن تياب..!

– شي مرّة طلع قال ، إنو في كهنة مُرسلين بلبنان وخارج لبنان عم يتألمو كل يوم، كرمال يوصلو يسوع المسيح لأقاصي الأرض، ويكونو أمينين للرسالة اللي دعاهن الها الرب يسوع؟؟

منشوف وين الضعف، ومنركض إنو نظهرو لهيدا الضعف.. 

منشوف وين منقدر نضرب كنيستنا، ومنركض نضرب كنيستنا.. 

الكنيسة، نعم فيا أخطاء.. نعم فيا أشخاص خاطئين.. وأنا أولهم… ومن منكم بلا خطيئة فيرجم كل كاهن بحجر…

كلنا خاطيين، وكلنا بحاجة لرحمة الله، بس كلنا كمان بحاجة نصلّي لبعضنا بعض.. ونساعد بعضنا بعض أنو نوقف عَ إجرينا… ما النا حق نفخّط بكنيستنا..

ما النا حق انّو ندمّر كنيستنا.. ونغرق كلنا سوا..

وكلنا سوا مدعوين نتعب لَ نحقّق رسالة يسوع، وبلشّت بمغارة، وانتهت على الصليب، والقيامة ، والصعود للسما.. ومنا مدعوين أبداص نغرق بظلام هيدا العلم وفخ الشرير ، يللي هوي بيزرع أفكار التفرقة والشجارات بحياتنا…

حابب قول هيدي الصرخة، والمسيحيين ولاد العدرا ويسوع مُرسلين لنصلّي للأشخاص اللي عم يغلطو بقلب الكنيسة وخارج الكنيسة، وللأشخاص يللي عم يغلطو بحق الكنيسة..

كلنا بدنا صلا،
كلنا بدنا نرجع فعلاً نهيء قلبنا مغارة يولد فيا يسوع.. ل نحقق مشروعو بحياتنا، الو المجد لأبد الآبدين.. آمين..