أخبار عاجلة

عَ مدار الساعة


أبي نصر: من 4 شهور موعد من المشنوق مافي.. و90% مش نازل انتخابات (Audio)

– جورج ياسمين: لو نجح مشروعن بسورية، وسقط الأسد، كانو هون “بالقشاط” لحقونا

مقتطف من حديث رئيس الإتحاد المسيحي الديمقراطي اللبناني، النائب نعمة الله ابي نصر لقناة الـ”OTV”:

محافظة كسروان – جبيل

  • وزير الداخلية عارض اقتراح المحافظة بشراسة،
    انو في بكرا لا-مركزية ادارية بتحلّ الأمور هيدي.
    ما كان يقطع بسهولة، وتأجّل مرة – تنان – تلاتة. بالآخر درست أعضاء اللجنة،
    لقيت في عضو مش عم يحضر اسمو النائب خالد الضاهر، تلفنتلو، واجا، وأيّد قانون اقرار المحافظة.
  • أبديت الأسباب الموجبة بوضوح:
    – عنا 91 بلدية بين جبيل وكسروان، 51 بلدية بكسروان.
    – في اكتر من 600 الف مواطن عايشين بهالمنطقة.
    – ما في سبب تمشي محافظة ببعلبك، والهرمل، وبعكار.. شو يعني عم نعمل صيف وشتي على سقف واحد
    – كل يوم في فوق 1500 سيارة بيطلعو الصبح ويبيرجعو الضهر عَ بعبدا، هودي بعرقلو السير، بشوهو البيئة. بيحرقو الأعصاب، بيحرقو وقتن. في محامي مضطر يطلع عَ بعبدا، في شخص تاني مضطر يصدق عَ امضا المختار. التالت بدو يدفع 10 آلاف $ ضرائب معاملات..
  • الناس هلكت.. وجايين من جرد العاقورة، من قرطبا، وكفردبيان، واهمج.. وبقولولك: طلعنا عَ بعبدا، ما قدرنا عملنا شي. جايين تاني مرة.
  • عم نوسّع الأوتوستراد، ونرصد مصاري، والخبرا بقولو، بعد 3- 4 – 5 سنين، يمكن الأمور ترجع متل ما هيي
  • لازم نعمل المراسيم التطبيقية للمحافظة، بدنا نأمّن أرض، ومركز القائمقامية منقدر نعمل طابق إضافي. ويجب تأمين المبالغ لتأمين المكان. والمكان تأمينو هيّن. سرايا جديدي، بينضاف مؤقتاً طابق. ومنشوف مع اتحاد البلديات جبيل وكسروان شو ممكن ينعمل. بانتظار بناء يكون بليق بأبناء كسروان وجبيل.
  • من سنة 9 نيسان 2003، دايماً وزارة الداخلية بالمرصاد: لاق. لاق. لاق

ورداً على سؤال مساعدة الوزير المشنوق بهذا المجال، قال أبي نصر:

  • عم يساعد جداً بشو؟
    بساعد بيعطيك نمر سيارات. قد ما بدّك.
    بيعطيك قزاز “فوميه” قد ما بدّك؟؟
    بس الوزير المشنوق، قلتلو ياها مبارح: الي 4 اشهر طالب موعد منو، ما بيعطي

الرئيس عون

  • بعهد فخامة الرئيس، اكيد هالمشاريع هيدي، من تجنيس واستعادة الجنسية للمعالجة
    وما كانت لتتحقق بعض الأمور، لو ما في نَفَس من قبل فخامة الرئيس عون
  • بكل وضوح رأسمالنا سياسياً بالمناطق المسيحية، هو فخامة الرئيس، وبكل المناطق هوي عادل
  • فخامة الرئيس هوي الأمل الوحيد لوحدة الوطن، بقصة الديمغرافيا، الإنفتاح عَ الإغتراب مهم. والله يطوّل بعمر وزير الخارجية جبران باسيل، اللي قلب الوزارة.. عم يحاول بس ما بيكفي.

هل سيستثمر موضوع المحافظة نيابياً

Nehmatallah-abi-nasr

  • ما انزل بالأول.بعد ما قررت، ولكن انا عضو بتكتّل التغيير والإصلاح
  • الصوت التفضيلي، بدي افهمو!! بدي اتفق أنا واياك. ورايحين سوا.. وما بفرقنا الاّ…
    وصلنا عَ باب الصندوق، أنا أو انت…!!
  • لهالسبب أنا بخاف (ونشالله ما يكون مزبوط تخوفي) النواب اللي رح يطلعو ضمن اللايحة، ما يكونو متعاونين مع بعضن. وكل واحد يشدّ بالتاني. هيدا الشي ما رح يصير عند حزب الله.
  • بهالعمر ما فيي غيّر بسياستي. بلشت انا بالسبعينات، وقت رحت ساعد المهجرين الموارنة بقبرص.
    اللي عم يحاولو ويقولولي “بروم، وشيل وحط..”. ما يضيعو وقت. انا مطرح مني، بدي حريتي، وحريتي بتصبّ بالبلد. و90% مش نازل عَ الإنتخابات…

النزوح السوري

  • هلق جايينا فضيحة النزوح السوري، كيف يعني بأعصاب هادية نقعد نتفرج على مليون ونص سوري من فئة معينة، ومن توجه سياسي معين.
  • الحدود سايبة. ما كان فينا نضبط نتفة حدودنا، ونشوف مين فايت؟؟

يعلّق الإعلامي جورج ياسمين:

Nehmatallah-yesmin
في ناس بدن ياهن، يفوتو عَ لبنان، يفرضو واقع معين سياسي وديمغرافي، بانتظار تغيّر الوضع بسورية، ولكن ما زبط معن بسورية. اكلو “البوكس” بسورية، وسقط مشروعن. وصارو هلق عم يقولولك: كان معك حق بموضوع النازحين، وكان لازم نسمع منك. بس لو نجح مشروعن بسورية، وسقط بشارالأسد، كانو لحقوك هون بالـ”قشاط”.. بكرا بينطرولك مناسبة تانية، متل ما عملو مع الفلسطيني، كان هوي ميزان العلاقة بين المسيحيين والمسلمين.

يقول أبي نصر:

  • يا خيي يفوتو العجزة، والجرحى. واصحاب الحالات الخاصة. قديه بيطلعو 100 – 200 – 300 ألف..
    لاق بدن يفوتوهن كلن..
  • في بسورة مناطق بتستوعب النازحين عَ 10 مرات.
    النازح بلش يتجذّر بالأرض:
    – في الحداد
    – في السنكري.
    – في النجار.
    – معلم الورقة
    – عم يفتحو “كيوسك” ودكانة..
    كلن سوريين.. وجماعتنا عم تفل.. في يأس عَ صعيد شعب، بسبب البطالة. يا خيي مش قاعدين هون بنية العودة!
    عم يتعلمو هون، بدو يرجع يتعلم بسورية!!! نحنا صرنا 35% رح نصير 10%، إذا بدها تضل الأمور هيك.

Syria-lebanon

التنسيق بين لبنان وسورية

  • كنا نبيع كهربا لسورية. هلق نحنا مقاطعين سورية، بس منشتري كهربا.
    هالتذاكي عَ حالنا لازم يكون الو حدود بقا. ونعترف بالواقع. ونشوف وين مصلحة البلد.

الديمغرافيا هيدا بفعل شو؟؟؟

  • بفعل التلاعب الديمغرافيا، اللي بلش سنة 1993-1994
    الفترة الممتدة من 1992 – 2000 – 2004، هيي فترة غياب الفعالية المسيحية بالسلطة التنفيذية.
    صار التجنيس. مرسوم واحد منجنّس ربع مليون زلمي. بمرسوم واحد منجنّس 75 الف فلسطيني واردي اسماؤن.
  • اعترضنا عَ مرسوم التجنيس، وخدنا حكم ما بنفذو.. 
    سنة 2000، بس صرت نايب، حكينا.. وفي كلام مسجّل لدولة الرئيس رفيق الحريري، موجّه للنواب المسيحية، بعد ما اثرت مواضيع التجنيس والتوطين، والتهجير، وبيع اراضي.. قلنا الحريري: نحنا عطيناكم النص (بمجلس النواب) وقفو العدّ..
    هيدا كلام مسجّل، بس هالنص انتمائو لمين؟ اذا للوطن وحدو ماشي الحال؟؟
  • ما نفذو حكم مجلس الشورى، اللي صادر بالإجماع، وبقينا 9 سنين نلاحق فيه، انا وزميلان هني السادة حافظ زخور وانطوان عضم.
  • قدمنا الدعوى باسم الرابطة المارونية. من بعد مدة، شعر فخامة الرئيس الياس الهرواي، وندمْ عَ المرسوم اللي مضيو بشحطة قلم. عمل ملحق. واهتم بالملحق ميشال المرّ. وقال: انا بمضي إذا غبطة البطريرك بقلي امضي.
    مستشارين البطرك (صفير) وقتا، بخلو الجواب، وكان جواب البطريرك: لا يعالج الخطأ بخطأ مماثل.
    مرسوم التجنيس بقي. تجنّس ربع مليون زلمي. منون 75 الف فلسطيني، ونسبة المسيحية أقلّ من 20%. وهلق صارو 500 الف.
  • بدّو يصير فينا بالنزوح ذات الشي؟.. أنا خايف من الديمغرافيا. ولادنا عم يفلو بسبب النزوح، وبسبب تجارة التعليم، وتجارة التطبيب
    إذا المطرح بساع 20 شخص، واجاك ضيوف 5.. اهلا وسهلا فيون. في 4-5 بدن يفلو.. وهيدا الموضوع بطال كل اللبنانيي دون استثناء، ومن كل الطوائف.

ليه؟؟

  • هودي من طايفة معينة، وبدنا نحافظ عليون، نكاية بالطايفة التانية.
    يعني هالصراع بين السنة والشيعة، لازم يخليهن يضربو “فرام”.. لأنو بالنتيجة الملجأ الوحيد لهالطوائف. وهالشي منو لصالح لا السنة ولا الشيعة. لأنو إذا فضي لبنان من المسيحيين، الصراع رح يكون طائفي ومذهبي..

يسأل ياسمين، عن دور الكنائس كلها، (الأرثوذكسية – المارونية – الكاثوليكية – السريانية – الأشورية – الكلدانية ) عن المؤسسات والمدارس، والجامعات.. شو عم يعملو؟ في جامعات عم يعملو ملاعب فوتبول.. شو اللبنانيي بيحضرو بعشرات آلاف مباراة كرة قدم!! ما اضخم مباراة بيحضرا 600 متفرّج.. هيدا الملعب اللي بكلّف 20-30 مليون $ معليه علمو فيون الناس؟؟ يردّ أبي نصر:

  • جورج بكفي.. ما تحمسني. الكنسية اللي عم تعملو مش كافي ابداً.
    سنة 1736 يعني قبل 50 سنة من الثورة الفرنسية، اجتمعو بجامعة اللويزة جدودنا، وقررو مجانية التعليم، وطبقوها.. طبقوها تحت السنديانة، وبالأوقاف.. هلق شو منشوف؟؟؟ تحطيم الأوقاف.
  • عنا جامعات مصانع تتصدّر ادمغة مهيأة برسم التصدير. هودي اللي بروحو لبرا، ما بيرجع منن 20%.. النزف قايم، والدولة عم تتفرّج
  • لو الجامعة اللبنانية، بيعملولا فروع، تستوعب.. يللي عم يروحو للخارج، عم يدرسو بمدارس رسمية بتخص الدولة سواء كندا او فرنسا..
  • هنأت احد رؤساء الجامعات، وهوي راهب.
    قلي: انا منتخبيني جديد. بدي اهتم بالتلاميذ. ما بدي عمّر كلية جديدي. ما بدي اعمل ملعب جديد.

رصد Agoraleaks.com