جبران باسيل بحفل توزيع 10 آلاف بطاقة للتيار: موجودين عَ مساحة الوطن بكل بيت بلبنان وبرّا (Audio)

– بطاقة التيار الوطني الحرّ فخر إنتمائنا: للإلتزام والتواصل وممارسة ديمقراطيتنا وحماية لبنان.. (الجزء 1)

***

مقتطف من حديث رئيس التيار الوطني الحرّ جبران باسيل في حفل توزيع 10 آلاف بطاقة انتساب، في مجمّع فؤاد شهاب: (10 أيلول 2017)

• التيار الوطني الحرّ، منحييكم،
  ومنتسبينا الجداد، أهلا وسهلا فيكم للعيلة العونية.
  منلتقى للسنة التانية بموعد صار سنوي، لنجدّد فيه التزام من عدة التزامات قمنا فيا،
  بإنو هيدا التيار يصير خلال 4 سنين، عدد المنتسبين لالو 50 الف.
• السنة متل هيديك السنة، بعدنا بالنمو الموعود والمفروض،
  وكل ساعة عم يصير في مولود جديد بالتيار الوطني الحرّ،
  وكل ساعة مع هالتياريي الجداد، عم يتجدّد أملنا بمستقبلنا وبمستقبل البلد.
• اليوم انتو جايين من كل لبنان والمناطق، ومن كل الطوائف،
  تتقولو هيدا التيار موجود على مساحة الوطن بكل بيت، وبكل فكر، وموجود بلبنان وبرّا لبنان، وانتو أملو، وانتو ضمانة استمرارو..

ليه البطاقة؟

• سألتني امرأة مبارحة (كنت عم عزّي بضيعة) قالتلي:
  شو فرق إذا بكون تيار أو عونية، إذا معي بطاقة أو ما معي بطاقة.
  ما أنا ما معي بطاقة، وتيار أكتر بكتير من ناس. وفي منون معن بطاقة ومش متلي تيار.
  قلتلا: شو بصير إذا كان معك التنين:
  – معك البطاقة.
  – ومعك الفكر.

• اليوم هيدي البطاقة هيي متل بطاقة الهوية،
  اللبناني اللي عم نركض وراه عَ كل العالم، تيحمل بطاقة الهوية تبعو،
  دمو وجيناتو لبناني، وليه عم نركض نعطيه الهوية..!!
  متل إنتو، في كتير ناس فكرن وعقلن، تيار. بس ليه منركض تنعطيون البطاقة؟؟
  لأنو هيي أول شي: فعل التزام. ومش موضوع حياء. وهيدي كل القصة.
• يا واحد بيفتخر بشو هوي بينتمي بفكرو، يا واحد بيستحي؟؟؟
  ونحنا التيار منا ميليشيا، ولا حتى بحب قول انو حزب.
  نحنا إسمنا “التيار الوطني الحرّ” والتيار أوسع بكتير من حزب.

فوائد البطاقة

• إذا واحد بدو يحكي عن فوائد يحمل بطاقة، غير انو:

• 1) بعرّف عن حالو،
  2) وبيتواصل مع رفقاتو،
  3) وهلق نحنا عم نعطي مميزات كتير منا “Application” تبع التيار،
  4) وبصير ينتخب ويشارك، ومش بس بقلب القاعدة التيارية، والمكنة التيارية. وقيادة التيار.
  5) انتو كمان بتنخبو نواب المستقبل، يللي بدن يمثلو التيار.
  6) ونحنا ملتزمين بفوائد تكون كتيري،
  – بسكن.
  – بضمان.
  – بفوائد اقتصادية.
  ونشالله Ocard هيي البطاقة الجديدي، يللي بتحملوها مع بطاقتكم. وبدها تصير يوم من الإيام، متل ما عم تعمل الدولة الممغنطة، البطاقة اللي بيقدر ينعمل فيا كلشي. بطاقتنا بدها تصير بيوم من الإيام، البطاقة الممغنطة يللي بتعطي كتير من الإمتيازات لإبن التيار.

• هيدا كلو منو مهم قدام القضية الكبيري،
  قضيتنا اليوم، هيي فخر الإنتماء. نحنا منفتخر لشو مننتمي.
  وانتو اليوم جايين على محل بدكم تشوفو حالكم، وترفعو راسكن، انو تيار وطني حر…
  مش بس لأنو انتو أحسن ناس، وأقوى ناس.. لأنو التيار الوطني الحرّ هوي أساسا فيه، من بداياتو أحسن ناس وأقوى ناس.
• انا بدي قلكم، اللي بحب التيار، ينتسب لالو.
  نحنا ما فينا نكون متل هول السياسيين، يللي بيحكو شعارات، وما بنفذو منا شي.
  نحنا بدنا نعطي متل عن الإلتزام، وهيدا التيار بدكم تفتخرو انو تكونو فيه، لأنو هوي غير شي عن غيرو.
• بدي اعتذر سلف،
  بكلشي بدي احكي عن التيار، ما عم إحتكر، لشي من التيار عن غيرو من الفئات، او من الأحزاب، أو من التيارات السياسية التانية. (بس نحا هيك منشوف حالنا) يا وحيدين، يا متميزين، يا إذا في غيرنا، متقدمين عليه بـ 3 محاور:
  1) بماضينا (ورح نقول وقايع سياسية)
  2) بحاضرنا (وبدي احكي عن الحس العاطفي، يللي بخلينا نكون بهالحاضر)
  3) بمستقبلنا (وهوي حسنا السياسي يللي بقودنأ، وببعدنا الذاتي ونقدنا السياسي)

الجزء 2

جبران باسيل يثبّت التيار الأقوى للبنان القوي من ماضيه وحاضره باتجاه المستقبل (Audio)
– عشنا الحرية والسيادة والإستقلال ومشرقيتنا لنحمي ميثاقنا وتنوعنا وخط الإعتدال، ونحنا اللي عم نواجه الفساد
– تفاهمنا مع القوات بالوقت اللي كان في محاولة إستفراد لالن (الجزء 2)

جبران باسيل يثبّت التيار الأقوى للبنان القوي من ماضيه وحاضره باتجاه المستقبل (Audio)

رصد Agoraleaks.com