الأب مروان خوري عن “الصعود” : الله ما ورتنا اراضي وممتلكات… ورتنا “روحو” القدوس (Audio)

– يسوع مش خبرية حَيْ.. اليوم اللي بيتفرّج علينا، ما كتير بينشدّ..
– الله ما عندو مشكلة بخطاياك وماضيك دفعْ حقن عَ الصليب روح لعندو..

مقتطف من عظة الراهب المريمي الأب مروان خوري في وادي قنوبين – بشري (26-05-2017)

• مع الروح القدس بتستعيد بنوتك، بصير عند بَيْ وانت إبنو.
  قبل كنت انسان مشرّد عَ الأرض، ما كان في حدا بيعتني فيك.. متروك متل الولد المشرّد
• ميشان هيك بس تعمّد يسوع، وكلها كانت احداث مسبقة تيفرجينا الرب، بس بدنا نعيشا بحياة الكنيسي شو بصير،
  بس تعمّد يسوع عَ نهر الأردن، بقولو نفتحت السما.
  شو يعني؟
  يعني قبل العماد كانت السما مسكرة،
  والسما مش معناتا مكان مسكّر وبيفتح
  كان الإنسان عايش بلا نعمة الله، ولأن الله غاب عن حياتي، اجا الشرير وحطّ ايدو عَ مقدراتي،
  – عَ ذهني (زرع افكارو الشريرة)
  – حطّ ايدو عَ ارادتي، وصار يجبرا تعمل الخطية
  – حط ايدو عَ جسدي، وصار دايرو، بدل يروح للطهر رايح للدنس
  – حط ايدو عَ حريتي، صار يخليها تنقّي غلط..
• اجا الرب، وأرسل روحو (الروح القدس)
  متى اجا، متل النور بس يجي، مين بفلّ؟ العتمة
  النور أقوى، ميشان هيك بحضور الروح القدس، اللي هوي نور الله، ظلمة الشرير بتبدّد، وساعتا منصير عايشين بالنور، وساعتا دماغي ساعتا بيعرف كيف لازم يفكّر، وارادتي شو لازم تختار، وحريتي شو لازم تنقّي.. وشو غاية جسدي ونفسي وروحي. وشو مشواري على الأرض

• بس تستنير بالروح القدس بتصير تعرف تستعملن،
  لأن الإنسان ما بقا في الله بقلبو، ليكو كيف عم يستعمل الطاقات،
  بيخترع سلاح، بيخترح حرب وبيقتل، وبيعمل اجرام.. هيدا غياب الله
• نحنا بأمس الحاجة للروح القدس، قال يسوع: بقلن للرسل كانو عايشين معو: “الآن لن تفهمو شيء”
  كانو عم يشوفو الأحداث وما كانو عم يفهمو، وبالفعل ،كان الرب عند كلمتو، لأنو بس اجا الصليب، هربوا..
  لو كانو فاهمين حقيقة الخلاص تبع يسوع، ما كانو هربو
  كانو عايشين بظلمة الخطية، قلن: الآن لن تفهمو شيء، لكن
  سأرسل لكم البرقليط (كلمة يونانية تعني الروح الت تُعزّي، يشدّد، يقوّي)
• هيدي هدية يسوع لإلنا “الروح القدس” هيدي الورتة للمؤمن،
  متل البيْ قبل ما يغادر الأرض بعيّط لولادو، وبقلن: بورتكم شو عندي..
• الله ما عندو أراضي وممتلكات يورتنا،
  ورتنا روحو، بهيدا الروح بتقدر تستعيد أبوة الله، وبنوتك لالو
  وبترجع بالروح القدس تستعيد سلطانك، بتصير سيّد، وصاحب سلطة
  أنت تأمر والكون بنفّذ…

الجوهر

• ميشان هيك نحنا بعد ما حسيّنا بجمال المسيحية، لأنا بعدنا لاقطينا إسم…
  بعدنا آخدينا للمسيحية خبرية. بعد ما فعل فينا الروح القدس
  بس يشتغل فيك الروح القدس، ساعتا بتعرف شو عطاك الله
• الروح أخدتو بالعماد، ولكن بعد ما فعلتو، لأنك لم تنتظره… قلبك ما عم يرغبْ فيه..
  قعدو الرسل 50 نهار، يصلو ليل ونهار… ينتظرو حلول الروح
  ما بيجي الروح إرتجالي… هوي فيك بالعماد، بس تيولع بمواهبو،
  بدّو صلا وقداس، وقربان، واعتراف، وتنقية من الخطية، وبدّو رغبة وصراخ من القلب “يا رب ولّع روحك فيّي”
• لما ولع الروح بالرسل، (أعمال الرسل الفصل 19)
  بقول النص كان يقطع بطرس بالشارع، خيالن بس يجي على المرضى بالشارع يصحّو…
  اخذوا المناديل، ومسّوها على جسد بطرس، وبولس، ووضعو المناديل على من مستّهم الأرواح، كانت الأرواح تهرب
• بالروح القدس، ما في شرّ بيوقف قدامنا
  بالروح القدس عمل اول وعظة مار بطرس.. 3000 انسان تعمّد من بعدا
  قوة الكلمة بتغيّر القلوب… هيدا الروح 12 صياد سمك راحو قلبو الكون
  لا متعلمين ولا حاملين شهادات، ولا أصحاب نفوذ ولا سلطان،
  بطرس اللي هرب ونكر المسيح قدام جارية، راح عَ روما وقلب الإمبرطورية الرومانية عملا مسيحية
• بدكم تقولولي بقوتو بطرس عملا… هيدا الروح القدس اللي بينقصنا، وعنا ياه.
  وبس نوقع بضعف وبمشكلة، منروح لعند كل العالم، الا لعندو…
  وما منعرف نصليلو ولا نستنجد فيه
• بقوة الروح فيك تستدعي يسوع. قلك الرب: باسمي حطو على التجارب وع يللي عم تمرق فيه، وشوف هالإسم شو بتقدر تعمل فيه
• يسوع بس صعد عَ السما، بكو الرسل.. وين رايح وتاركنا،
  قلن لن أترككم يتامى… رح ابعتلكم روحي، ومن خلالو رح تصيرو انتو أنا، تصيرو مسحاء أُخرْ
• قلن: أن تؤمنوا بي، تصنعون أعظم مما صنعت،
  قديه عمل يسوع بالإنجيل، الروح القدس ان كنت تؤمن به، بيعمل اعظم مما اللي عملو يسوع

الظروف

• ما فينا نزرع صبيّر بعيون سيمان، ما بتعيش؟
  مش مناخا..
  الروح القدس الو مناخ تيربى ويتفجّر فيي بمواهبو
• ما فيك تربي الروح القدس، بلسان ما بخلّي حدا من شرّو
  بقلب مليان من الخطية ما بيعترف
  بانسان مئذي…
• اجت حبّة القمح بين الشوك، اجت بدها تطلع، خنقا الشوك… فطسها
  الروح القدس بدّو يربى فيكم، بدو يحسسكم جمال العطية اللي عطايا يسوع
  انتو ابطال بيسوع، لكن صرتو متل البقية ضعاف، مش عارف بمين بدك تتلقط وبمين بدّو يخلصك؟
• عيد الصعود…

• قعدو الرسل 9 أيام عم يصلو بالعلية مع العدرا،
  عاشر نهار نزل الروح، وفجّر البواب، وطلّع الضعاف (صيادي السمك) حكماء وأبطال قلبو الكون والعالم
  أوعا تفكروها هيدي خبرية صارت من 2000 سنة
  الرب مستعدّ يعملا معك، عملو تساعية وصلو.. وفوتو باختبار مع يسوع ابعد من خبرية منسمعا من الأبونا، او وعظة…
• يسوع حيْ…
  الروح القدس بخلّي الله منظور.. بالأحداث بالرموز والعلامات.. 100 طريقة وطريقة..
  وبتحسّ انك منك وحيد. انت ابن الله
  ما عندو مشكلة بخطاياك، ولا بماضيك.. دفعْ حقن عَ الصليب
  تعا لعندو وبس توبْ، وقلو ياهُن، تَ يمحيهم بدمو
• بالعهد القديم، بقولو: الله يُغلق ولا أحد يفتح، والله يفتح ولا أحد يغلق
  الخطية اللي بسكّر الله عليا، الكون كلّو ممنوع يحاسبك عليا
  ما حدا الو معو؟ دفعلك حقااااا
  وبس الله يفتح باب بدربك، ما في قوة ولا جهنم بتقدر تسكرو

• تأملو بهيدي الكلمات، تأملو بالعمادة، وحاش عايشين متلنا متل بقية الناس اللي مش عارفين يسوع
  شو قال الإنجيل؟
  اذهبو اكرزوا في كل مكان.. والرب كان يعمل معهم، ويؤيد الكلمة بما يصحبها من الآيات
  كانو يشوفو من خلالن انو يسوع حقيقة،
  اليوم اللي بيتفرّج علينا، ما كتير بشدّو يسوع.. لأنو ما عم يشوف فينا شي مغيّر عنّو
  لأنو بعد ما تبدل فينا الإنسان العتيق لإنسان جديد
• العدرا بتوصينا، نطلب الروح القدس عَ طول، هوي اللي بخلّي الصلا حلوة
  وبخلّي الصلا فيها فرح.. وبخلي يسوع بس تحكي عنو مش أيديولوجيا ولا لاهوت، بتصير تشوفو بأحداثك الحلوة والمرّة
  الله بيقطع بالصليب..
  صلو للروح القدس، واستدعو.. لإلكم ولولادكم.. ليسكن بيوتكم حتى يحوّل بيوتكم الى عليّة وعنصرة آمين
• نؤمن باله واحد

رصد Agoraleaks.com