– عشنا الحرية والسيادة والإستقلال ومشرقيتنا لنحمي ميثاقنا وتنوعنا وخط الإعتدال، ونحنا اللي عم نواجه الفساد
– تفاهمنا مع القوات بالوقت اللي كان في محاولة إستفراد لالن (الجزء 2)

مقتطف من حديث رئيس التيار الوطني الحرّ جبران باسيل في حفل توزيع 10 آلاف بطاقة انتساب، في مجمّع فؤاد شهاب: (10 أيلول 2017)

بدّي اعتذر سلف، ما عم إحتكر لشي للتيار عن غيرو من الفئات، او من الأحزاب، أو التيارات السياسية التانية، (بس نحنا هيك منشوف حالنا) يا وحيدين، يا متميزين، يا إذا في غيرنا، متقدمين عليه بِ 3 محاور:

• 1) بماضينا (ورح نقول وقايع سياسية)
  2) بحاضرنا (وبدي احكي عن الحس العاطفي، يللي بخلينا نكون حاضرين)
  3) بمستقبلنا (وهوي حسنا السياسي يللي بقودنا، ببعدنا الذاتي ونقدنا السياسي)

ماضينا

• بدكم تفتخرو لأنو التيار غير شي عن كل الناس بِ 15 شغلة تجرأ يكون مميّز فيون، ومش بالحكي بالممارسة:
  1) بالوصاية السورية: حرية وسيادة واستقلال.
  
  لما كل الناس، أقله ربطت مطالبتها بشي بخصها، التيار الوطني الحر، ما كان مقيّد بانو قائدو كان بالمنفى، وهيدا الشي ما عملو عائق، كان هوي هون، عم يناضل ويقاتل، ولما كل الناس خافت بهيديك الفترة، انو تخرج عن الوصاية السورية، راح العماد عون على أميركا،
  
  وما خاف من حدا، وإشتغل من هونيك لقانون محاسبة سورية. وتخوننا بوقتا..
• 2) الاحتلال الإسرائيلي
  لما واجهناه نحنا وغيرنا من اللبنانيين، بأصعب الأوقات،
  متل ما راح العماد على أميركا، وقتا قبل الانتخابات النيابية 2009،
  
  (التيار يرفض عزل حزب الله والمقاومة بحكومة السنيورة البتراء)
  تجرأ وراح على سورية وعلى ايران، وما عمل حسابات، وما خاف من شي. وهوي الوحيد اللي عمل هيدي الخطوة.
  وليه؟؟ لأنو نحنا التيار السيادي الحقيقي بلبنان اللي ما عندو ارتباط بالخارج.
  ولا عنا حدود..
  ولا عنا عقدة نحكي مع مين ما بدنا، وقت اللي بكون هيا الشي لصالحنا، ولصالح لبنان.
  ومنتورع نحكي مع حدا لما هيدا الشي بكون بمسّ بلبنان.

• 3) التحالف الرباعي، الخماسي – السداسي – السباعي.. سنة 2005
  بوقتا وقف التيار الوطني الحرّ لوحدو، وواجه الكلّ، وإنتصر..

• 4) التفاهم مع حزب الله
  لما ارادو بسنة 2006 يعزلو حزب الله، وقف التيار الوطني الحرّ وعمل تفاهمو مع حزب الله، وهيدا التفاهم الإستراتيجي يللي خلص البلد، وما عمل حسابات بوقتا، وما خاف من شي.
  
• 5) التفاهم مع “المستقبل”
  لما تيار المستقبل، صار بأصعب ظروفو، التيار الوطني الحرّ مدّ ايدو وهوي وياه لبعضن، لأنو هيدا بالنسبة لإلنا “تيار الإعتدال”، وهيدا طريقالخلاص مع شريكنا اللبناني. وما خفنا متل ما هلق الكلّ عم يقول “المستقبل بأصعب ظروفو، وبأصعب أوقاتو” نحنا شايفين انو هيدي الشراكة هيي اليوم اللي بتخلص البلد.
  
• 6) التفاهم مع “القوات اللبنانية”
  بدي قول هون، وهوي حقيقة بالنسبة لإلنا:
  نحنا تفاهمنا مع القوات بالوقت اللي كان في محاولة إستفراد لالن.
  
  لأنو ما خافي على حدا، إنو مسار الرئاسة كان موصّل حكماً للعماد عون بالظروف اللي كنا ماشيين فيا.
  بوقتا صار في محاولة تصوير للأمور، انو في خاسر ورابح، قلنا نحنا بهالفترة “نحنا بحاجة نعزّز وحدتنا: وبحاجة لنبني لمستقبل كبير. وهيدي الشراكة نحنا عم نكون جريئين فيا، لأنو نحنا عم نعطي فيا. وإجو كتار نبهونا، “انتبهو شو عم تخسرو، وانتبهو بشو عم تضحو” ونحنا مقتنعين إنو هيدي الشراكة، إذا بتنبنى على قاعدة المصلحة الكبيري، وما منطلع ع مصالحنا الصغيري وعلى حساباتنا الضيقة، هيدي منيحة لمستقبل بلدنا ووحدة مجتمعنا.
• 7) النزوح السوري
  بسنة 2011، كان عددن 3 آلاف سوري، لما وقف التيار وحدو ولفت لهالقصة، قالو عنو “عنصري”.
  وما حدا لليوم عم يتجرأ يحكي بهيدي القضية، متل ما التيار عم يتصدالا.
  مع كل محبتنا للشعب السوري الجار والشقيق، بس بهيدي القصة التيار الوطني الحر هوي الوحيد الضمانة لعودة السوريي لوطنن، بالطريقة اللي هوي عم يتعاطى فيا بالملف.
• 8) الحرب على الإرهاب
  3 سنين لورا، 5 سنين لورا.. قد ما بدكم..
  بالآخر نحنا وحدنا، بتاريخ لبنان الحديث، يللي رئيسنا، رئيس جمهوريتنا، بفضلو وبفضل وجودو بقصر بعبدا، أوّل مرة بتاريخ لبنان، الجيش اللبناني بيطلع بشكّ علم على الحدود الشرقية، وبحطّ موقع قتالي فوق.
  هيدي هيي السيادة.
  السيادة مش شعار، وناضور، ونظارات.

https://www.youtube.com/watch?v=3svg4M2Gi1M&feature=youtu.be

• السيادة، هيي قرار بمارسو الواحد كل يوم.
  وكل يوم عم نمارسو،
  – بالخارجية عم نمارسو
  – بالرئاسة منمارسو
  – بالتكتّل منمارسو

• كل يوم ما منخاف من أجنبي عَ مصلحة وطننا، منكون نحنا سياديين، وكل واحد من يللي بياخدو توجيهاتن من برّا، وبيرجع بيحكينا عن السيادة،
  يوم بكون تحت المحتل
  يوم بكون تحت الوصي
  هيدا ما في يحكي مع اللبنانيين بالسيادة، هيدا أكتر شي في يطلب منا، إنو نسكت عنو…
• 9) المشرقية
  
  مين في لبناني، استرجى يحكي عن المشرقية ببعدا الإنساني الكبير، يللي هوي بيتخطى مسيحية وإسلامية. ويللي هوي بيتخطى لبنان. يللي بيعني معنى وجودنا الحرّ بالمنطقة. وبيعني معنى تميزنا، وتعددنا.
  بالظرف الصعب، رحنا كلنا على سورية، على براد، تَ نعبّر عن مفهوم مشرقيتنا، يللي اليوم كل العالم العربي مجبور يلحقنا تَ يبقى الوطن العربي طيّب.
• 10) إستعادة الجنسية
  حكينا عن لبنان، وانتشارو، وجناحيه.
  بس نحنا اللي تجرأنا نوقّف مجلس نيابي، و نوقّف البلد، تَ طلعنا قانون “استعادة الجنسية” بعد 15 سنة من تقديمو. وتَ أوّل مرة، التيار الوطني الحر، بدّو يتسجلو بتاريخ لبنان، انو هوي التيار يللي أعطى المنتشرين اللبنانيين:
  – جنسية،
  – قانون إنتخاب،
  – تمثيل نواب.
• 11) الرئاسة
  
  أنا وزير خارجية سمعت ناس أعلى مني، واقلّ مني بالمركز. (كل الناس أحسن مني)
  سمعتن بخبرو كيف انو رئيس جمهورية لبنان، إجا 11 مرّة على 12 بكلمة من الخارج.
  نحنا كلنا سوا عشنا سنتين ونص، متهمين انومعطلين البلد، وكنا نقلن: ما بتاخدو حقكم، الا ما يكون في تيار بيتجرأ يترك شغور برئاسة الجمهورية حتى تتملّى من الناس اللي بيستحقوها، واللي اختارن الشعب اللبناني.
  الرئاسة ما إجت بلا تضحيات.
  الرئاسة ما اجت بالحكي والشعارات.
  الرئاسة إجت لما في شعب تمسّك بحقو بالتمثيل. وهيك منتساوى مع بعضنا بالوطن.
• 12) قانون الإنتخاب والنسبية
  ما في تيار بعتقد بالسياسة، وأبعد من تاريخ لبنان. بكون هوي أكثرية، وبيجي عَ الحكم،
  بوقت بكون هوي بالحكم وأكترية، بيعمل قانون انتخاب عَ أساس النسبية.
  
  لما بيحكونا بإلغاء الآخرين، وبيحكونا بعدم تمثيل الكل، منقلن:
  نحنا التيار اللي اشتغل تساوى، ابن عكار بابن البقاع الشمالي، والبقاع الغربي، وبابن صور وصيدا والزهراني ومرجعيون.. والشوف وعاليه متل بيروت. كسروان وجبيل والبترون والمتن منن ولا شوي أحسن من بقية المناطق. واللبنانيين يللي هون منن أحسن من اللبنانيين يللي برا.
  هيدا التفكير بكل مواطن لبناني.
  وهيدي مشكلتنا الجايي بقانون الإنتخاب، انو نحنا عم نفكر بكل اللبنانيين، وكيف بدنا نأمنلن حقوقن ومشاركتن، وكل واحد عم يفكر بحساباتو الخاصة وبمكناتو الانتخابية.
• 13) الحرب على الفساد
  رح قول شغلة وحدي: أد ما لحقو حالن، 15 سنة غياب بالزمن السوري، وإجو فكرو انو بلحظة بيستلحقو.
  بيوم 14 آذار (ذكرى) افتكرو بيقدرو يردو 15 سنة وصاية، وذل لالن.
  الفساد اللي عاملينو بالبلد، ما بيقدرو يشيلو عنن بكذبة بالإعلام، ولا بتهمة.
  التيار الوطني الحرّ بدّو يضل، رمز الإصلاح، ورأس الحربة بمحاربة الفساد.
  لأنو التيار الوطني الحرّ، هوي اللي تجرأ، والوحيد”
  – خفّض فاتورة الخليوي بلبنان، من بعد ما ارتفعت 6 مرات، التيار استلم الوزارة وخفّض الفاتورة
  – التيارالوطني الحر، هوي الوحيد يللي عمل خطة كهربا، وامّن لالها كل مستلزمات تنفيذا، وشايفينن شو عم يعملو حتى يمنعو الكهربا عنا.
  – التيار الوطني الحرّ، هوي الوحيد يللي بـ 60 سنة من تاريخ لبنان، نعمل سديّن، هوي بكم سنة، عمل 7 سدود.
  – التيار الوطني الحرّ، هوي الوحيد اللي تجرأ، ويقول لبنان بلد في نفط، وفي غاز، وما منخضع لحدا بهيدا الموضوع
  هيدي هيي محاربة الفساد..
  محاربة الفساد، ما بتكون بالحكي، بتكون بالشغل.
  محاربة الفساد مش بالنكد السياسي. وبتفتيح دفاتر. لأنو نحنا عم نتطلّع لنبني مستقبل، وميشان هيك التيار الوطني الحرّ هوي الوحيد اللي قاتل، تَ أوّل مرة بتاريخ لبنان، الضرايب تفوت على الجيوب الكبيري، مش بس على المواطنين.
  كأنو صرنا مستحيين، ونحنا مفتخرين انو ايه نعم:
  – بفضلنا نعمل ضريبة على العقار
  – بفضلنا زادت الضريبة على المصارف
  – بفضلنا نعملت الضريبة على الأملاك البحرية
  – بفضلنا نحنا، صارت الشركات الكبرى تنطال بضريبتا اكتر
  التيار الوطني الحر هوي اللي عم يقاتل ويشتغل حتى يكون عنا برنامج وخطة اقتصادية حقيقية تطلّع البلد من أزمتو الكبيري.
  هيدا كلشي عملناه من اليوم ولورا… وكلو هيدا فينا نفتخر فيه، وكل واحد بجرّب يعّير أي حدن منا، بتشيلولو أي واقعة سياسية من هودي..

جبران باسيل بحفل توزيع 10 آلاف بطاقة للتيار: موجودين عَ مساحة الوطن بكل بيت بلبنان وبرّا
– بطاقة التيار الوطني الحرّ فخر إنتمائنا: للإلتزام والتواصل وممارسة ديمقراطيتنا وحماية لبنان.. (الجزء 1)

جبران باسيل بحفل توزيع 10 آلاف بطاقة للتيار: موجودين عَ مساحة الوطن بكل بيت بلبنان وبرّا (Audio)

يتبع…

رصد Agoraleaks.com