Agoraleaks Agoraleaks
– صلوّا واعترفوا..
رسالة رامي شقيق رنى، عن حالتها الصحية:
- المجد لله أخواتي، صباح يسوع..
بحب طمنكم انو “رنا” وضعا مستقر، بعدا على حالا.
البنج طلع من جسما، بس بعد ما وعيتْ. ناطرينا انو توعا.. يمكن اليوم ويمكن بكرا، ويمكن بعد جمعة.. يمكن بعد شهر. - هيدا الشي بايد الله، وهيدا الشي بيرتكز عَ صلواتكم،
مع انو بلشت تتفاعل معنا بكم شغلة صغار حلوين،
وهيدا الشي عطاني أمل كتير كبير، والحكيم أكدّلي انو عم تسمع كلشي،
عم فوت لعندا، وخبرا قديه في ناس بحبوها، وخبرها قديه عم تصلولا، قديه خايفين عليا،
وبذات الوقت عم خبرا، قديش يسوع بحبا، وقديه هيي بطلة.. - بتمنى عليكم جميعاً، تضلكم عم تصلولها، لا بل تكثفو الصلوات والقداديس وساعات السجود، والمسيرات والمسابح..
لأنو “رنا” بحاجة لصلاتكم اكتر من أيا شي تاني…
حالياً بما انو طلع البنج من جسما، الـ”tube” عم يزعجا بشكل رهيب.
كتير كتير عم تتعذّب من الـ”tube” وما فينا نشيلو، طالما ما في وعي 15 ساعة من اصل 24 ساعة متل ما عم تقول الدكتور، وهيدا الشي عم يعصبا كتير…
وعم تعمل agitation، عً الأرجح يكونو “كرايز” تعصيب، اكثر منو “هزات حيط”… - بصراحة عم يطلع كتير خبار،
ساعة بقولو رنا وعيت، ساعة بقولو انتقلت لجوار يسوع، ساعة بقولو شي تتاني
بدّي اطلب منكم إذا فعلاً بتحبوني وبتحبو رنا، ما تسمحو لحدا يجي يحلّل من ذوقو…
ولا يجي حدا يكب كلمة من راسو، من دون ما يتأكد منها، نحنا بالمستشفى، وفي كتير أمور ما تأكدنا منا..
عم يوصلنا أخبارن عم توتّر الجو، وعم توتّر العيلة، وكل الموجودين…
بليز، ما تسمحو ابداً، يستعملو رنا، تيقولو عرف خبرية قبل غيرو… انو عم يعمل “سكوب”…
بالعكس بس يجي حدا يخبركم خبرية، قولولو صلّي لرنا.. وصلّي لأهل رنا، حتى يقدرو يكونو حدّا، لأنو الوضع منو هيّن… - انا أكيد كلشي رح يكون منيح بقدرة يسو‘ وبفضل صلاتكن، ومحبتكن
صلو قد ما فيكن… واللي بيقدر يعترف، ويطهّر قلبو، لو صرلو نهار معترف، أو سنتان أو تلاتي، يروح عَ كرسي الإعتراف… ويقدّم قلبو ليسوع، كرمال قلب رنا… إذا بتحبو تبلشو نصلي تساعية “مار روفائيل” (شفاء الله) عَ نية رنا.. - إن شاء الله قريباً بتقوم وبتتشكركم كلكن سوا،
ونشالله يكون عندا شهادة كتير كبيري تخبرنا ياها…
نهاركم مبارك
رصد Agoraleaks.com
