خاص – “الكلمة”: رحلة صيد لصديقين.. (Audio)

 ✝ حتى يكون صومنا الو معنى.. (مارينا شليطا) 🙏

صديقان بيلتقو ببعض، بعد وقت طويل، وترافقو برحلة صيد صوب الضيعة..

استقبلوهم الأهالي وإهتمّوا فِيُن… ولمّا نامو و وِعيو الصبح ، قعدو على الطاولة سوا..

قال الأول للتاني: لازم ناكول، مشوارنا طويل..
جاوبو: انا ما رح آكول لأني صايِم، وديني ما بيسمحلي آكول بهيدا الوقت..

بِقوم التاني، بضبّ زوادتو..

بيتفاجأ الأول، وبِقلّو: انتا شو دخّلك؟؟ ما بدك تاكول!! ليه ضبيّت الزوادة..!!

بقلو: صحيح ديني ما بْيِمنعني آكول بهالوقت، بس أنا ديني ما بيِسمحلي آكول وخيّي جوعان…

***

تعوا اليوم بهالصوم، نهتمّ اكتر بمشاعر غيرنا وجوعُن..

قديه منلتقي بأشخاص جوعانين؛؛

• للحب،
• للنجاح،
• للإهتمام..
  ويمكن لأمور أساسية بحياتن، ونحنا منصير نستعرض قِدامُن حياتنا بأحسن وأكمل وجه..

تعوا اليوم ما نسكّر عينَينا عن إحتياجات وجوع الآخر اللي حَدنا، حتى يكون صومنا الو معنى..