Agoraleaks Agoraleaks
– رح إزعح الرئيس عون كتير بعد الإنتخابات.. والإعلام مضروب عنّا…
***
مقتطف من حديث الملحّن والمغني سمير صفير ، لبرنامج “NEXT” حول حملة دعوة اللبنانيين للإقتراع في الإنتخابات النيابية: (نيسان 2018)
يُسأل: مَن يقوم بحملات للإنتخابات، ويعطي رأيه السياسي، رَح يِنتخِب أو لاق؟ يقول:
هيدي الحملِة عمِلتا ما في منّا مردود مالي. بالعكس دفعنا من جيبتنا، انا و”جارودي ميديا” ونزار فرنسيس، وداني حلو، ووليد ناصيف، وجو خوري (مموّل).. عنّا قضية مشتركة تقول: “ما في ثقافة إقتراع بلبنان، وهيدي من واجبات وزارات الثقافة والداخلية والإعلام..
أنا طالع من 5 – 6 سنين ، من حالة يأس بعد 30 سنة من تعب وشغل فنّي.. لقيت إنو أحوال المبدعين مدمّر، من أيام السيّد درويش.. أنا قِلت إنّو السبب هوّي تركيبة دولتنا..
نحنا نظامنا برلماني، ويعني هوّي بِطلّع السياسيين، وممثلي الشعب، ولازم يعرف الشعب إنّو النائب كتير مهم.. عَم يحطّ الشعب 127 نائب هنّي موظفين لإدارة الدولة، حتى ينظمولو حياتو… إذا إختارُن غلط فات بالحيطان، وإذا إختارُن صح صار بالقمر..
الحل
واللي يتهجّم عَ السياسيين، بقلّو “البَزقة” عَم تِجي على لحيتك.. في حل. لأنّو اللي بِقول مافي حل يعني يئسان. الحل بالوعي وبتحرير كل شخص نفسو، وإنّو يِفتح البِرداية حتى تِضرب الشمس وتكبّ أشعة تطهير.. وتشيل حقدك، وتشيل المِتل اللي بِقول: نكاية بجاري بِحرق شروالي..
لازم نتعلم إنّو بدنا نزرع بس ما بدنا نشوف… لأنو الأغلب مش قابِل يزرع وما يشوف..
المشكلة هيّي باختيار ممثلي الشعب، وقبل كانو يتحججوا إنّو هنّي مركبين قانون الإنتخاب، حتى يِجو بِمَحْتَلِة، اليوم هيدا العهد هوّي عهد نور. وعهد حضارة.
هيدا العهد عطا قانون، وأنا كتير بِقعُد مع فخامة رئيس الجمهورية، بِتنوّر منّو من وقت، وأكتر شي بايام الرابية. اليوم سيّد العهد إنسان حضاري يعشق الفن، ويعشق كلشي إسمو حضارة، لذلك أنا عندي أمل مع وصوله، إنّو في أمور بدنا نحققّها، وما حَدن غيرو بيِقدر يحققا، لسبب بسيط، لأنو ما حدن عندو إيمان من كل رؤساء الجمهوريات حتى الغرب بالفن.. حتى الغرب، “بيتهوفن” و “بيكاسو” رِبيتْ بقصور الملكية في بلجيكا والنمسا وإيطاليا وفرنسا واسبانيا.. وكان التمويل يأتيهم من الأسر المالكة التي تحبّ الفن..
هنا في الدول العربية لا يوجد رئيس يحبّ الفن، عبد الناصر صالح أم كلثوم وعبد الوهاب…. ورؤساء العالم العربي ما يهمّهم هو: المازوت والبترول والسلاح، لذلك شحّت الفنون. فالطَرْطَقة كانت، ولكن الفن الجيّد أكتر..
عون
رح إزعح الرئيس عون كتير بعد الإنتخابات، بدنا قانون يحمي الملكية الفكرية، وموقّع من مجلس النواب، ويتضمّن عقوبات لسارقي الفن، كعقوبات سارقي البنوك.. وهذا الأمر يمكن تحقيقه إذا في نور وحضارة. ونحنا بلبنان معروف بوجود حضارة.. وإذا هيدا العهد ما قِدر عملها، بأكد ما حدَن رح يِعملها.. وحِكيت وزير الثقافة غطاس خوري، واجتمعت به الى جانب المحامي وليد أبو فرحات، المختصّ بهيدا الموضوع.
القانون موجود بمجلس النواب، ولكن للأسف مسَكرين القفل عليه..
أي بلد تذهب منه الحقوق، شركات الموسيقى العملاقة تهرب.. اليوم إذا الدولة تعلن انها ليست على استعداد لحماية المصارف في لبنان، بيِبقى في مصرف بلبنان.. وهذه الشركات الضخمة كانت على إيام الملك فاروق في مصر، وكانت الأمور جيدة بس كان الإنكليز عَم يِشتغل، ولكن بس إجو استلمو العرب، دمرّو الدِني.. متل عادة “التتر” بس تِقطع بشي حضاري، تحولّه ليباس..
بدنا نِخلص من هالتهمة، نحنا وخصوصةً اللبنانيي، عنا حضارة، بدنا دولة قانون. والقانون للضعفاء كما الأقوياء.
اكتشفت بعد 30 سنة، انّو ما في حدا مارِس الإبداع، الاّ مات فقير، واللي إستعملو إبداعو إغتنو.. اكتشفت لازم نصلّح السياسية، ومش ناوي إشتغل ببلاش الاّ للوطن.
مع إحترامي لبعض الإعلام. وهيدا رأي فخامة الرئيس، الإعلام مضروب عنّا 80% ، ومِبني على الإشاعات. اكذب ثم إكذب، ثم إكذب، فتصبح حقيقة.
جعجع
مع الإعلامي رالف معتوق ضمن برنامج “Spot On” قلت: غُفِرت خطاياه للدكتور سمير جعجع، بعدك على كلمتك؟ إيه طبعاً كِل ما هوي ماشي مع العهد، ومؤمن إنّو اللي بيِشلح تيابو بيِبرُد، بكون نغَفرِت خطاياه، يعني متل ما مكتوب بالإنجيل عن “عودة الإبن الضال” ، وندَبح الو العجل..
المطلوب التصويت بالإنتخابات النيابية، حتى لو بَدّك تحط ورقة بيضا.. لأنو بِفسروها مواقف مؤيدة عَ سياستن.. صوتو وشاركو، وإذا ما شاركت، خراس، وما بقا تِحكي سياسة..
رصد Agoraleaks.com
