وديع عقل للمُشككين: ضلكن عايشين بأوهامكم.. الرئيس عون عطانا كتير، وصار دورنا، نوفي ونعطي بلدنا.. (Audio)

– وديع عقل يطلق مجموعة الـ”Social Media” الداعمة لعهد الرئيس عون وبناء الدولة…

***

أقام مستشار وزارة الدولة شؤون الفساد المحامي وديع عقل لقاء في دارته، في بيت حباق – قضاء جبيل، شارك فيه وزيرا البيئة طارق الخطيب، وشؤون الفساد نقولا تويني، النائب البطريركي العام المطران الياس نصار، النائب السابق شامل موزايا، عضو المجلس السياسي في “التيار الوطني الحر” الدكتور ناجي الحايك ورندلا جبور، وعدد من رؤساء البلديات والمخاتير والناشطين على مواقع التواصل الاجتماعي من مختلف المناطق والمذاهب ومدعوون.

وقد القى صاحب الدعوة المحامي وديع عقل كلمة رحب فيها بالحاضرين، وقال:

• أهلا وسهلا بالجميع، بكل المجموعين هون، وشرفونا من كل المناطق اللبنانية،
  لِ يللي بيعمل Sponser عَ الفايسبوك، ويللي بيشتري لايكات على الفايسبوك، ويللي بقول 1000، و2000، ومليون وخبار…
  نحنا الـ Facebook، نحنا الـ Social Media حقيقية بلبنان… ضلكن اشتريو، وضلكن عايشين بأوهامكم، هون ببيت حباق اليوم، مجموعين: الأقوى، والأحسن، والأفضل، والأجرأ والأشرف، فتيان، وشيخات وصبايا، ورجال، وهودي هنّي اللي بيبنو لبنان.
• من 100 سنة عالقد، لبنان 1917،
  هالتلة اللي قاعدين عليا، يللي هيي بيت المطران بولس عقل، بطل من أبطال الحرب العالمية الأولى،
  من 100 سنة هالأرض كانت رماد، لأنو كان في مجرم تركي عثماني، حرقلنا بيوتنا، وقتلنا عيالنا، وأصحابنا وأهالينا،
  بس من 100 سنة كمان، كان في رجال، وكان في نسوان سفقو رقبة التركي، ونحنا اليوم موجودين هون، ببيت حباق، والفضل لإلهم..

• سنة 1989،
  وتحتنا كان في مربض مدفعية للجيش اللبناني،
  لجيش الشرفاء، ومن هالمنطقة بالذات، اجو الزعران يقوصو عَ الجيش..
  بس بعد 1989، واعتبرو خِسرْ، وكانو واهمين..
  رجع وبالـ 2005، وبالـ2016.. وحدو ما في غيرو “ميشال عون“
• واليوم من هون،
  والموجودين الهون، اليوم من جزين، ومن بكاسين، ومن بنت جبيل، ومن مرجعيون، ومن رأس بعلبك، ومن الشمال، وكل قرنة بالكورة، ومن بجة، ومن عمشيت الشريفة…
  هودي كل الموجودين هون، من مختلف المشارب، والمذاهب، منبرهن انو نحنا علمانيي، ولبنانيي… وما عم نْطِقْ حنك…
• ميشال عون، كسّر المافيا، واستلم قصر الشعب، واستردّ الحق…
  اليوم نحنا مقلو شكراً جنرال.
  انتا عطيتنا كتير، وهلق صار دورنا، علينا نوفي، ونحنا لازم نعطي بلدنا…
  ولحدّ هلق، بعد ما عطينا شي.
  والبلد اللي بدو ينبني، بدّو ينبني بتضحية كبيري، وأكبر بكتيرمن يللي انعطت اليوم…

• من هالنقطة هيدي، باسم كل الأصحاب، وباسم كل الصديقات، يللي انتو عزيزين…
  بسمح لنفسي اني قول: 
  نحنا منتعهد، انو نمشي سوا مع بعض، ومع كتار غيرنا، من يللي عم يسمعونا…
  الليلة في سهرة بمونتريال،
  ومن اصحابنا بسيدني اللي عم يشوفونا على الفايسبوك…
  ومن يللي ناطرين الرئيس بباريس ب 24 أيلول.
  نحنا منعلن رسمياً، انو اليوم انطلقت مجموعة الـ”Social Media” الحقيقية لدعم بناء الوطن، ولبناء لبنان الجديد، ولبناء لبنان المستقبل، ولبناء لبنان “ميشال عون”.