الأب الياس مارون غاريوس عن معركة المناضلين: ما تزعلو من حكياتي وقفو “تَشتَشة” لولادكن (Audio)

– الحياة هي المسيح، والموت ربحٌ لي.. شو الموت إنك تشنخر وتروح، وتفطس..!!
– أصل البلى المُسايرة.. وما تنسوا تكونو زِلم الله على الأرض
– كونوا واثقين: لبنان لن يهلك أبداً، رح يكون مصدر سلام للعالم، الله اختارو منذ الأزل.. 

***

مقتطف من عظة الأب الياس مارون غاريوس: ( كنيسة سيدة النجاة/مجدلون تشرين الأول 2017 )

• الحياة هيّي: – سلام.
  وفرح.
  ليش؟ لأنو الحياة هيّي المسيح.
  بس تكون الحياة برّات المسيح، كونوا واثقين:
  – قلق + نكد + تعب نفسي + ووجع جسدي + ووجع فكري.. بتصيرو انتو مجذوبين صوب القلق الدايم..

• نحنا جماعة مُرسلين، من عند الله. حتى نعمل معركة.
  لأنو السلام ما بيجي بلا معركة، (إنو تجيب سلام لذاتك، وانت رافعلي إجريك للفلى ..!)
  – إنك عايش مع عيلتك… ما بيجيك السلام..!
  – إنّك بالأخوية.. ما بيجيك السلام..!
  السلام بيجي انك تعمل معركة ضدّ فكرك.. ليش؟
  هون كلمات دقيقة مع مار بولس: بقلنا الحياة لي، “هي المسيح”.
  يعني أنا ما فيشي بهالدني بزكزكني. بصير متل البلاطة قدام إبليس. وبصير متل السيف الحادّ قدام كل معركة للسجود امام الله الآب والإبن والروح القدس
• الحياة لي هي المسيح، والموت ربحٌ لي.. شو الموت إنك تشنخر وتروح، وتفطس..!!
  الموت انك تموت عن ذاتك، تتثبّت ربحك ليسوع.. والا حياتنا بتكون فراغ بفراغ
• الموت عن ذاتك بولّد لإلك شعور انك انت انسان ما بتموت على الأرض، لأنو اللي بتحبو حياتك يللي هيي يسوع ناطرك..

اليوم في عنا خطية عظيمة بمجتمعنا المسيحي:

• بس يموت عنا إم صبية، أو بَيْ، أو شَبْ. أو ولد طفل.. وينو الله، خبروني كيف مات!! عندا ولاد!! ليش؟ وكيف؟؟
  هيدي أكبر جريمة؟ بتقولولي أبونا شعور أم..؟ ما أنا شعور بيْ كمان.. حدا بموت عندي بالرعية، ببكي عليه، هيدا إبني.. !!
  ولكن لا تحزنوا كباقي الناس.. لأنو الرب يسوع المسيح: ناطر امّك طفلك تيستقبلن فوق.
  أنتا عَ الأرض ما بتقدر تقوم بواجباتك الكاملة.. مين بدو يساعدك..!! اللي بدو يساعدك قوة من السما..
• ما تقبلو تكونو عايشين على هامش الحياة، بدكن تعيشو ليسوع..
  بقلنا مار بولس: ولكن إذا كانت الحياة في الجسد تهيئ لي عملاً مثمراً، فلا أدري ماذا أختار…نحنا بجسدنا ما فينا نختار لأنو أنانيين..؟؟ وبقول مار بولس: الأمران يتجاذبان جسد الإنسان (الروح والجسد).. ولكن أشتهي أن أرحل.. وأكون مع المسيح. بقاؤنا بالجسد طبيعي، ولكن عزّة روحكم لله اللي تجسّد فيا فيكم، هيّي أغلى من عقلاتكم..
  – الغيرة والحسد خطية..
  والنميمة خطية..
  النكد.. ما بيعجبنا شي؟؟ أوقات بصير في انتخابات بالأخويات، ليش هيدي؟ كيف هيديك؟ بتصير القاعدة الأخوية قاعدة بربرية، ومين بيعجن العجنة، ابليس.. وما رح يسمحلكم تعيشو بأمان، ولا رح يقبل تتعاونو.. وهون مار بولس بقلنا: أفرح إذا بسمع أنكم ثابتون في روح واحد، ومين مكان مسؤول يكون.
• كونوا مناضلين ومجاهدين، فجرو الضعف اللي فيكم. بس يتغلغل فيكم محبة يسوع، بتنسو انو انتو حاملين جسد، وبتفيقو انكم رايحين حتى الموت، وربح لكم حتى تربحوا المسيح.

هيدا مش شعر من تمي عم احكي..

• لأنو افتخاركم إذا ما كان يسوع هوي أساسو،
  رح يكون يا زعيمكن يا سياسيينكن،
  أو الدهان والبويا ع وجوهكم،
  او مصرياتكم وصراميكم ولبسكم..
  كونو حلوين قدام الله ولكن الجوهر يكون هوي الله والأساس. بدكم تشجعو هالمبادئ بولادكم.
• ولادنا تعبانين… وما بريحّن الاّ
  – كاس الويسكي،
  – و”نايت كلوب”
  – و المخدرات،
  – و”الكزاتير”… والأمّات بقولو: دخلك يا أبونا شو بدي اعمل؟ ابني راح من بين ديّي..
  ابنك ما راح، انتي اللي رُوَحتيه، لأنك من صغرتو “يقبرني تِشَّك بشَّك”تشتشتيه هوي وصغير، صار عمرو 12 هوي رح بِتَشْتِشك الك انتي.. ويحطّك بسابع نار تتألمي فيا انتي يا ام ويا بيْ.. وما تزعلو من حكياتي.. نحنا اللي عم نغلط بمجتمعننا.. نحنا اللي عم نصلي عم نغلط بمجتمعنا.. 

عَ كلام الرب ما تسايرو حدا…

• زعل مين زعلْ، ورضي مين رضي؟ 
  ولادكم، أهلكم، امكم، بيكم، ستكم، جدكم، جوزكم، بيت عمكم وجيرانكم..
  يزعل اللي بدّو يزعلْ.. يسوع قلنا: انتا زايل وبيت عمك زايلين.. والسما زايلة.. إمّا يسوع، وإمّا ما حدا…
• هون مار بولس بينهي حديثو وبقلنا: انتبهو لا تخافوا شيئاً من الذين يقاومونكم، ان ذلك دليلٌ على هلاكهم. يا بتهلكو انتو وياهن بالمسايرة، يا بتربحو كلكم سوا بنعمة الله.

إذا سألوكم سؤال: مسيحي نبي أمّا الله، بمجتمع مش مسيحي، شو بتقولو.. !!

• وإذا قررو يقطشولكن رقبتكم شو بتقولو؟؟
  هيدا يسوع اللي فيكم، هوي البيْ والإبنْ.. هوي الخيْ والصديق، وهوي الله اللي صار حضن ام، وحملكم بين ايديه، بين امو العدرا مريم… من دون المسيح لا تستطيعون شيئاً. وُهب لكم من أجل خلاصكم. ويسوع وهبكم روحو القدوس من أجل شفاؤكم وبطولتكم. شو حلو الله يصير انسان كرمالك يا إنسان.. يسوع وحدو اللي بيشفي..
• أرجوكم يا زلم، انتو زلم الله على الأرض.. وزلمة الله ناعم بالمحبة.
  انتو موجودين رسالة على الأرض… ماذا ينفع الإنسان لو ربح دولارات العالم كلّه وخسر نفسه.

لبنان

• وصية مار بولس ويسوع بقولولكم: لبنان ناطركم.
  العالم كلو ناطر لبنان.
  إذا انتو ما عرفتو قيمة لبنان، وكنتو قديسين بأرضو، رح يكون مصيركم مصير الهالكين بأرض لبنان.
• بأرض لبنان ما رح يضلّ في انسان شرير.
  لأنو لبنان رح يكون مصدر سلام للعالم.
  لأنو لبنان اسمو عدرا مريم – أرزة لبنان.. 
  لأنو لبنان الله اختارو منذ الأزل، 
  لأنو لبنان الله أراد انو ينبنى هيكلو من أرز لبنان..
  كونوا واثقين: لبنان لن يهلك أبداً، ولكن شعبو يمكن يهلك، لأنو شعبو متفلسف ومتكبّر، وأناني، وما بيقبل يكون خادم خاصة المسيحيين.. بوصيكم حبو الله وحبّو أرضو تتكون قديسين آمين.

رصد Agoraleaks.com