بالفيديو – الأب الياس مارون غاريوس عن عيد “valentine’s day”: بِ ت2 بلبنان كان عنّا 8000 حالة طلاق.. هيدا هوّي الحب الكذاب.. 😉

– إنتو الأهل نزعتو ولادنا.. “ربّيتوهُن عَ الدلع والغنج”.. وعَ التكبّر.. 

***

عظة الأب الياس مارون غاريوس عن الحب الأعظم الحقيقي، بمناسبة 14 شباط… (مجدلون)

قَلنا يسوع ما من حُب أعظم أن يَبذل الإنسان نفسه عن أحبائه..

هوي قلنا: نحبّ من كل قلبنا.. لأنّو المحبة لا تنتفخ ولا تأتي قباحةً.. المحبة لا تظنّ السوء، ولا تحكمْ على أحد..

بِترجّاكُن تِقبروني.. نحنا ثوار حب، نحنا منّا ثوّار كبرياء.. شهر تشرين الثاني بلبنان كان عنّا 8000 حالة طلاق.. هيدا هوّي الحب.. هيدا هوّي الحب الكذاب..

شهر تشرين الثاني 8000 آلاف حالة طلاق، لأنو ولادنا “يِقبروني، أنا ربّيتو على “البيبروني” والعِلكة.. يِقبرني أوعا حدا يزعلّي ياه.. لأنو إبني وبنتي صارو عصافير الجنّة، بطلو عصافير الحب مع يسوع..

طيّارناهُن عَ الجنّة.. يا عيب الشوم عليكم إنتو.. إنتو.. (الأهل) لأنو إنتو ربّيتو ولادكم عَ الدلع والغنج.. وإنتو علّمتوهم وقلتولُن: إذا حدا قلكن شي، لَ كسّرلو إجريه، وطملّو مخّو بالتراب.. إنتو الأهل وإنتو الغلط بالبداية..

أوعا تِزعلو منّي.. يرحَم مَوتاكُن..

إضافة الى هيدي التربية، عنّا حالة الكبرياء، يللي بتِمنع الإتفاق بين الرجل والمرأة.. هيدي خطية.. أطلب منكم “الحب إنّو تِحمل الصليب، وتبذل نفسك، متل مار مارون وتلاميذو، قرروا يموتو كرمال المسيح، ويِحملو صلبان الإضطهاد، حتى يكونو مع المسيح”..

أنا اليوم بدّي قول ليسوع، بدّي حبّك، وبدّي عيِّد معك يا رب، عيد ثورة الحب، وبقول ليسوع: “أنا حيث أنت يا إلهي، لأني أحبك“.

ربي يسوع اليوم سنولد من جديد، ونترك عالمنا العتيق، ونحمل الإنسان الجديد، قلتنا يا رب، “إخلعوا عنكم الإنسان العتيق، الذي أفسدته الشهوات الخدّاعة، في سيرتكم الأولى” ؛ وقلتلنا يا رب مع مار بولس: تجدّدوا في أذهانكم، تجدداً روحياً، والبسوا الإنسان الجديد، الإنسان الذي خُلق على مثال الله، في البرّ وقداسة الحق..

آمين“.

https://www.youtube.com/watch?v=kJWHuUdBEyc