Agoraleaks Agoraleaks
– قاموس الخوف مش موجود عنا
مقتطف من حديث رئيس بلدية القاع بشير مطر: (19 آب 2017)
- منوجّه تحية كبيري للجيش، قيادة وضباط وأفراد ورتباء،
بالنسبة لأهالي القاع، مش جديدي عليون، يكونو كلن بتصرف الجيش
الدم ما بيغلا ع الجيش. هيدا جيش بلادنا، وجيش الوطن، وعم يحرّر جرودنا - عم نجمّع معلومات من الشباب القاعيين، وغير القاعيين اللي بحبو يتبرعو بالدم.
ما عنا امكانيات يصير في بنك دم وتخزين.
إذا عزنا دم لا سمح الله، منوجه الناس ليتبرعو دم - اهالي القاع خلية نحل، وكل مين باختصاصو،
– في مين عم يأمّن ماء
– في مين عم يأمّن أكل
– في مراقبة للطرقات، سيما تحركات السوريين للحدّ من أي خرق امني ممكن يصير، بالتعاون مع الأجهزة الأمنية - بطلب من كل الناس والعالم، يساعدونا، وما يكونو حجر عثرة. وبالنهاية اهل القاع، بس تحزّ الحزّة، دمنا للجيش اللبناني، اللي عم نقدمو كرمال ولادنا ومستقبلنا ووطننا
- متل ما عنا 200 شهيد عَ مذبح الوطن.
عنا 500 اصابة معوق من نتايج الحرب اللبنانيي، ومعظمن من الجيش اللبناني.
- الناس متشوقة تبلش المعركة، ناطرينا بفارغ الصبر لحتى نحتفل، ومتأكدين رح نحتفل بالنصر نحنا والجيش اللبناني بساحة مار الياس، وساحة القاع، ومطرح ما فجرو الإنتحاريين، ورح نقلن: ما حدا بيقدر يفرض طريقة نمط علينا نحنا. ونحنا لبنانيين أولاً وآخراً
- المعنويات بالسما، ومرتفعة.
قاموس الخوف منو موجود بقاموسنا، حذرين وعم نحاول نحمي ضهرنا، وضهر الجيش - في عنا لعنة الجغرافيا وعانينا كتير من وجود النازحين،
عانينا اقتصادياً، ومعيشياً، وأمنياً وقدمنا شهدا وجرحى، ومنقلن نحنا لعيونكم شهدائنا الجيش اللبناني رح يردّ الأرض من داعش، وان شاء يكون هالدرس، الدرس الأخير لحتى ما حدا يلعب بالأمن بلبنان. هيدي الأرض الها صحاب. وهيدي الأرض في جيش بيحميها، وفي شعب مستعد يموت كرمالا. في عنا دولة. وفي عنا رئيس قوي، وفي عنا حكومة. - منتمنى من الحكومة تقوم بواجباتا، وتطلع بهالمناطق: رأس بعلبك – الهرمل – القاع بخصوص الكهربا والماي والمستشفيات، والدفاع المدني ولكل الخدمات من طرق وغيرا..
رصد Agoraleaks.com
