أخبار عاجلة

عَ مدار الساعة


خاص – الدكتور جوليان صفير: لو خيّي عم يتجاوز القانون بدّي عارضو.. وقرار وزارة الأشغال منو مُبرم، ووين رقابة البلدية (التفاصيل -Audio)

– البلدية غايبة عن شكوى مستثمري الشطوط، بيحكو انو بعد الساعة 10 -11  ليل في مخدرات و…!!
– البلدية تتعاطى بتعجرف وتعاملنا كأعداء..  بس منقلا: نحنا ولادو مدينة وحدي.. وخطوط الحمر مصلحة الجبيليين

***

مقتطف من حديث مقرّر بلدية الظل لمدينة جبيل – بيبلوس الدكتور جوليان صفير، لموقع “Agoraleaks.com”: ( 9- تشرين الأول 2017)

  • من يوم اطلاق بلدية الظل 4 تموز 2017، انطلقنا من فكرة المعارضة البناءة، وقلنا ما بيكفي نقول: هون فيشي منو منيح، لا بل قدمنا حلول.. يعني كل مشكل عم نطرحو، عم نطرح معو حل. وهيدا يللي بيعطينا نوع من المصداقية كبيري تجاه الرأي العام الجبيلي..

Baladiyat-zol-4

  • هالتجربة مفروض تتعمّم على كل لبنان.
    ونحنا منشجّع كل البلديات بلبنان تعمل مجالس بلدية ظل، حتى لو كانت مجالس البلدية من لون سياسي أكثري بالمنطقة، لأنو في تحسين
    – للعمل الديمقراطي،
    – وبحسّن كتيرالعمل البلدي،
    – بخلي الناس تواكب العمل البلدي، ويكون عندا مبادرة بإيجاد الحلول
    – بخلي يصير في تدرج وخبرة لأشخاص كوادر وأصحاب اختصاص ليتمّ اختيارن بالعمل البلدي

Zol- Jbeil3

تعجرف بلدية جبيل

  • من وقت عملنا إطلاق بلدية الظل، ونحنا متبعين سياسة اليد الممدودة،
    زياد حواط رئيس البلدية السابق كان رافض نهائياً يقابلنا.
    انا شخصياً اخدت دعوة للبلدية، وما استقبلنا…!
    بالإطلاق ما كان وجود للأعضاء البلدية نهائياً، رغم رغبتنا بوجودن حتى يعرفو انو نحنا ما منتصرف كيدياً
  • أطلقنا مشروع الشطوط بجبيل، وكان أولوية بالنسبة النا، لأنو ملف هام بالصيف.
    وبجبيل عنا 3 شطوط : شط الرمل. والبحصة 1، وشط البحصة 2..

أعمال منافية للأخلاق على الشط

 Baladiyat-Jbeil

  • استثمارات عم تنعطا مش معروف كيف عم تنعطا، الآلية منا واضحة وفي مخالفات. والبلدية عم تاخود مصاري من المستثمرين، انما البلدية ما عم تأمّن شروط السلامة، وحتى شروط البديهية متل:
    – رجال أمن يكونو موجودين: بصير أوقات في مشاكل.
    – غياب كلي لعناصرالبلدية حتى يعملو مراقبة مين فايت على الشط، لأنو بعد الساعة 10 – 11 ليل، عم يصير في اعمال منافية للأخلاق، من دعارة ومخدرات.. ومنا عم نخترع شي، المستثمرين هني أنفسهم عم يقولولنا ويشتكو من هالمواضيع، لأنو عم يدفعو مصاري وما في شي من البلدية
  • حجة البلدية الدايمة ما عندا مصاري
  • جربنا ناخود موعد من رئيس بلدية جبيل وسام زعرور، جمعتين تلاتي وما عطانا موعد، بالنهاية ارسلنا ملف الشطوط بالبريد، ونزلنا الملف عَ Social Media، وحطينا الملف برسم الرأي العام الجبيلي.
  • من حق المواطن ينزل على الشط وما يدفع لا 10 آلاف ليرة ولا عشرين الف ليرة، بدو يحط منشفة ويقعد على الرمل.. بالقانون ما في حدا يمنع الناس تنزل على الأملاك العامة.
  • من نص شهر آب والبلدية ما عم تتعاون بخصوص ملف الشطوط.. معتبرا حالها اكبر منا، وكأنو نحنا ناس منا من جبيل.. ولكن منقول: في كتير ملفات رح نطرحا..

الطرقات

Baladiyat-zol-hadaf3

  • قريباً رح نطرح موضوع الطرقات العامة، تمّ حفرا لتنفيذ بنى تحتية من قبل مجلس الإنماء والإعمار ووزارة الأشغال.. فطلبنا من البلدية انو كسلطة محلية تعترض ع تنفيذ المشاريع، لأنو المتعهّد عم ينفّذ المشروع، عم يخلص التعهد والطريق عم تصير بحالة كارثية. عَ القليلي تنردّ الطريق متل ما كانت..
  • وين حق الرقابة واجباتك تراقبي، وتشوفو المتعهد إذا عم ينفذ مزبوط، ومفروض تبعتي كتاب لوزراة الأشغال ولمجلس الإنماء والإعمار..

منحب قول للبلدية ولأهالي جبيل، نحنا ما رح نيئس، ماشيين بسياسة مدّ اليد، بس بالنهاية الحوار بدّو طرفين.. ونحنا ولاد مدينة وحدي، بيسوا يكون في تنافس بالرؤية، بس نحنا منّا أعداء..

التعدي على شط جبيل

Zol- Jbeil4

  • صرلنا 48 ساعة عم نحكي عن صب باطون ع شط البحصة، صحيح الترخيص جايي من وزارة الأشغال، بترميم حائط.. هالرخصة بترميم الحائط تخطّت دورا، صار الحائط عَ فقش الموج… وحطينا صور وناشدنا بالإعلام كرمال الوزارات تتحرّك، والناس المعنيين يتحركو
  • بالنهاية منيح يكون عندو ترخيص من وزارة الأشغال. بالنسبة النا وزارة الأشغال عاطية ترخيص لترميم حائط فقط مش لقطع الشطْ..! فما بحقلنا نقطع الشط عن العموم..
  • قرار وزارة الأشغال مش مُبرمْ، بآلية التنفيذ بدنا نشوف كيف عم يتنفّذ.. مع الأسف لما بتعرف في عمل بهالحجم عَ الشط بلدية جبيل، مفروض تبعت ناس تكشف.. ما نحنا بلبنان منتذاكى، منكون عم نرمم حيط مندفشو مترين. طيب يا بلدية جبيل شفتي قايمة القيامة عَ المخالفة، ما حدا بينزل منكم يعاين الموضوع!!

  • اليوم إجانا تطمين، إنو هالأعمال وقفت. ونحنا منشدّد انو القصة منا موجهة ضد أشخاص. لو كان خيّي عم يعمل عمل منو قانوني، بدّي عارضو.. لأنو عم يدق بالمصلحة العامة..
  • بدنا نتعلم شغلة بلبنان انو المصلحة العامة هيي الأولوية ومش مصلحة الأفراد.
  • إضافة الى هيدي المخالفة ألوف من المخالفات بجبيل عم تصير كل يوم…
    – هيا يللي بقلك أنا جايب امضا وزير
    – هيدا يللي بقلك أنا جايب امضا وزير الأشغال
    – واحد بقلك انا جايب امضا رئيس الدرك
    ما فينا نكفي هيك.. الحالة بجبيل باتت ملحّة..
  • نناشد الوزراء المعنية ترسل أشخاص أخصائيين يعملو نوع من مسح شامل للأبنية المتعمرة بآخر 10 سنين.. ما نحنا بايام الدولة، ما فينا نكفي هيك.. أنو أنا بخالف وبتركا 5 سنين لأنو معي كم إمضا.. بالأخير بقلن: هيدا أمر واقع. انو بيتي هون، شو بشيلو..!!

 منطلب من كل القوى السياسية، يللي بقولو بمؤتمراتن انو هني بدن يحافظو على النظام بلبنان، وعلى البنى التحتية وعلى هيبة الدولة، يساعدونا، لأنو شغلنا انمائي صرف.

  • المخالفة اللي بدها تصير بقلب جبيل مين ما يكون داعما سياسياً نحنا ضدا، ورح نواحها ونقولا بالعلن، ورهاننا على الرأي العام الجبيلي…
  • بتمنى على أعضاء المجلس البلدي، نحنا منعرف بعضنا كلنا سوا، ونحنا ولاد مدينة وحدي. بصراحة مفاجئينا، ما حدن خسر تلفون حتى يقلنا يا جماعة: نحنا بعتنا كتاب اعتراض. كتاب استقصاء لنشوف. هيدي طريقة التعامل ما بتجوز..
  • عملو نوع من صحوة ضمير، وشوفو انو يللي عم نطالب فيه بالنهاية هوي مصلحة عامة. ونحنا ع نفس المسافة من الجميع.
  • نحنا ما رح نسكت، وخطوط حمر ما فيه. الخط الأحمر الوحيد هوي مصلحة جبيل وأهاليها.
    نحنا كبلدية ظل بادرنا بمّد اليد لآخر الحدود، المبادرة صارت عندن. والطابة بملعبكن…

يتبع… 

Baladiyat-zol-hadaf1

Baladiyat-zol-hadaf2