الأب طوني خضرا: “الفوروم” سيعرض 380 وظيفة من 21 ل 25 شباط.. (التفاصيل – Audio)

ورا “WhatsApp” الزبالة، لبنانيي بطلّت ترجع.. بتمنّى وقفة ضمير
– البلد اللي سكانه 3 ملايين ونصف.. بحاجة لَ 55 جامعة!!

***

مقتطف من حديث رئيس إتحاد ” أورا ” الأب طوني خضرا، لقناة “LBC”: (شباط 13-2018)

وجع الناس

الله بيشهد، ما تتصوّر كل يوم قديه عم اسمع شباب عندا ظروف قاهرة ببيوتهم… بعمل زيارات للفروع بالمناطق، برجع عم لَمْلمْ حالي، إنطلاقاً من الرجاء اللي عطانا ياه الله، حتى استمر…

أوقات بنكسر مع كنيستنا ومع دولتنا، ومع مجتمعنا، لأنو موقفنا بكون تنظير، اكتر ما هوّي عملي.. الوجع تبعي إنّو بِسأل ذاتي، لماذا لا يكون ذات الشيء عند رجل الدين أو رجل السياسة.. كيف بيقدرو ينامو وفي ناس ما عم تشتغل؟؟

صرخة بطلقها، بين أوساط الشباب في بطالة نسبتها 60%.. الأسبوع الفائت كنت في بلجيكا، التقيت اكتر من 200 رجل اعمال لبناني، في عالتين كانو جايين مع ولادن، قرروا ما بقا يرجعو، من ورا “الواتس آب” تبع الزبالة، او عن عجقة السير.. ما هيدي الواتس آب عم تبرمْ الكرة الأرضية…!!!

بلدنا مش بس بالداخل عم نئذيه، اللي عم يطلع من هون للخارج، عم يضرّ بنظرة لبنان.. وبالتالي بدها حقيقةً وقفة ضمير.. أنا بس تقلي الناس أبونا، يعني بيّي.. شو يعني هيدا لقب، او بدّي إسمعن… !!!

مطلبين:

1) إقترحت من خلال وسائل الإعلام، بتأسيس لجنة وطنية فقط مهمتها الحفاظ على اليد العاملة اللبنانية مهما كان الثمن.. من خلال :

  • القوانين،
  • تطبيق قانون مع الدرك
  • اقفال محلات الغرباء
  • عدم عمالة الأجانب..

2) اطلب من الحكومة اللبنانية الاهتمام بالشباب، من خلال تخصيص أكثر من اجتماع لمجلس الوزراء لمشاكل الشباب ومواجهة البطالة، ولهذا السبب أقمنا “الفوروم” برعاية رئيس الحكومة سعد الحريري.

سؤال

هل البلد الذي سكانه 3 ملايين ونصف.. بحاجة الى 55 جامعة، لتعليم طلابه..!! هيدا سؤال وما بدنا نقرّب عَ حدا..

  • اليوم عنا دراسة واقعية عن سوق العمل، شو بدّو حاجات… الطلاب والشباب عم تتوجّه لإختصاصات، بنتيجتها عم يكونو مشاريع عاطلين عن العمل.

بدنا نقرّر كلبنانيين نبني بلدنا، أنا كان عمري 12 سنة، وقت شتغلت بالعمارة، كنت بصف 6eme وقت بدي إدفع قسطي، كنت أشتغل بالصيفية، متل السوريين اليوم بالعمار… هلق باخدك عَ الزلقا وجل الديب بفَرجيك البنايات، يللي أنا زاقق البلاط على الطابق العاشر، كل ما بمرق رايح ع شغلي، بتعنيلي كتير البناية، لأنو أنا شاغل فيا..

وقت أنا بعمّر بلدي، وبعملّو السنكرية، والكهربا، والبلاط…. أنا مثلاً أبونا كنت عايش بعيلة من 6 شباب، كلّن بيشتغلو إلاّ مهندس الإتصالات، والأربعة البقية النجارين، بقولولي جبلنا نجار حتى نعطي معاش 2000$ شهرياً..

إذا عندي مثلاً مشكلة طبية أو هندسية، بلحظة بلاقي 20 طبيب أو مهندس… إذا في مشكلة سنكرية، أو بدنا نعمل ورشة صغيري، ما بتلاقي… طيّب نحنا اليوم كجامعة نشتغل عَ الموضوع، وبدل ما نقول عن الطالب نجار، منقول: مهندس ديكور… يعني فينا نلعب على الإختصاصات…

إذا اليوم تبنّت مؤسسات، بأكّد انو في كتير بيشتغلو.. مؤسسة سنكرية، بدها مدير، وبدها سكرتير، وبدها محاسب وتقني… يعني يللي بدّي قولو، عنا فوضى عارمة.. كلنا سوا منتقاتل عَ الطلاب مين بدّو يعلمهم بأي جامعة، بس ما حدا عم يقول للطالب، إنتا إذا فتت على هيدا الإختصاص، رح تتطلع مشروع عاطل عن العمل…

الفوروم

كلفة هيدا الفوروم، من أصل 400 الف $ عنا مداخيل 100 الف $.. شوف قديه عم نحاول نشتغل، حتى نقول حرام ما نعمل ورشة وصرخة حتى نقلّع…

بالفوروم عم نشتغل بموضوع الإختصاصات..

في بروكسل تفاجأت بوجود طرقات تعبانة.. سألت طبيب لبناني عن الموضوع قلي: أنا عضو بالبلدية في قرار ما منزبّط الطرقات، ما زال في شخص فقير… لأنو الإنسان أهمّ من الزفت والطرقات… ليه تفكيرن؟ وهون بلبنان، ما بيعنيلي إذا مات 100 شخص، اللي بدّن يترشحو يتفضلو يعملو مواضيع شبابية…

كنا من 16 سنة، نعمل معرض كتب وأمور ثقافية، وصلنا لوقت انو المفروض نخدم الناس، ميشان هيك، إتحاد “أورا” يللي بضمّ 4 جمعيات:

1) جميعة لابورا
2) أوسيب لبنان 
3)
نبض الشباب
4)
أصدقاء الجامعة اللبنانية

اليوم نحن نقدّم حوالي 40 خدمة بمكاتبنا للشباب. وهالخدمات تتراوح بين التوظيف والتدريب، لتأسيس تعاونية، او نادي، او جمعية… وسميناه “طاقات”، لأنّو الشبْ اللي ما عندو شغل، هوي طاقة. والمؤسسة اللي بتقدر توظّف شبْ، طاقة. والتعاونية يللي عندا إنتاج رائع، طاقة….

أقسام الفوروم:

1) معرض التوظيف: 

مؤسسات كبيري تشارك، ومصرف لبنان يقدّم قروض للشباب الجامعي.. وفي 50 مؤسسة تجارية، كل مؤسسة رح تقدّم 3 فرص عمل… (150 وطيفة) وبعتقد رح يكون في 380 وظيفة حاضرة..

2) المؤسسات التي تُعنى بالتوظيف في الدولة اللبنانية:

ستشارك 12 مؤسسة، لتدلّ الشباب على وظائف قوى الأمن الداخلي، والجيش وأمن الدولة، وأمن العام.. وبيقدرو الشباب يتسجلّوا في الفوروم..

3) رح يكون في حوالي 85 تعاونية منتجة، عندن مشاكل بتصريف الإنتاج، منقدر نساعدن بالتصريف… وعنا 43 تعاونية حرفية منأمل دعمها حتى تضل مستمرّة..

4) رح نجيب أكتر من 10 مؤسسات محلية ودولية، حتى يعرضو لهيدي النوادي والمؤسسات والكشافة والجمعيات والتعاونية، شو عندن تمويل لسنة 2018، حتى يستفيدو مباشرة منهم…

المعرض من 21 – الى 25  شباط 2018، من 10 صباحاً الى 10 مساءَ، بـ”الفوروم دي بيروت”…

وقت أنا بقدر بـ”لابورا” أمّن 4 أو 5 آلاف فرصة عمل بالسنة، وهيدي شغلة منها صعبة، نحنا عنا حوالي 2400 شركة بيتعاطو معنا يومياً، لو في سوق عمل مزبوط، هودي 2400 وظيفة.. عنا 2000 مؤسسة بالكنيسة، إذا كل مؤسسة بتاخود موظف بالسنة، هودي 4500 فرصة عمل.

بس يكون همنا الأساسي الإنسان، برأيي في عنا مجالات وطاقات مخباية، ومنقدر نطورها.. ميشان هيك عم يشتغل أتحاد “أورا” على الفوروم.. وأنا مستعد كأبونا إدعي لإلغاء الطائفية السياسية، بس يصيرو اللبنانيي كلّن متل بعضن كمواطنين…

ما بقا يدخلو السياسيين بموضوع الوظائف، وسيستام الوظائف ما حدن يدقْ فيه…

دعوة ورجاء

إشتغل عَ اللبنانيي 35 سنة حتى يصير ما عنا لا لون ولا طعمة، ولا ريحة، ولا نحكي، بس هيدا البلد بدّو يضل النا، وما رح نعطيه لحدا بالقوة.. واليوم مع تجنيد 120 شخص، و50 موظف عملنا “الفوروم”، وحطينا طاقات ومصاري حتى ندعم الشبْ اللبناني..

وبالفوروم في حفلات موسيقية، وفنية، حتى تنزل العيلة على “الفوروم” تستفيد، وتوظف إبنها، أو تفوّت إبنها عَ الجامعة الخاصة أو اللبنانية.. وفيها تشتري غراض مونة بلدية… وهيك نستفيد من بعضنا، حتى نوقف مع بعضنا..

بدنا نسند شبيبتنا، واي شي ما لازم نوفرّو.. بالنهاية نحنا عنا ثقة بكنيستنا وبجامعنا، وبرجال الدين والسياسة، ومنقول: عملو معروف، بدنا ياكم تكونو معنا.. لأنو بلد بلا شعب ما في بلد… ولبنان أولاً مش مقولة شعرية، لأنو لبنان أولاً بأولوية سبابه، وباليد العاملة، وبأدمغتو..

رصد Agoraleaks.com